Read Simte LUKE 15 Bible Online

LUKE 15 - Simte bible

LUKE 15

¹Huin siahdongtute leh misualte zousiah a thu ngaikhe diingin Bang diinga ahung zu an va.

²Pharisaite leh lehkhagialtute’n, Hipa’n misualte a kipawlpih a, an bang a neeh khawmpih, chi'n a phunchiah va,

³Huin ama’n hi tehkhinthu a kawmvah a soi a,

⁴Nanguh laha mi koiaha in belaam za nei henla, a laha khat mangsah leh, sawmkuaah leh kuaahte gamdaia nusia a, a mangpen a muh masiah va hawl lou diing koi na hi viai?

⁵Huleh a muh kiit tahin kipaahtahin a liangkou ah a pua a,

⁶Inn a tunin a lawmte leh a innveengte a kou khawma a kawmvah, Hung kipaahpih un; ajiahchu ka belaam mang ka mu kiitta hi, a chi ahi.

⁷Ka hung hilh ahi, Huchimahbangin midih kisiihna tuan diing nei lou sawmkuaah leh kuaahte tungah sangin misual khat kisiih tungah vaan ah kipaahna a lianzaw diing.

⁸Huleh numei koi ahiai dangka sawm nei in khat mangsah leh, thaumei de a, inn phiat a, huleh a muh kiit masiah nguntaha hawl lou diing um?

⁹Huleh a muh kiit chiangin a lawmte leh a innveengte a koukhawm a, Hung kipaahpih un; ajiahchu ka dangka mansah ka mu kiitta hi, a chi hi.

¹⁰Ka hung hilh ahi, Huchimahbangin Pathian angelte ma ah misual kisiih khat tungah kipaahna a um hi.

¹¹Huleh ama’n, Mi koiahakhat in tapa nih a nei a;

¹²A lahva a naupangzaw pa’n a pa kawmah, Pa, gou kei tan diing teng hung pia in, a chi a. Huchi'n a pa’n a sum chu amahuh a hawmsahta a.

¹³Huleh ni sawtlou nungin tapa naupangzaw pa’n a tan a bawnin a lakhawm a, khual gamlapi ah a zinta a, huleh hu munah a neih teng pahtattahin a va zang zoupahta hi.

¹⁴Huleh a bawna a zatbei veh tahin hu gam ah kial nasatah ahung tungta a; neeh diing ahung kitasamta a.

¹⁵Huleh amah chu a chiah a, hu gam mi khat a va beelta a; ama’n amah chu voh an pe diingin lou lamah ana sawl a;

¹⁶Huleh vohte neeh bangkhat hawngte a, a gil suhvah a ut mahmah a; koima’n lah bangmah a pe sih hi.

¹⁷Huleh ahung halh tahin, Ka pa kawma kiloh suaahte an neeh seeng louh a nei a tamtam u’toh, keilah gilkial a si diing himai veengin!

¹⁸Ka thou diing a, ka pa kawmah ka chiah diing a, a kawmah, Pa, vaan a tungah leh nangmah mitmuh in sil ka bawl sualta;

¹⁹Na tapa chih taah zong ka hi nawn sih; na kawma kiloh na suaahte khat bangin hung bawl in, ka chi diing, a chi a.

²⁰Huin a thou a, a pa kawmah a hungta a. Huleh gamlapi a, a um laiin a pa’n ana mu a, a hehpih mahmah a, a tai a, a ngawngkawi a, huleh a tawpta a.

²¹Huin a tapa’n a kawmah, Pa, vaan a tungah leh nangmah mitmuh in sil ka bawl sualta; na tapa chihtaah zong ka hi nawn sih, a chi a.

²²Hizongleh a pa’n chu a suaahte kawmah, Pu an hoihpen hung ladoh unla silhsah un; a khut ah zungbuh butsah unla, a keengah keengtophah butsah un.

²³Huleh bawngnou thautah hung la unla, that un; huchi'n i ne diing a, kipaahtahin i um diing uh;

²⁴Ajiahchu hi ka tapa chu a si a, ahung hing kiitta hi; a mang a, a kimu kiitta ahi, a chi a. Huchi'n kipaahtah in a umta uhi.

²⁵Huleh a tapa upazaw chu lou ah a um a; Inn ahung tunkuanin sil tumging leh laam thawm a jata a.

²⁶Huin a suaahte khat a kou a, Hite bang ata’i leh? chi'n a dong a.

²⁷Amahpa’n a kawmah, Na naupa ahung tung a, dam leh hoih a, a muh kiit jiahin na pa’n bawngnou thautah a that ahi, a chi a.

²⁸Huin amah chu a lungthahta a, a luut nuamta sih a; Hujiahin a pa chu ahung pawt a, ahung zawl a.

²⁹Huin ama’n a dawng a, a pa kawmah, Ngai in, kum hizaatpi hung vaah inga, khatvei mah zong na thupiah juikhial lou inga; huchi'n zong ka lawmte toh nop ka bawl na diingin keelnou khat zong na hung pe ngei sih.

³⁰Hizongleh hi na tapa, nohchizuahte kawma na sum teng va zang zouvehpa ahung tun tahin amah diingin bawngnou thautah na gohsahpah hi, a chi a.

³¹Huin a pa’n a kawmah, Tapa, nang ka kawma um zing na hi a, ka neih zousiah zong nanga ahi.

³²Kipaahtah leh nuamtah a i um diing hilou maw? ajiahchu hi na naupa a si a, ahung hing kiitta hi; a manga, i mu kiitta hi, a chi a.