Read Simte LUKE 18 Bible Online

LUKE 18 - Simte bible

LUKE 18

¹Huleh ama’n mihingte’n lungke loua a haamtei zing diing uh ahi chih heetna diingin a kawmvah tehkhinthu khat a soi a;

²Khopi khatah Pathian lau lou, huleh mihing zong bangmah a sim lou vaihawmtu khat a um a.

³Huleh hu khosungah meithai khatmah a um a; amahnu chu a kawma hungin, Ka langpa tungah phuba hung laahsah in, ahung chi a.

⁴Huleh amah chu tomkhat sunga ut sih a; hizongleh a nungin a lungsim in, Pathian lau louin mihing bangmahin sim sih mahleng,

⁵Hi meithainu’n ahung suhbuai jiahin a phuba ka laahsah diing; huchilou inchu ahung thithena in ahung sutawlkha diing, a chi a.

⁶Huleh Lalpa’n, Vaihawmtu dihtatlou thusoi chu ngai un.

⁷A tungvah jaidoh sawt zong mahleh a miteelte, suun leh jana amah koutute phuba chu Pathian in laahsah lou diing ahiai mah?

⁸Ka hung hilh ahi, ama’n a phuba uh a laahsahpah diing hi. Hizongleh mihing Tapa ahung chiangin leitung ah ginna ahung mu na diai? a chi a.

⁹Huleh ama’n mi amahuh midihtat a kingaihtuaha midangte musit koite aha kawmah hi tehkhinthu a soi a.

¹⁰Mi nih Pathian biahinn ah haamtei diingin a chiahtou va; khat chu Pharisai ahi a, huleh khat chu siahdongtu ahi.

¹¹Pharisaipa chu a dinga, amah chauhin a haamtei a, Pathian, midang negute, tawn dihloute, aangkawmte bang ka hih louha, hi siahdongtu bang zong ka hih louh jiahin na tungah ka kipaah hi.

¹²Hafta khat sungin an nihvei ka ngawl a, ka neih zousiah sawma khat ka pe veu hi, a chi a.

¹³Huleh siahdongtu chu gamlataha dingin, vaanlam zong a en ngam sih a, himahleh, Pathian, kei misual tungah zahngai in, chi'n a awm a tuum a.

¹⁴Ka hung hilh ahi, khatpen sangin hipa chu siamtang in a inn ah a chiahsuhta hi; ajiahchu mi amah kingailoupi photmah a ngiam diing a; huleh mi amah kingaingiam photmah chu tawisangin a um diing, a chi a.

¹⁵Huleh ana khoih diingin a kawmah naungeehte ahung pui va; hizongleh nungjuite’n a muhun amahuh ana tai uh a.

¹⁶Hizongleh Jesu’n amahuh a kou a, Naupang neute ka kawmah hungsah unla, khaam sih un; bang jiahin i chih leh Pathian gam chu huchibangte a ahi.

¹⁷Chihtahzetin ka hung hilh ahi, Koi hizongleh Pathian gam naupang neute banga kipaahpih lou chu a sungah a luut hial sih diing, a chi a.

¹⁸Huleh vaihawmtu koiaha in a kawmah, Houtupa hoih, kumtuang hinna ka tan theihna diingin bang ahiai ka bawl diing? chi'n a donga.

¹⁹Jesu’n a kawmah, Bang diinga hoih hung chi na hiai? khat chauh chih louh koimah a hoih a um sih, huchu Pathian ahi.

²⁰Thupiahte na he hilou maw? Aangkawm sin, Tual that sin, Gu sin, Heetpihtu tahlouin pangsin, Na pa leh na nu zahbawl in, chihte, a chi a.

²¹Ama’n, Hite zousiah ka naupan apata ka juih veh ahi, a chi a.

²²Jesu’n hi thute a jah tahin, a kawmah, Sil khat na sam nalai hi, na neih zousiah zuah inla mi zawngte kawmah hawmin, huchi'n vaan ah gou na nei diing; huleh hung inla, hung jui in, a chi a.

²³Huleh ama’n hi chu a jahin a lungkham mahmah a; ajiahchu mihausa mahmah ahi.

²⁴Huin Jesu’n a lungkham mahmah chih a muh in, Mihausate diingin Pathian gam a luut hahsa hina mai e!

²⁵Ajiahchu mi hausa Pathian gam a a luut sangin sangawngsaau phinbil vanga a luut paisuaah a baih zaw hi, a chi a.

²⁶Huin hu thu jatute’n, Huchi ahihleh koi hutdamin a um zou diai? a chi va.

²⁷Huin ama’n, Mihing diing a sil hithei lou chu Pathian diingin ahi thei hi, a chi a.

²⁸Huin Peter in, En in, kei un bangkim nusiain ka hung jui uhi, a chi a.

²⁹Jesu’n a kawmah, Chihtahzetin ka hung hilh ahi, Pathian gam jiaha a inn aha, a nulepa aha, a unaute aha, a ji aha, a tate aha nusia chu,

³⁰Tu damsung ngeia a leh tampi, huleh hun hung tung diing a kumtuang hinna toh mulou diing koimah a um sih, a chi a.

³¹Huin ama’n sawmlenihte a puituam a, a kawmvah, Ngai un, Jerusalem khua a chiahtou diing i hi a; mihing Tapa tungtaang thu a zawlneite thugelh zousiah ahung taangtung diing hi.

³²Ajiahchu amah hi Jentelte khutah piahkhiah ahi diing a; chiamnuih bawlna’n a zang diing va; zumhuaitaha bawl in chil a siatkhum diing uh;

³³Huleh a vo diing va, a that diing uh; huleh ni thum ni’n a thou kiit diing, a chi a.

³⁴Amahun hi silte chu a hesiam sih va; hi thu chu a lahvah phual in a um a, thu kisoite zong a he sih uhi.

³⁵Huleh hichi ahung hi a, Jeriko khua a tun kuanin mittaw koi ahakhat lamgeiah khutdohin ana toua.

³⁶Ama’n mipi pai thawm ging a ja a, bangchi thu ahitai chi'n a dong a.

³⁷Amah un, Nazareth Jesu a pai ahi, chi'n a hilh va.

³⁸Huin ama’n, Jesu, nang David Tapa, hung khotuah in, chi’n a kikou a.

³⁹Huleh a masate’n amah chu sip diingin a tai va; hizongleh amah chu, David Tapa, hung khotuah in, chih a kihahkou sema.

⁴⁰Huin Jesu a dinga, amah chu a kawma hung pui diingin thu a pia a; huleh Bang diinga ahung tunin ana donga,

⁴¹Na tungah bang hung bawlsah leng na uh ei? a chi a. Ama’n, Lalpa, muhtheih ka ut hi, a chi a.

⁴²Jesu’n a kawmah, Mutheita in; na ginna in ahung damsah ahi, a chi a.

⁴³Huin thakhat in ahung mutheita a, Pathian paahtawi kawmin amah a juita a; huleh mi zousiah in hi a muh tahun Pathian a phat ta uhi.