Read Simte LUKE 19 Bible Online

LUKE 19 - Simte bible

LUKE 19

¹Huleh Jesu chu Jeriko khua ah a luut a, a paisuaah a.

²Huleh ngai in, mi khat a min Zakai kichi, siahdong houtu a um a, amah chu mi hausatah ahi.

³Huleh ama’n Jesu chu mi bangtobang ahiai chih muh a tum a; hizongleh mipi lahah a din ngiam jiahin a muthei sih hi.

⁴Huchi'n a taikhelh a, a en diingin theipi dawnah a kal a; ama’n hu lampi hung tawn diing ahihjiahin.

⁵Jesu hu mun ahung tunin a daahtou a, amah chu a mu a a kawmah, Zakai, kintahin hung kum in; ajiahchu tuni’n na inn a tung diing ka hi, a chi a.

⁶Huin kintahin ahung kum a, kipaahtahin amah chu a zintunta hi.

⁷Huleh amahun hichu a muh tahun, Misual kawma tung diingin a chiahta ve, chi'n a phun uh a.

⁸Huleh Zakai chu a dinga, Lalpa kawmah, Ngai in, Lalpa, ka sum kimkhat tagahte kawmah ka pe diing a; huleh mi thuampua bangaha dihloutaha ka laah a um leh a lehli in ka dit diing, a chi a.

⁹Huin Jesu’n a kawmah, Tuni’n hi inn ah hutdamna ahung tungta hi, amah zong Abraham tapa ahi ngal a.

¹⁰Ajiahchu beimangte hawl diing leh hundam diing a mihing Tapa chu hung ahi, a chi a.

¹¹Huleh hi thute a ngaihkhiah laiun Jerusalem a naih taah jiah leh Pathian gam hung langpah diing a a ngaihtuah jiahun tehkhinthu khat a soi beh a.

¹²Ama’n hujiahin a soi a, Mi loupi koi ahakhat a lalna gam diing khat va neia, hung kilehkiit diingin kho gamlatah ah a chiah a.

¹³Huleh ama’n a suaah sawmte a koua, sanasum sawm a kawmvah a pia a, huleh, Ka hung kiit masiah hikhu in sumkawl na vei un, a kawmvah a chi a.

¹⁴Hizongleh a mite’n amah chu a hua va, Hipa ka tungva vaihawm diingin ka deih sih uh, chi'n a nungah palai a taisah uhi.

¹⁵Huleh hichi ahung hi a, gam chu va nei a ahung kilehkiitin, a sum veipungdan uh heetna diingin a suaah sum a piahte chu a kawmah a kousah a.

¹⁶Khatnapa chu a hung a, Lalpa na sanasum sawmin a pung hi, a chi a.

¹⁷Ama’n a kawmah, Hoih e, nang suaah pha; sil tawmtakhat tunga na ginum jiahin kho sawm tungah vaihawmtu in pangin, a chi a.

¹⁸Huin a nihnapa a hung a, Lalpa, na sanasum nga in a pung hi, a chi a.

¹⁹Ama’n huchimahbangin a kawmah, Nang zong kho ngaa tungah vaihawmtu in pang in, a chi a.

²⁰Huleh a dang a hung a, Lalpa, en in, na sanasum hi-ah a um hi, kisiaahna puana tuam in ka koih heh hi;

²¹Ajiahchu mi gumtat na hi a ka hung lau hi; na koih louh bang na la veu a, huleh na tuh louh bang na aat veu hi, a chi a.

²²Ama’n a kawmah, Nang suaah gilou, na kamsuah ngei in siamlouh ka hung tangsah diing. Mi gum tat ka hiha, ka koih louhna a ka laah veua, huleh ka tuh louhna a ka aat veu na he hi.

²³Huchi ahihleh ka hung tuncha ka sum a pung toh ka laah theih diing a bangchidana ka sum chu sum-inn a na koih lou na hiai? a chi a.

²⁴Huin ama’n a kawma dingte kawmah, A sanasum chu laahsah unla, sawm neipa kawmah pia un, a chi a.

²⁵(Huin amahun a kawmah, Lalpa, ama’n sanasum sawm a nei hi, a chi va; )

²⁶Ajiahchu ka hung hilh ahi, A nei taphot chu piahbeh ahi diing a, huleh a nei lou chu a neihsun zong laahsah ahi diing hi.

²⁷Hizongleh hu ka meelmate, a tungva ka vaihawm diing deihloute chu hung pui unla, ka ma-ah that un, a chi a.

²⁸Huleh ama’n huchia a soi zohin a makai a, Jerusalem lam zuanin a chiah tou va.

²⁹Huleh hichi ahung hia, Olive kichi taanga Bethphage leh Bethani kho kawm naih ahung tunun a nungjuite laha mi nih a sawl a,

³⁰Na mazawn va khua ah va chiah unla, na luut tahun sabiltung nou koimah tuanna ngei nai louh na va mu diing uh; huchu hung suut unla, hung kai un.

³¹Huleh mi koipouh in, Bang diinga na suut uh ahiai? chia ahung dot leh, Lalpa’n a mamoh ahi, chi'n a kawmah soi un, a chi a.

³²Huleh a sawlte chu a va chiahta va, a kawmva a soi bang ngei in a va mu uh.

³³Huleh sabiltung nou chu a suut uleh a neite’n a kawmvah, Sabiltung nou bang diinga na suut uh ahiai? a chi va.

³⁴Amahun, Lalpa’n a mamoh ahi, a chi va.

³⁵Huin Jesu kawmah ahung kai va; huleh sabiltung nou tungah a puante uh a phah va, a tungah Jesu a tuangsah uh.

³⁶Huleh a chiah laiin lampi ah a puante uh a phah va.

³⁷Huleh ahung tun kuana Olive taang liamsuhna diing tah ah nungjui mipi zousiah in a sil loupi bawlte zousiah a muh jiahun a kipaah va, aw ngaihtahin Pathian a paahtawi va.

³⁸Lalpa mina hung Kumpipa chu a hampha hi; vaan ah lemthu leeng henla, tungnungpen ah loupina um heh, chi'n.

³⁹Huin mipi laha Pharisai khenkhat in a kawmah, Houtupa, na nungjuite tai in, a chi va.

⁴⁰Ama’n a dawng a, a kawmvah, Ka hung hilh ahi, hite a sip unchu suang te a kikoudohpah diing uh, a chi a.

⁴¹Huleh a tun kuanin khopi chu a mu-a, a kahkhum a.

⁴²Aw, nang mahmah in tu na hun sung beehin na hamuanna thu hung he tamai lechin maw! himahleh tuin chu na mit apat a kiphual ta hi.

⁴³Ajiahchu hitobang nite na tungah ahung tung diing, na gaalte’n na kimvelah leikua a tou diing va; na kiimkotin pawt thei louin ahung uumkhum diing uh.

⁴⁴Huleh nang leh na sunga na tate tualsaatna’n ahung nei diing va, na sungah suang khatbeeh kithuap in a nuse sih diing uh; ahung kiveh lai nite na heet louh jiahin, chi'n.

⁴⁵Huin amah chu Pathian biahinn ah a luut a, sil zuahte leh leite a nohdoh a.

⁴⁶A kawmvah, Ka inn chu haamteina inn ahi, chih gelh ahi; hizongleh nangun gutate kua in na siamta uh, a chi a.

⁴⁷Huleh ama’n ni chinin Pathian biahinn ah thu a hilh a. Hizongleh siampu lalte leh lehkhagialtute leh mipi houtute’n amah suhmang a tum uh.

⁴⁸Himahleh mipi zousiah in phatuamngaitaha a thu a ngaihkhiah zing jiahun a lohnadan diing a he sih uhi.