Read Simte LUKE 14 Bible Online

LUKE 14 - Simte bible

LUKE 14

¹Huleh hichi ahung hi a, khawlni a Pharisai houtu khat inn a an ne diing a, a chiah in a enkhia va.

²Huleh ngai in, a ma ah chipawma damlou mi khat a um a.

³Jesu’n daanhete leh Pharisaite a houpih a, a kawmvah, Khawlni in suhdam siang ahiai, siang lou? a chi a.

⁴Amah u’chu a sip chiat va, huin ama’n damlou chu a tu a, a sudama, a chiahsahta hi.

⁵Huin a kawmvah, Na lahva kua’n ahiai na sabiltung uh aha, na bawngtal uh aha kokhuuh ah ke taleh, khawlni a zong kaidoh lou diing? a chi a.

⁶Huleh amahun hi thute a dawng thei kiitta sih uhi.

⁷Huleh a mi kouhte un mun saangpen a teel veu uh a mu a, a kawmvah tehkhinthu a soi a;

⁸Kiteenna a koiaha in ahung kouh chiangin touna saangpen ah tou sih un; huchilou inchu nang sanga mi zahtaathuai zaw ana koukha diing a;

⁹Nang hung koutu leh amah chu na kawma hungin, Hipa touna diing ot in; ahung chi diing a; nang chu zum tahin mun hoihlou penah na va toupan phiing diing hi.

¹⁰Hizongleh ahung kikouh chiangin chiah inla mun hoihloupenah va tou zaw in; huchi'n ahung koutu ahung chiangin na kawmah, Lawm, a saang deuh ah hung tou in, ahung chi thei diing a; hutahchian na an neehpihte ma ngeiah zahbawl in na um diing hi.

¹¹Ajiahchu koipouh amah kingaisang chu a ngiam diing a; huleh amah kingaingiam chu tawisang in a um diing, a chi a.

¹²Huin ama’n a chialtupa kawmah zong, Suun ankuang aha, jan ankuang aha na lui chiangin, na lawmte, na unaute, na sanggamte, huleh na innveeng mihausate zong kou sin; huchilou inchu amahun zong ahung kouve diing va ahung thuh kha diing uh.

¹³Hizongleh ankuang na lui chiangin, tagahte, piangsualte, keengbaite, huleh mittawte kou zaw in.

¹⁴Huchi'n na hampha diing hi; ajiahchu amahun ahung thuh zou sih diing va; midihtatte thohkiit chiangin thuh in na um diing hi, a chi hi.

¹⁵Huleh a an neehpihte khat in hi thute a jahin a kawmah, Pathian gam a an ne diing chu a hampha hi, a chi a.

¹⁶Huin ama’n a kawmah, Mi koi ahakhat in ankuang luina loupitah a bawl a, mi tampi a kou a;

¹⁷Huleh a neeh hunin a mi chialte kawma, Hungun, tuin bangkim a kimanta, va chi diingin a suaahpa a sawl a.

¹⁸Huleh amahun kithugualin suanlam a nei chiat va A masapenin a kawmah, Lou ka leita a, a en diing a ka chiah a kiphamoh hi; na hung ngaihsiam ka hung ngen hi, a chi a.

¹⁹A dangin, Bawngtal tuah ngaa ka leita a, a siat a phat en diing a ka chiah a kiphamoh hi; na hung ngaihsiam ka hung ngen hi, a chi a.

²⁰Huleh a dang khat in, ji ka neita a, hujiahin ka hung thei sih hi, a chi a.

²¹Huchi'n hu suaahpa chu a hung a, hu thute a pu ahung hilh a. Huin hu inn neipa chu lungthah in a suaahpa kawmah, Kotzing leh kawmkalah kintahin chiah inla, tagahte, piangsualte, mittawte huleh keengbaite hitah ah hung puiluut in, a chi a.

²²A suaahpa’n, Pu, na hung thupiah bangin ka bawl zouta a, himahleh mun a awng nalai hi, a chi, a.

²³Huin a pu in a suaahpa kawmah, Lamlian leh daaiah chiahdoh inla, ka inn a dim theihna diingin mi hung zawl luut haamhaam in,

²⁴Ajiahchu ka hung hilh ahi, Ka mi kouhte khatmah in zong ka ankuang lui a chiam sih diing uh, a chi hi.

²⁵Huleh mipi nasatahin amah a tonpih va; huleh amah chu a kinunghei a, a kawmvah,

²⁶Mi koipouh ka kawma hungin, a pa, a nu, a ji, a tate, a unaupa, a sanggamnu huleh amah hinna nasan a huat louhleh ka nungjui ahi thei sih diing,

²⁷Huleh koipouh amah kros kipuaah a hung jui lou chu ka nungjui ahi thei sih diing hi.

²⁸Nanguh koipouh innsaang lam tum in a lam zohna diing a neih leh neih louh heetna diing a tou masa phot a, a luut diing zah hisaap bawl lou diing koi na um viai?

²⁹Huchilou inchu innbul a lepzoh nungin lamzou theita sih leh a mu zousiah in nuihsan in,

³⁰Hipa’n inn a lampan ngal a, a zou theita sih, a chikha diing uh.

³¹Ahihlouhleh kumpipa koi ahiai kumpipa dang dou diing a kuan diingin, tou masa phot a, amah dou diing a mi siing nih toh hung kuanpa chu mi siing khat toh a tuaah ngam diing leh ngam louh diing ngaihtuah masa lou diing?

³²Ahih louh vanglahleh, a dang pen gamla pia a um laiin Kilemna thuchiam ngen diingin palai a sawl diing hi.

³³Huchimahbangin nanguh lahah koipouh a neih zousiah paisan lou chu ka nungjui ahithei sih diing hi.

³⁴Chi chu a hoih hi; ahiin chi da zouta leh bangin a kisualta diai?

³⁵Leia di’n laha hoih sih diing a, eehneel diingin zong a hoih boh sih diing; mi’n a paaidoh jo veu uhi. Koipouh jahna diing a bil nei in ja heh, a chi hi.