Read Simte LUKE 12 Bible Online

LUKE 12 - Simte bible

LUKE 12

¹Huchiah laia mipi simseeng louh khat leh khat kituanchil khop hiala ahung kikhop laiun, ama’n a masapenin a nungjuite kawmah, Pharisaite tol, lepchiahna lahah kiveeng un.

²Ajiahchu kilanglou diing a kikhuh bangmah a um sih a; huleh heet louh diing a kiphual zong bangmah a um sih.

³Hujiahin miala na soi photmah uh vaah ah jahin a um diing a; huleh innsung tawnga bilbula na soi uh chu innkhum vuum ah taangkou pihin a um diing hi.

⁴Huleh nanguh ka lawmte, ka hung hilh ahi, Tahsa sulumtheia, huzohchianga bangmah dang bawltheih nei nawnloute lau sih un.

⁵Hizongleh koi ahiai na lau diing uh ka hung hilh lawh diing: a thah nunga zong gawtmuna paihtheihna thuneipa amah chu lau un; ahi, ka hung hilh ahi, Amah chu lau un.

⁶Kawlgit ngaa paisa nihin a zuah veu sih viai mah? huleh a lahva khat zong Pathian ma ah mangngilh in a um sih hi.

⁷Hizongleh na lu va samzangte nasan sim veh ahi. Hujiahin lau sih un; kawlgit tampi sangin na luulzaw uhi.

⁸Ka hung hilh ahi, Koipouh mite ma a kei hung gum photmah chu mihing Tapa’n zong Pathian angelte ma ah amah a gum diing hi.

⁹Hizongleh mite ma a kei hung kiheetmohbawl chu Pathian angelte ma ah kiheetmohbawl in a um diing.

¹⁰Koipouh mihing Tapa kalha thusoi chu ngaihdam ahi diing a; hizongleh Hagau Siangthou kalha soisia chu a soisiatna ngaihdamsah ahi sih diing hi.

¹¹Huleh nanguh kikhopna innte, thukhentute, huleh houtute ma a ahung pui tah chiangun bangchia bangthuin ka dawng diai, ahihlouhleh bang ka soi diai chih lungkham sih un.

¹²Bang jiahin i chih leh Hagau Siangthou in a huntahin na soi diing uh ahung hilh diing hi, a chi hi.

¹³Huleh mihon laha khat in, a kawmah, Houtupa, ka unaupa kawmah gou hung kihoppih diingin soi in, a chi a.

¹⁴Ama’n a kawmah, Mihing, Kua’n ahiai kei na tungva vaihawmtu aha, tanhawmtu aha a hung bawl? a chi a.

¹⁵Huin ama’n a kawmvah, Pilvaang unla, eenna lahah kiveeng un; ajiahchu hauhsat mihing damsan ahi sih hi, a chi a.

¹⁶Huleh ama’n a kawmvah tehkhinthu khat a soi a, Mi hausa koi ahakhat chu a loua piang ahung pung mahmahta a.

¹⁷Huchi'n a lungsim in a kingaihtuah a, Ka buh le baal koihna diing lah ka nei sih a, bang loh diing ka diai? a chi a.

¹⁸Huin, Hikhu ka bawl diing, ka buh innte ka phel diing a, a lianzaw ka lam diing; huleh huah ka buh leh baalte leh ka thuampua zousiah ka koih diing;

¹⁹Huleh ka hagau kawmah, Hagau, kum tampi sunga diing thuampua tampi na neita a; kitawlnga inla, ne in, dawn in, huleh nuamtahin um in, ka chi diing, a chi a.

²⁰Hizongleh Pathian in a kawmah, Nang mingol, tujan leh na hinna hung kilaahsah diing ahi; hu na sil kholkhawmte koi a diing ahita diai? a chi a.

²¹Amah chauh diing a gou kikhol a, Pathian lama hausa lou chu huchi ahi veu hi, a chi hi.

²²Huin ama’n a nungjuite kawmah, Hujiahin ka hung hilh ahi, Bang ahiai ka neeh diing, chi'n na hinna diing uleh; bang ahiai ka silh diing, chi'n na tahsa diingun lungkham sih un.

²³Hinna chu neeh diing sangin a thupi zaw a, huleh tahsa zong puansilh sangin a thupi zaw hi.

²⁴Va'aahte ngaihtuahun, buh lah a tuh sih va, aat zong a aat sih uh; buhpang leh buhinn zong a nei sih uh; himahleh Pathian in amahuh a vaah hi; nanguh vate sanga bangchituha hoihzaw na hita viai mah?

²⁵Huleh na lahva kua’n ahiai lungkham jiaha, a din tongkhata behlap thei?

²⁶Huchia nangun hu sil neupa tawp bawn na bawl theih louh uleh bang diinga a dangte lungkhampih na hi viai?

²⁷Lili paahte khandan ngaihtuah un; nna a tong sih va, pat a kheeh sih uh; himahleh ka hung hilh ahi, Solomon zong a loupina zousiaha a kijepin hi lili paahte laha khat banga jep in a um sih hi.

²⁸Huchia gam a hampa tunia hing a, a jing a meikhuuh a paih mai diing bawn Pathian in huchituh a, a jep inchu, Aw nanguh ginna tawmte, bangchituha nanguh silhsaha um diing na hita viai mah?

²⁹Huleh na neeh diing uh aha, na dawn diing uh aha hawl sih un; ginlahna lungsim nei in zong um sih un.

³⁰Ajiahchu khovela namte’n hihaw zousiah a hawl uh; huleh na Pa un hi silte na mamoh uh chih a he hi.

³¹Hizongleh nangun chu Pathian gam hawl zaw un; huchi'n hi silte ahung kipiahbeh diing hi.

³²Pawl tawmte, lau sih un; bang jiahin i chih leh na kawmva lalgam piah chu na Pa uh kipaahna zawngtah ahi.

³³Na neih pouh uh zuah unla, migentheite kawmah pia un; vaan ah guta chiah louhna leh, leikha neehsiat louhna ah, dangka ip lui thei lou leh gou sethei lou kikhol zaw un.

³⁴Ajiahchu na gou uh umna photah na lungtang u’zong a um diing hi.

³⁵Na kawng uh gaah unla, na thaumei u’zong kuang sah zing un.

³⁶Mi a pu kiteenna ankuang luina apat a hung pai a kotkhaah ahung kiuh tah chianga na honsahpah thei diing a na ngaah zing bangin um un.

³⁷A pu uh a hung tahchianga amah na ngaah zinga a muh suaahte a hampha uhi; chihtahzetin ka hung hilh ahi, a kawng a gaah diing a, amahuh chu ankuang ah a tousah diing a, a neeh uh a bawlsahta diing.

³⁸Huleh jan khang laiin ahiai, jingthoh in ahiai hungleh, huchibanga ahung muh in chu, hu suaahte chu a hampha uhi.

³⁹Hichu he un, guta hung diing hun inn neitu in he henla hileh a veeng diing a, a inn a suvangsah sih diing.

⁴⁰Hujiahin nanguh zong kiging zingin um un; ajiahchu na ngaihtuah louh laitah va mihing Tapa chu hung diing ahi, a chi a.

⁴¹Huin Peter in a kawmah, Lalpa, hi tehkhinthu hi keiuh kawm chauh a na soi ahiai, ahihlouhleh mi zousiah kawm a zong? a chi a.

⁴²Lalpa’n, Sumkoltu ginum leh piltah, a pu in a hunchina a an tan diing uh hawmsah diing a, a innkuanpihte tunga houtu a, a siam diing chu koipen ahi diai?

⁴³A pu ahung pai chianga huchibang bawl a ahung muh hu suaah chu a hampha hi.

⁴⁴Dihtahin ka hung hilh ahi, Amah chu a neih zousiah tunga thuneitu in a siam diing hi.

⁴⁵Hizongleh hu suaahpa’n a lungsim in, Ka pu hungzoh lou diing hita, chi'n a suaah numei leh pasalte na jep in, huleh ne a dawnin na kham taleh;

⁴⁶Hu suaahpa pu chu a gintaat louh ni khat in a heet louh kalin ahung diing a, tum nih a suah diing a, ginglou mite tan bang a tangsah diing hi.

⁴⁷Huleh suaah a pu deihzawng he ngal a ana kiginglou leh a deihzawng banga bawl lou chu tampivei vuaah ahi diing.

⁴⁸Hizongleh he lou a, vuaahna taah hial sil bawltu chu tawmtakhat vei vuaah ahi diing Ajiahchu koipouh tampi kipiahna kawmah tampi a kiphuut diing a, huleh mi’n tampi a kolsah uh kawmah a tamzosem a phuut diing uhi.

⁴⁹Leitung a mei khesuh diing a hung ka hi; tuin zong kaangpanta leh chi hina'ng e!

⁵⁰Hizongleh baptisma tan diing khat ka nei hi, hu ka taangtun masiah ka ngaih muanglou hina e!

⁵¹Lei tunga lemna leengsah diing a hung hungsa na hi viai mah? Hilou hial, ka hung hilh ahi, kikhenna umsah diing a hung ka hi zaw hi.

⁵²Ajiahchu tu a kipanin innsung khat a mi ngaa um chu nih langah thum, huleh thum langah nih pangin a kikhen diing uh.

⁵³Pa in tapa, huleh tapain pa; nuin tanu, huleh tanuin nu; innpinuin a mounu, huleh mounuin a innpinu a dou diing, a chi a.

⁵⁴Huleh ama’n mipite kawmah zong, Nangun nitumna lama mei hung kai na muh chiangun guah zu diing ahi na chipah ngal va; huleh huchi'n ahung um ngei a.

⁵⁵Huleh sim huih hung nung na heet chiangun khua lum diing ahi na chi va, huchi'n ahung lum ngei hi.

⁵⁶Nanguh milepchiahte Aw, vaan leh lei umzia lah na hesiam va, bang diinga tulai hun umzia hesiam lou na hi viai?

⁵⁷Huleh bang diinga nangun bang dih ahiai chih ngaihtuahlou na hi viai?

⁵⁸Thukhentu ma a na langpa toh na chiah chiangin lamkal ah amah apat suahtaatna diing hawl haamhaam in; huchilouin chu vaihawmtu ma ah ahung tut diing a, vaihawmtuin miman houtu kawmah ahung pekhe diing a, huleh miman houtuin suangkul ah ahung khumkha diing hi.

⁵⁹Ka hung hilh ahi, paisa san khat tan a na dit bei keei masiah hu apatin na pawt hial sih diing hi, a chi hi.