Read Simte LUKE 13 Bible Online

LUKE 13 - Simte bible

LUKE 13

¹Huchih hun laiin, Galili gam a mite Pilat in a thah a, a sisan uh Pathian biahna sa toh a halkhawmsah uh thu a kawma hung hilh mi hunkhop a um va.

²Jesu’n a dawng a, a kawmvah, Huchibang silte a thuaah jiahun hu Galilimite chu Galili gam a mite zousiah sanga sual diahkhola ngaihtuah na hi viai mah?

³Ka hung hilh ahi, Hilou e; nanguh zong na kisiih louh unchu huchibang mahin na mangthai veh diing uh, a chi a.

⁴Ahihlouhleh Siloam innsaang in a puuhkhum a, a netlup mi sawmlegiatte zong Jerusalem khua a um zousiah sanga misual diahkhol hia ngaituah na hi viai mah?

⁵Ka hung hilh ahi, Hilou e; Nanguh zong na kisiih louh unchu huchibang mahin na mangthai veh diing uhi, a chi hi.

⁶Ama’n hi tehkhinthu zong a soi a; Mi koiaha in a grep huanah theipi kung suan khat a nei a; huleh a gah ahung hawl a, khat zong a mu sih a;

⁷Huin ama’n grep hu an enkoltu kawmah, Ngai in, kum thum sung hi theipi kungah a gah ka hung hawl a, khat zong ka mu sih; phuuh mai in, bang diinga mun luaha um zing ahiai? a chi a.

⁸Ama’n a dawng a, a kawmah, Lalpa, tukum zong umsah nalai in, a kiimkot in ka tou diing a, bawng-eeh in ka phungvuh diing;

⁹Ahung gah taah leh a pha ahi diing a; ahung gah louha ahihleh huchian na phuuh na diing, a chi hi.

¹⁰Huleh ama’n khawlni in kikhopna inn khat ah thu a hilh a.

¹¹Huleh ngai in, kum sawmlegiat haat louhna dawi in a mat numei khat a um a, a ngum a kuul khiukheu a, huleh a dingtang thei himhim sih hi.

¹²Jesu’n amah a muh tahin a kou a, a kawmah, Numei, na haatlouhna apat hahkhiah na hita, a chi a.

¹³Huleh a tungah a khut a koih a; huchi'n amahnu chu thakhat in ahung tangpah a; Pathian a paahtawita hi.

¹⁴Huin khawlnia Jesu’n mi a suhdam jiahin kikhopna inn houtu chu a lungthah a, mipite kawmah, Mihing natohna diing ni guup um hilou ahiai mah; hu sungin hung unla, hung kisudamsahta un, khawlni a hilouin, a chi a.

¹⁵Huphetin Lalpa’n amah a dawng a, Nang milepchiah, khawlni in na bawng uh aha, na sabiltung uh aha, a khihna apat suut in tui dawnsah diingin na puikhe veu uh hilou ahiai mah?

¹⁶Hi numei Abraham tanu ahih toh, ngai in, Setan in kum sawmlegiat sunga mat chu khawlni a, a gaahna suutsah louh diing ahiai mah? a chi a.

¹⁷Huleh ama’n hi thute a soi tahin a meelmate zousiah chu a zumta va; mipite chu a sil loupi bawl zousiah jiahin a kipaah chiat uhi.

¹⁸Huin ama’n, Pathian gam chu bang tobang ahiai? huleh bangtoh tehkhin diing ka hiai?

¹⁹Hichu mi’n ankam tang khat a laah a, a huana a paihluut bang ahi; huchu ahung pou a, a khang a, sing lianpi ahung hi a, huleh tungleeng vate’n a bate giahna’n a nei uh, a chi a.

²⁰Huleh Pathian gam chu bangtoh tehkhin diing ka diai? a chi kiit a.

²¹Hichu tol, numei in a laah a, tehna thum dim an laha, a bawna a thoh veh masiah a phuum bang ahi, a chi hi.

²²Huleh ama’n thuhilh kawmin Jerusalem lam zuanin khopi leh khoneu tawn jelin a chiah a.

²³Huin mi khat in a kawmah, Lalpa, hutdama um diingte tawmtakhat hi u'maw? a chi a. Ama’n a kawmvah,

²⁴Kot jim ah luut tum teitei un; ajiahchu ka hung hilh ahi, mi tampi’n luut a tum diing a, a luut thei sih diing uh;

²⁵Inn neitu khatvei a thoh a, kot a khaah tah chian, nanguh innpua a dingin, Lalpa, Lalpa, kot hung honin, chia kot na kiuh chiangun, ama’n na kawmvah, Khoilam mi na hi viai, ka hung he ngei sih, chi'n ahung dawng diing.

²⁶Hutah chian nangun, Na ma ah ka ne un, ka dawn va, huleh ka kotzing vah thu na hilh hi, na chi diing uh;

²⁷Hizongleh ama’n, Ka hung hilh ahi, khoilam mi na hi viai mah ka hung he sih; nanguh sil gilou bawlte zousiah, ka kawm apat paimang un, ahung chi diing.

²⁸Abraham leh, Isaak leh, Jakob leh zawlneite zousiah Pathian gam a um na muh va, nanguh polama paikhiah a um na hih uh na hung kiheet chiangun huah kah leh hagawi a um diing.

²⁹Huleh suahlam leh, tumlam leh, simlam leh maallam apat in mi ahung diing va, Pathian gam ah a tou diing uhi.

³⁰Huleh ngai un, a nunung pente a masa pena pang diing a um va, huleh a masa pente zong a nunung pena pang diing a um uhi, a chi a.

³¹Hu ni mahin Pharisai koite aha a hung va, a kawmah, Pawt inla, hi mun apat chiahmang in; ajiahchu Herod in thah hung tum ahi, a chi va.

³²Ama’n a kawmvah, Chiah unla, hu si-aal kawmah hi thu va soi un, Ngai in, tuni leh jingchiang dawite nohdoh in natnate sudam in ni thum niin ka zou diing hi.

³³Bang hitaleh tuni toh, jingchiang toh, a jing kiit toh ka pai jel diing hi; ajiahchu Jerusalem khua lou ah zawlnei sih ngeina hilou ahi, a chi hi.

³⁴Aw Jerusalem, Jerusalem! zawlneite that leh nang kawma hung kisawlte suang a na seplum; aahpi’n a noute a hanuaia a opkhum bangin bangzah vei na tate opkhum ka tum a, hizongleh na ut sih uh.

³⁵Ngai un, na inn uh a hawm a nuutsiatsah in a umta hi; huleh chihtahzetin ka hung hilh ahi, Lalpa min a hung pai chu a hampha hi na chih masiah uh na hung mu sih diing uh, a chi hi.