Read Simte MARK 6 Bible Online

MARK 6 - Simte bible

MARK 6

¹Huleh hu a kipanin a pawt a, amah gam lamah a hung a; huleh a nungjuite’n amah a jui uhi.

²Huleh khawlni ahung hihin, kikhopna inn ah thu a hilh panta a; huleh mi tampi a thuhilh jate’n limdang a sa va, Hipa’n hi thute khoi apat a muh ahiai? a kawma pilna kipia bang pilna hi a, a khut in hichitah a sil loupi a bawl hi bangchidan ahiai?

³Amah hi Mari tapa, Jakob leh, Josse leh, Juda huleh Simon unaupa, sing kuang bawltu khu hilou amaw? A sanggamte hi ah i kawmah um hilou ahi u'maw? a chi va. Huchi'n a tungah a lungkimta sih uhi.

⁴Hizongleh Jesu’n a kawmvah, zawlnei chu amah gam sung leh, amah innkuante lah leh, amah innsungah chih louh zahbawl louhin a um ngei sih hi, a chi a.

⁵Huleh mi damlou tawmtakhatte tunga khut nga a, a suhdam chih louh hutahah sil loupi mawngmawng a bawl thei sih hi.

⁶Huleh ama’n a gintaat louh jiahun limdang a sa mahmah hi. Huleh khuate a thuhilh in, a chiah lehleh hi.

⁷Huleh ama’n sawmlenihte a kawmah a kou a, nih nihin a sawldoh a; huleh dawiniinte tunga thuneihna zong a pia hi.

⁸Huleh a zinna va diingin chiangphut chih louh bangmah, kawljal hileh, tanghou hileh, dangka ip sunga zong sum keng lou diingin thu a pia hi.

⁹Hizongleh keengtophah chu but unla; huleh puannaah nih silh sih un, a chi a.

¹⁰Huleh ama’n a kawmvah, Khoi munah zong na tunna inn phot vah, hu apat na pawt masiah un umden un.

¹¹Huleh koi hizongleh ahung tunsah louh va, na thu u’zong a ngaihkhiah louh uleh hu apat na pawt chiangun amah uh heetsahna diingin na keengtaw va leivui thingkhia un. Chihtahzetin ka hung hilh ahi, Vaihawmni chiangin hu khua thuaah diing sangin Sodom leh Gommorrah thuaah chu a dan a um zaw diing, a chi a.

¹²Huin a kuandohva, Mite chu a kisiih diing uh ahi chih thu a soi uhi.

¹³Huleh dawi tampi a nohdoh va, damlou tampi thau nuh in a sudam jel uhi.

¹⁴Huleh kumpipa Herod in a tanchin ana ja a; (a min a than taah jiahin), Baptistu John misi laha kipan in ahung thou kiitta a, hujiahin sil loupite bawl theihna amah ah um in ahung kilang ahi, a chi a.

¹⁵Midangte’n, Elijah ahi, a chi va. Huleh mi dangin, zawlnei ahi, zawlneite laha khat ahi, a chi va.

¹⁶Hizongleh Herod in chu, A lu ka tansahpa John ngei ahi; misi lah apat ahung thou kiit ahi, a chi hi.

¹⁷Ajiahchu Herod in a unaupa Philip ji Herodia a kiteenpih taah jiahin Herodia jiahin mi a sawl a, John chu a mansah a, huleh amah chu kaan in suangkul aha khumta hi.

¹⁸Ajiahchu John in Herod kawmah, Na unaupa ji na kiteenpih daan ngei ahi sih, ana chi hi.

¹⁹Hujiahin Herodia in amah a mudah a, thah a ut a; hizongleh a that thei sih.

²⁰Ajiahchu Herod in John chu midihtat leh siangthoutah ahi chih a heet jiahin a lau a, a huuh veu a; a thu a jahin a lungdong a, hizongleh kipaahtahin a ngaikhe jel hi.

²¹Huleh lemtaan ni khat ahung tung a, Herod in a pi ani in a mi loupite, a sepaihliante, huleh Galili gam a mi liante a diingin jan ankuang a lui a;

²²Huin Herodia tanu ahung luut a, a laam a, Herod leh a kawma pute a kipaahsahta a, kumpipa’n nungaah naupangnu kawmah, Na deihdeih ngen in ka hung pe diing, a chi a.

²³Huleh amahnu kawmah, Na hung nget photmah, ka gam kimkhat tan in ka hung pe diing, chi'n a kichiam a.

²⁴Huin amahnu chu a pawt a, a nu kawmah, Bang ka ngen diai? a va chi a; Huleh amahnu in, Baptistu John lutang, ana chi a.

²⁵Huin amahnu chu kumpipa kawmah kintahin ahung luutpah a, Baptistu John lutang tu mahmahin kuang khat in hung pe lechin ka ut, chi'n a ngen a.

²⁶Huin kumpipa chu a lungkham mahmah a; hizongleh a kichiamnate leh, a kawma pute jiahin a nial nuam sih a.

²⁷Huleh kumpipa in a that diingin mi khat a sawlpah a, a lutang hung tawi diingin thu a pia a; huleh amah chu chiah in suangkul sungah a lutang a va tanta hi.

²⁸Huleh a lutang chu kuang khat in ahung tawi a, nungaah naupangnu a peta a; huin hu nungaah naupangnu in a nu kawmah a peta hi.

²⁹Huleh a nungjuite’n hichu a jah tahun a hung va, a luang ahung la va, haan ah a vuita uhi.

³⁰Huleh sawllehte chu Jesu kawmah ahung kikhawm va, a silbawlte zousiah uleh a thuhilhnate uh ahung hilh va.

³¹Huin ama’n a kawmvah, Nanguh chauhin hung unla, munsip ah tomkhat hung khawl phot un, a chi a; ajiahchu huah mi ahung paileh a tam jiahin an nasan a ne man sih uhi.

³²Huleh amahuh chu kuang in mun sipah a tuam chiahta va,

³³Huleh mipite’n a chiah lai uh a mu va, mi tampi in amah a he va, khopi chin a kipan keeng in ahung tai va, ana makhelh in a kawmah ahung paikhawmta uhi.

³⁴Huleh Jesu’n ahung pawtdoh in mipi nasatah a muta a, a chingtu bei belaam bang ahihjiahun a hehpih mahmah a; thu tampi a hilh panta hi.

³⁵Huin ni a vaigeih mahmah tahin a nungjuite a kawmah a hung va, Hi gamsip mun ahi a, hun laha vaigeita a;

³⁶I kimvela loute leh khuate a va chiah a, an neeh diing a kilei theihna diingun amahuh sawldoh in; neeh diing bangmah laha nei ngal sih va, a chi va.

³⁷Ama’n a dawng a, a kawmvah, Nangun neeh diing pia un, a chi a. Huin amahun a kawmah, Tanghou makhai za nih man va lei in, neeh diing ka pe diing uh maw? a chi va.

³⁸Ama’n a kawmvah, Tanghou beu bangzah na nei viai? va endih vua, a chi a. Huin amahun a neih jah uh a heet tahun, Beu ngaa leh nga nih, a chi va.

³⁹Huleh ama’n mi zousiah hampa hing tunga a lawilawi a tousah diingin thu a pia a.

⁴⁰Huin amahuh a gualgual in, za khatkhat bang, sawmngaa ngaa bangin a touta va.

⁴¹Huleh ama’n hu tanghou beu ngaa leh nga nih chu a laah zohin vaan lam a en a, a vangpiah a, tanghou te chu a balkeeh a, a ma va luisah diingin a nungjuite kawmah a pia a; huleh nga nihte zong a bawn va lahah a hawmsah suahta hi.

⁴²Huleh amahun a bawnun a ne va, a vah chiatta uhi.

⁴³Huleh tanghou neente leh nga neente chu bawm sawmlenih dimin a luaah uh.

⁴⁴Huleh tanghou nete chu mi saang ngaa vel ahi uhi.

⁴⁵Huleh ama’n mipi a hahkhiah sungin a nungjuite chu gaal lehlam a Bethsaida khua a na chiah masa diingin kuang ah a tuangsahpah a.

⁴⁶Huleh amahuh a sawlkhiah zohin haamtei diingin taang ah a chiahta hi.

⁴⁷Huleh nitaah lam ahung hihin, kuang chu diil laiah a umta a, amah chu a ngen in tual tungah a um a.

⁴⁸Huleh ama’n amahuh chu huihin a lehlamlam a, a nam jiaha kuang jap a, a mangbat uh a mu a; huleh kho vaah kuan la min amah chu diil tunga a keeng a pai in a kawmlam uh ahung zu an a, amahuh paipeel a tum a.

⁴⁹Hizongleh amah chu diil tunga keenga pai a muh un siha khat hiinte, a chi va, a kikoudoh uh.

⁵⁰Ajiahchu a bawnun amah a mu va, a buaita uhi. Huin amahuh a houpihpah a, Ha muangtah in um un; kei ka hi; lau sih un, a chi a.

⁵¹Huleh kuang ah a kawmvah a tuangdoh a; huih chu a tawpta hi. Huin amahun soi theih louh khopin limdang a sa mahmah uh.

⁵²Ajiahchu amahun tanghou silmahte bang a he nawn sih uhi, a lungtang uh ana ngon taah jiahin.

⁵³Huleh gaal lehlam a kai un, Genesaret gam a tung va, luipang ahung zu an va.

⁵⁴Huleh kuang a kipan a pawtdoh un mite’n amah ana hepah uh,

⁵⁵Hu gam sung pumpi ah a tai kimvel va, amah a um hi chih a heetna tan vah damloute a lupna un ahung zawng uhi.

⁵⁶Huleh khoneute leh, khopite leh louzau bang, khoi munah zong a luutna photah, damloute chu kotzing bangah a lumsah va, a puanmong beeh khoih theih a ngen va, huleh amah khoih pouhmah chu a dam jel uhi.