Read Simte LUKE 17 Bible Online

LUKE 17 - Simte bible

LUKE 17

¹Huin ama’n a nungjuite kawmah, Puuhnate um lou thei ahi sih; hizongleh puuhna umsahtu tung a gih hi!

²Hi mineute laha khat zong a suhpuuh sangin a ngawng ah buh gawi zanna suang ohsah in tuilianpi ah kipaailuut leh amah diingin a hoihzaw diing hi.

³Pilvaang un; na unaupa’n na tunga sil a bawlsual leh tai in; huleh a kisiih leh ngaidam in.

⁴Ni khat sunga na tunga sagih vei sil a bawlsuala sagih vei na kawma ka kisiih hi chi-a nang lama ahung kiheikiitleh na ngaihdam diing ahi, a chi a.

⁵Huin sawllehte’n Lalpa kawmah, Ka ginna uh khang sah in, a chi va.

⁶Lalpa’n, Ankam tang khat bang ginna na neih uleh hi singtheimin kung kawmah, Na kibotdoh inla tuilianpi ah na kisuanin, na chi diing va, na thu uh a mang diing hi;

⁷Nang u laha koi na hi viai loukai aha, belaam ching aha suaah khat neia, lou apat ahung hun chianga, An va uumpah aw, ana chi diing?

⁸Ka neeh diing hung bawlsah inla, na tai gaah inla, ka neeh a ka dawn zoh masiah hung jenin; huzohchiang in nang nein na dawn diing, chizaw lou diing ahiai mah?

⁹Ama’n hu suaahpa chu a kawma thu kipia banga a bawl jiahin a paahta eimah? Ka gingta sih.

¹⁰Huchimah bangin nangun zong na kawmva thupiah zousiah na bawlzoh chiangun, Suaah phatuam lou ka hi uh; ka bawl diing mawnguh ahi ka bawl uh, chi un, a chi a.

¹¹Huleh hichi ahung hi a, Jerusalem zuana a chiahin Samaria, leh Galili gamgi jul a tawn peh a;

¹²Huleh khua khata a luut leh phaah sawm in ana lamtuah va, amahuh chu gamlapi ah a ding va;

¹³Huleh aw ngaihtahin a kikou va, Jesu, Houtupa, Hung khotuah in, a chi va.

¹⁴Huleh amahuh a muh tahin ama’n a kawmvah, Chiah unla, siampute va kiensah un, a chi a. Huleh hichi ahung hi a, a chiah laiun ahung siangthouta uhi.

¹⁵Huleh a lahva khat in a damta chih ahung kiheet tahin a kihkiita, aw ngaihtahin Pathian a paahtawi a,

¹⁶Jesu keeng bulah a bohkhup a, kipaahthu a soi hi; huleh amah chu Samarimi ahi.

¹⁷Huin Jesu’n a dawng a, Sawm hilou maw suhsiangthoua um? Himahleh kuaahte khoia umta?

¹⁸Hi meelheet louhpa chih louh Pathian paahtawi diing a hung kihkiit kuamah a kimu sih a, a chi a.

¹⁹Huin ama’n a kawmah, Thou inla, chiahta in; na ginna in ahung damsahta hi, a chi a.

²⁰Huleh Pharisaite’n Pathian gam hung tun hun diing a dot uleh ama’n a dawng a, a kawmvah, Pathian gam chu muhtheih in ahung tung sih;

²¹Huleh, En un, hitah ah, ahihlouhleh en un hutah ah, zong a chi sih diing uh: bang jiahin i chih leh ngai un, Pathian gam chu na lahvah a um hi, a chi a.

²²Huin ama’n a nungjuite kawmah, Mihing Tapa damlai nite ni khat beeh mu nuam mahmah ngal a, na muh theih louh hun uh ahung tung diing.

²³Huchian na kawmvah, En un hitah ah; ahihlouhleh en un hutah ah, ahung chi diing va; chiah sih unla, a nung uh zong jui sih un.

²⁴Ajiahchu kawlphe vaan nuai langkhata a pheta, vaan nuai lehlam tanpha a salhvaah mahbangin mihing Tapa zong ahung niin ahi diing.

²⁵Hizongleh hu ma in sil tampi a thuaah diing a, tulai khang thahte deih louh in a um diing hi.

²⁶Noah damlaia sil umdan bangin mihing Tapa hungkiit ni chiangin zong ahi diing hi.

²⁷Noah kuang a a luut a, tuijiin ahung tunga, a bawnva a suhlup ni a tun masiah a neun, a dawn va, ji a nei va, huleh ji leh ta in a kipetuah uh.

²⁸Huchimah bangin Lot damlaiin zong a um a; a ne un a dawn va, a lei un a zuah va; huleh a suan va, a lam uh;

²⁹Hizongleh Sodom khua apat Lot a pawt niin vaan apatin mei leh kaat a zu a, a bawnun a sulumta hi.

³⁰Huchimah bangin mihing Tapa hung kilaah ni chiangin ahi diing hi.

³¹Hu ni chian koipouh inn tunga um chu inn sunga a thuampua la diingin kum sih heh; huleh huchimahbangin koipouh loua um zong hung kihkiit sih heh.

³²Lot ji he zing un.

³³Mi koipouh a hinna humbitna hawlin a taan diing a; huleh koipouh a hinna taanin a humbit diing uhi.

³⁴Ka hung hilh ahi, hu janin lupna khatah mi nih a lum diing a, khat laahmang in a um diing a, khat nuutsiat in a um diing.

³⁵Numei nih buh gawijan in a um diing a; khat laahmang in a um diing a, khat nuutsiat in a um diing.

³⁶Lou ah mi nih a um diing va; khat chu laahmang in a um diing a, khat chu nuutsiat in a um diing, a chi a.

³⁷Huin amahun a dawng va, a kawmah, Khoiah e, Lalpa? a chi va. Ama’n a kawmvah, Saluang umna photah musa nete zong a umkhawm diing uh, a chi a.