Read Simte LUKE 2 Bible Online

LUKE 2 - Simte bible

LUKE 2

¹Huleh hulaiin hichi ahung hi a, Kaisar Augusta in khovel pumpi min gelh diing thu a pia a.

²(Huleh hichu Syria gam a Cyrenea gam optu ahih lai a mingelhna masapen ahi).

³Huleh mi zousiah chu mingelh diingin amah uh gam chiat ah a chiah va.

⁴Huleh Joseph zong Galili gam a Nazareth khua a kipanin Judia gam a David khopi Bethlehem a chih vah a chiah tou a; (David innkuante leh a haah a mi ahih jiahin).

⁵Mari, a ji khaam gaai saanlai toh, min gelh diingin.

⁶Huleh hichi ahi a, hutaha a um laiun a nauneih ahung hunta a.

⁷Huleh a tapa masa chu ahung neikheta a, huleh puannem in a tuam a, amahuh diing a zinbuuh a mun a um louh jiahin gankuang ah a sial hi.

⁸Huleh hu gam mah ah belaampute a belaamte uh chinga jan a gam a giah a um va.

⁹Huleh, ngai in, Lalpa angel khat a kawmvah a hung a, Lalpa loupina in a kiimvel uh a taanvaah a; huleh amah uh chu a lau mahmah uhi.

¹⁰Huin angel in a kawmvah, Lau sih unla, ngai un, mi chin a diingin thupha kipaahhuai mahmah nanguh ka hung puaah hi.

¹¹Ajiahchu tuniin nanguh diingin David khua ah. Hundampa a piangta, Khrist Lalpa chu.

¹²Huleh hikhu nanguh diingin chiamchihna ahi diing, Naungeeh puannema tuam, gankuang a lum chu na mu diing uhi, a chi a.

¹³Huleh thakhatin hu angel kawmah vaan mipite a hungkhawm va, Pathian a phat va,

¹⁴Tungnungpen ah Pathian loupitahin um henla, leitung a a kipaahpih mihingte lahah lemthu leeng heh, chi'n.

¹⁵Huleh hichi ahung hi a, angelte’n vaan a, a paisan tahun belaampute’n chu, Tuin Bethlehem khua tanpha in i chiah diing a, Lalpa’n thu ahung hilh hung tung chu i va en diing uh, a kichi va.

¹⁶Huleh kintahin a hung va, Mari leh Joseph leh gankuang a lum naungeeh chu a va mu uh.

¹⁷Huleh a muh zohun hi naungeeh tungtaang thu amah uh heetsah a um chu a soithangta uhi.

¹⁸Huleh a jakha taphot in hu belaampute thusoi chu limdang a sa chiat uhi

¹⁹Hizongleh Mari in hi thu zousiah a lungtangah a vom zinga, a ngaihtuah zingta hi.

²⁰Huleh belaampute chu amah uh kihilh bang ngeia sil zousiah a jah va a muh jiahun Pathian paahtawia phat kawmin a kiihkiitta uhi.

²¹Huleh a zehtanna diing ni giat ahung chinin hu naungeeh chu a min diingin suul a, a um ma daih a angel in a phuaahsa Jesu a sata uhi.

²²Huleh Mosi daan dungjui a amahnu kisuhsiang ni ahung tunin, amah chu Jerusalem ah ahung pui va, Lalpa ma a lat diingin.

²³(Tapasal suul hong photmah chu Lalpa diingin siangthou a kichi diing ahi chih, Lalpa daanthua a gelh dungjuiun;)

²⁴Huleh Lalpa daanthua kisoi dungjuia vakhu kopkhat aha, vapaal nou nih aha kithoihna a laan diingin.

²⁵Huleh ngai in, Jerusalem ah pasal khat a min Simeon kichi a um a; amah chu midihtat leh Pathian ngaihsahtah ahi a, Israelte hamuanna diing chu a ngaah zing a; huleh Hagau Siangthou a tungah a um hi.

²⁶Huleh Lalpa Khrist a muh masiah a si sih diing chih Hagau Siangthou in a hesah a.

²⁷Huleh Hagau heetsah in Pathian biahinn ah ahung luut a; huleh naungeeh Jesu chu a nu leh pa in daan ngeina banga hihsah diing a ahung puiluut tahun,

²⁸Ama’n ana aangpom a, Pathian a paahtawi a,

²⁹Lalpa, tuin na suaah chu na thu bang jel a hamuangtah a chiahsah diing na hi;

³⁰Ajiahchu ka mit in na hutdamna chu a muta hi.

³¹Mi zousiah maai ma a na bawl chu;

³²Jentelte salhvaah diing vaah leh, na mi Israelte loupina diing chu, chi'n.

³³Huleh Joseph leh a nuin naungeeh tungtaang a thu kisoite chu thumah a sa mahmah uhi.

³⁴Huleh Simeon in amah uh a vangpiah a, a nu Mari kawmah, Ngai in, hi naupang hi Israelte laha mi tampi puuhna diing leh din kiitna diing a guat ahi; huleh chiamchihna niala um diingin toh.

³⁵(Ahi, nangmah ngei lungtang zong namsaau in a sun pailet diing a), mi tampite lungtanga ngaihtuahte a kilat theihna diingin, a chi hi.

³⁶Huleh Aser nam a mi, Phanuel tanu, Ana kichi numei zawlnei khat a um a; amahnu chu teehsia a hita a, a nungaah tawp zousiah a pasal kawmah kum sagih a um a.

³⁷Huleh amahnu chu meithai kum sawmgiat leh li vel mi ahi a, Pathian biahinn paisan louin suun leh janin an ngawl pum a haamteiin Pathian a bia hi.

³⁸Huleh amahnu chu huchih laitahin a hung a, Pathian kawmah kipaahthu a soi a, Jerusalem khua a tatna diing lamen photmah kawmah Jesu tanchin a soi hi.

³⁹Huleh Lalpa daan dungjuia sil zousiah a bawl zoh un Galili gam ah amah uh khua ngei Nazareth ah a pai kiitta uhi.

⁴⁰Huleh naungeeh chu ahung khang lian deuhdeuh a, a lungsim ahung haat deuhdeuh a, pilna in ahung dimta a; huleh Pathian khotuahna chu a tungah a um hi.

⁴¹Huleh a nulepa chu kum chinin chiahkaan ankuang lui chiangin Jerusalem ah a chiah veu va.

⁴²Huleh amah chu kum sawmlenih ahung hihin ankuang luina daan ngeina in Jerusalem ah a chiahtou va;

⁴³Huleh a nite a chin zoh a ahung kilehkiit laiun, naupang Jesu chu Jerusalem ah a umdenta a; Huleh Joseph leh a nu in hichu a he sih uh.

⁴⁴Hizongleh amahun a lawi lahva um hina’nte chi'n ni khat lam a paita uh a, huleh a sanggamte uleh a meelheette u’laha hawl uh.

⁴⁵Huleh a muh louh tahun amah hawl kawmin Jerusalem ah a kinungleh kiitta uhi.

⁴⁶Huleh hichi ahung hi a, ni thum nungin Pathian biahinn, ah, houtute laha tou a, a thu uh ngaikhia leh, amah uh thu dongin a va mu va.

⁴⁷Huleh a thu zata photin a heetdan leh a dawndan limdang a sa mahmah uhi.

⁴⁸Huleh a nulepa in a muh tahun limdang a sa mahmah va; a nuin a kawmah, Bawi, bang diinga hichibang a hung bawl na hiai? ngai in, na pa leh ke'n lungkhamtahin ka hung hawl uhi, a chi a.

⁴⁹Huin ama’n a kawmvah, Bang diinga hung hawl na hi viai? ka Pa inn a um a, a nna ka toh diing mawng sa lou na hi viai mah? a chi a.

⁵⁰Huleh amahun a kawmva a thusoi chu a hesiam sih uhi.

⁵¹Huin amah uh a juisuh a, Nazareth khua a tungva, a thuthu un a um a; hizongleh a nuin hi sil kisoi zousiah chu a lungtangah a vom zing hi.

⁵²Huleh Jesu chu pilna ah leh tahsa ah ahung khang lian deuhdeuh a, Pathian leh mihing deihsah in a um deuhdeuhta hi.