Read Simte LUKE 16 Bible Online

LUKE 16 - Simte bible

LUKE 16

¹Huleh ama’n a nungjuite kawmah hi thu zong a soi a, Mi hausa koiaha in sumkoltu khat a nei a; amahpa’n a sum a mawh thangjatsah chi'n a kawmah a heeh va.

²Huin amah chu a kou a a kawmah, Na tung thu ka jah hi bangchi ahiai? na sumkol hisaap hung pia in; ajiahchu tukalsiah sumkola pang nawn lou diing na hi, a chi a.

³Huin sumkoltupa’n a lungsim in, Bang chi diing kata’i? ka pu in lah ka sumkol hung tawpsah diing ahita a; lei toh lah peih lou ing a; khutdoh diing lah zum inga.

⁴Sumkol ahung tawpsah chianga a inn va ahung umsah theihna diingun ka bawldan diing ka he ta, a chi a.

⁵Huchi'n a pu sumbate chu a kou chiat a, a masapen kawmah, Ka pu a bangzah ahiai na bat? a chi a.

⁶Ama’n, Thau tehna zakhat, a chi a. Huin ama’n a kawmah, Na lehkha la inla, tou kin inla, sawmngaa gial in, a chi a.

⁷Huleh a dong khat kawmah, Nang bangzah ahiai na bat? a chi a. Ama’n, Buh tehna zakhat, a chi a. Huin ama’n, Na lehkha la inla, sawmgiat gial in, a chi a.

⁸Hu sumkoltu dihtatlou chu a pu in a lemtheih jiahin a phatta hi; ajiahchu vaah tate sangin hi khovel tate hi a tulai thu vah a pilzaw uhi.

⁹Ka hung hilh ahi, Dihtatlouhna sum in na lawm diing uh kibawl un; hu a manthai hun chianga kumtuanga umna a nanguh ahung umsah theihna diingun.

¹⁰Koipouh tawmtakhat tunga ginum chu tampi tungah zong a ginum ahi; huleh koipouh tawmtakhat tunga ginum lou chu tampi tunga zong a ginum sih hi.

¹¹Hujiahin dihtat louhna sum tunga bawn na ginum louh uleh kua’n ahiai nanguh sum tah hung kolsah diing?

¹²Huleh midang a tunga bawn na ginum louh uleh, kua’n ahiai nanguh a tah hung pe diing?

¹³Suaah khat in houtu nih nna a tongkop thei sih; bang jiahin i chihleh khat huain khat a lungsiat diing a; ahihlouhleh khat gum in khat a musit diing hi. Pathian nna leh sum nna na tong kop thei sih diing uh, a chi a.

¹⁴Huleh sum ngaina Pharisaite’n zong hi thu zousiah a ja va, amah a nuihsan va.

¹⁵Ama'n a kawmvah, Mite mitmuha siamtan tumte na hi uh; hizongleh Pathian in na lungtang uh a he hi; ajiahchu mihing laha paahtawia um chu Pathian mitmuh in sil kihdah huaitah ahi.

¹⁶Daan leh zawlneite thu John hung um tanchiang a um a; hu kalsiah chu Pathian gam tanchinpha a kisoi a, huleh mi chinin huah pawng luut haam a sawm uhi.

¹⁷Huleh daan thu neutakhat a man sangin vaan leh lei a bei a baihlamzaw hi.

¹⁸Koipouh a ji khul a, a dang kiteenpih chu aangkawm ahi; huleh koipouh a pasal in a khulsa kiteenpih chu aangkawm ahi.

¹⁹Mi hausa koiaha a um a, puan sandup leh puan malngaat a silh a, ni chinin nuamsatahin a um a.

²⁰Huleh a min Lazar kichi a pumtanga meima a dim a kotkhaah bula a lupsah veu uh khutdoh khat a um a.

²¹Mi hausapa dohkaan apat khateneng kia pouh neeh vah a ut a; hulou zong uite a hung a, a meimate a liaahsah veu uhi.

²²Huleh hichi ahung hi a, hu khutdohpa chu a si a, angelte’n Abraham aangsungah a pui va; huleh mi hausapa zong a si a, vui in a umta a.

²³Huleh gawtmun ah gimthuaah in a um a, a daahtou a, gamlapi-a Abraham leh a aangsunga Lazar um chu a muta a.

²⁴Huin a kikou a, Pa, Abraham hung khotuah inla, Lazar chu a khutzung muuh tuia diahkawta ka lei hung suvot diingin hung sawl in; ajiahchu hi mei kuang ah ka gim mahmah hi, a chi a.

²⁵Hizongleh Abraham in, Tapa, nangma’n na dam laiin sil hoihte na kimuh a, huchibangin Lazar in sil hoihloute a mu chih geeldoh in; hizongleh tu’n chu amah hamuanin a um a, nang gimthuaahsah in na um ahi,

²⁶Huleh hite lou zong, kei uleh nanguh kikalah guam nasatah siamin a um hi; hilama kipana na kawmva hung tumte ahung theih louhna diingun; huleh hulama kipana keiuh kawma hung tumte ahung theih louhna diingun, a chi a.

²⁷Huin ama’n, Ahihleh, pa, amah chu ka pa inn a sawl diingin ka hung ngen hi.

²⁸Ajiahchu unaupasal ngaa ka neia, amahuh va hilh leh; huchilou inchu amah u’zong hi gimthuaahna munah a hungkha diing uh, a chi a.

²⁹Abraham in a kawmah, Amahun Mosi leh zawlneite a nei uh; hute thu ngaikhia u’heh, a chi a.

³⁰Huin ama’n, Hilou e, pa Abraham, misi laha mi khat a kawmvah va chiah leh a kisiih diing uh, a chi a.

³¹Ama’n a kawmah, Mosi leh zawlneite thu a ngaihkhiah nuam louh uleh misi lah apat mi khat thou kiit mah zongleh a tahsang tuan sih diing uhi, a chi a.