Read Simte LUKE 22 Bible Online

LUKE 22 - Simte bible

LUKE 22

¹Huleh tanghou tolsoh louh ankuang luina chiahkaan Kuut a chih uh ahung naita a.

²Siampu lalte leh lehkhagialtute’n amah a thah theihna diing uh a ngaihtuah va; mipite laha lau uh a.

³Huin sawmlenihte laha tel Juda Iskariot a chih uh sungah Setan a luut a.

⁴Huleh a chiahta a, a kawmva Jesu a matsah theihna diing daan siampu lalte leh houtute a va kihoupih a.

⁵Huin amahuh chu a kipaah mahmah va, amah chu sum piah diingin ana chiamta uhi.

⁶Huleh ama’n lem a sa a, mipi um louh kal khata matsahna diing lemtaang a hawlta hi.

⁷Huin tanghou tol sohlouh ni chiahkaan Kuut belaamnou gohna ni diing ahung tung ta a.

⁸Ama’n Peter leh John a sawla, Chiah unla, chiahkaan kuut i neeh diingun hung va bawlsah un, a chi a.

⁹Huin amahun a kawmah, Khoitah ah va bawlte le ung na deih ei? a chi va.

¹⁰Ama’n a kawmvah, Ngai un, khopi sunga na luut chiangun tuibeel pua pasal khat in ahung na tuaah diing a; a luutna inn ah juiluut un.

¹¹Huleh a inn neitu kawmah, Houtupa’n, ka nungjuite toh chiahkaan kuut ka neeh na diing uh mikhual pindan khoitah ahiai ahung chi hi, na chi diing uh;

¹²Huleh ama’n pindan tungnung lianpi, guatsa diam khat ahung na ensah diing; huah bawl un, a chi a.

¹³Huin a chiah va, a kawmva a soi bangin a muta va; huleh chiahkaan kuut chu a bawlta uhi.

¹⁴Huleh ahun ahung chin tahin a touta a, sawmlenihte’n zong a toupih va.

¹⁵Huin ama’n a kawmvah, Ka thuaah ma in hi chiahkaan kuut nang u’toh neehkhawm ka ut mahmah hi;

¹⁶Ajiahchu ka hung hilh ahi, Pathian gam a suhbukim ahih masiah hikhu ka ne nawn sih diing hi, a chi a.

¹⁷Huleh nou a la a, kipaah thu a soi zohin, Hi la unla, kihawm un;

¹⁸Ajiahchu ka hung hilh ahi, Pathian gam ahung tun masiah grep gah tui ka dawn nawn sih diing hi, a chi a.

¹⁹Huin tanghou a la a, kipaahthu a soi zohin a balkeeha, a kawmvah a pia a, Hichu ka tahsa, nanguh diing a piah chu ahi; na hung heet zing na diingun hichu bawl veu un, a chi a.

²⁰Huchimahbangin nitaah an neeh zohin nou zong a la a, Hi nou ka sisana thuhun thah, nanguh diing a luang khia chu ahi.

²¹Hizongleh, ngai un, ahung mansahtu diing khat chu ka kawmah dohkaan tungah a um hi.

²²Tahzetin mihing Tapa chu a kiguatsa bangjelin a chiah hi; hizongleh a mansahtupa tung a gih hi! a chi a.

²³Huin amahuh chu hitobang bawl diing a lahva koipen hi diing ahiai chi'n a kidongtuahta uhi.

²⁴Huleh amah u’lahah koiaha lianpena seh diing chi-a kinialna zong a um a.

²⁵Ama’n a kawmvah, Jentelte kumpipate chu a tungvah lal tahin a um va; huleh a tungva thuneitute chu mi hoihna diing bawltute a chih uh;

²⁶Hizongleh nang u’chu huchibang na hi sih diing uh; na lahva lianpen chu naupang zaw bangin um henla; huleh a loupipen chu neehbawltu bangin um zaw heh.

²⁷Ajiahchu, ankuang uumtu leh neehbawltu koi ahiai lian zaw? Ankuang uumtu hizaw lou ahiai mah? hizongleh kei chu na lahvah neehbawltu bangin ka um hi.

²⁸Nanguh chu heemna ka tuaah sung siaha hung umpihtute na hi uhi.

²⁹Huleh ka Pa’n kei gam ahung guatsah bangin nanguh diingin gam ka hung guatsah hi.

³⁰Ka gam a ka dohkaana na neeh va, na dawn va, huleh Israel nam sawmlenihte vaihawmsaha laltouphaha na tou theihna diingun, a chi a.

³¹Huin Lalpa’n, Simon, Simon, ngai in, Setan in buh banga ahung seep theihna diingin ahung ngen hi.

³²Hizongleh na ginna a man louhna diingin ka hung haamteisah hi; na kihei kiit chiangin na unaute sukip in, a chi a.

³³Huin ama’n a kawmah, Lalpa, nang toh suangkul leh sihna ah zong chiah ka ngaap hi, a chi a.

³⁴Huin ama’n, Peter, ka hung hilh ahi, thumvei na hung kiheetmohbawl masiah tuni’n aah a khuang sih diing, a chi a.

³⁵Huin ama’n a kawmvah, Nanguh dangka-ip beia, sakhau beia, huleh keengtophah beia ka hung sawl laiin sil khatbeeh na kitasam viai mah? a chi a. Amahun, Tasam lou, a chi va.

³⁶Huin ama’n a kawmvah, hizongleh tuin chu dangka-ip nei in keng henla, huchimahbangin sakhau nei in zong; huleh namsaau nei louin a puan zuah henla, lei heh.

³⁷Bang jiahin ahiai i chih leh ka hung hilh ahi, Amah chu daan botsetute lahah a sim tel uh chih gelh chu ka tungah a taangtung diing him ahi; ajiahchu ka tungtaang thute tungkim ahita, a chi a.

³⁸Huin amahun, En in, Lalpa, hi-ah namsaau nih a um hi, a chi va Ama’n a kawmvah, A hun hi, a chi a.

³⁹Huin a pawtdoh a, a ngeina bangin Olive taang ah a chiah a; huleh a nungjuite’n zong a jui va.

⁴⁰Huleh a mun a tun un ama’n a kawmvah, Heemna-a na luut louhna diingun haamtei un, a chi a.

⁴¹Huin amah chu suang a sehphaah tan diing bangah a chiahtuam a, a khupdin a; huleh a haamtei a;

⁴²Pa, lem na sah a ahihleh hi nou chu ka kawma kipanin lasuanin; hizongleh kei thu hilouin nang thuthu hizaw heh, a chi a.

⁴³Huin vaan apatin angel khat a kawmah ahung kilaah a, amah ahung suhaat a.

⁴⁴Huin amah chu a gim mahmah a, phatuam ngai josemin a haamtei a; huleh a khosa chu sisan khal liantah bangin leiah ava kheta a.

⁴⁵Huleh a haamtei zoh-a ahung thohdoh tahin a nungjuite kawmah a hung a, amahuh chu lungkham jiaha ihmuin ahung mu a.

⁴⁶Huin a kawmvah, Bang diinga ihmu na hi viai? Heemna-a na luut louhna diingun thou unla haamtei un, a chi a.

⁴⁷Huleh thu a soi lai tahin, ngai un, mipi hon khat a hung a, huleh sawmlenihte laha khat, Juda a chih uh ahung makaia, tawp tum in Jesu kawm a naih a.

⁴⁸Hizongleh Jesu’n a kawmah, Juda, mihing Tapa hi tawpa mansah na hi maw? a chi a.

⁴⁹A kiima mi umte’n sil hung um diing chu a muhun, Lalpa, namsaauin ka saat diviai? a chi va.

⁵⁰Huleh a lahva mi khat in siampu lal suaahpa a saata, a bil jiatlam a saat khiahsah a.

⁵¹Huin Jesu’n ahoupih a, Hichi chiang chu phal un, a chi a Huin a bil chu a khoih a, a sudamta hi.

⁵²Huin Jesu’n a kawma hung siampu lalte leh, Pathian biahinn houtute leh, upate kawmah, Guta man diing bang hialin namsaau leh khetbuuh tawiin na hung uh ahi maw?

⁵³Na kawmva ni china Pathian biahinn a ka um laiin lah ka tungah khut na ha hial sih va; hizongleh tu hi na hun uh ahi, huleh mial thuneihna toh, a chi a.

⁵⁴Huin amah chu a man va, a pui va, siampu lal inn sungah a puiluut uhi. Huleh Peter in gamlatahah agaal juih a.

⁵⁵Huleh amahun huang sung laiah mei a chih va, a toukhawm va, Peter chu a lahvah a va tou a.

⁵⁶Huleh mei kawma a tou laiin nungaah koiaha in a mu a, ngun tahin a ena, Hipa zong a kawma um ahi, a chi a.

⁵⁷Ama’n, Numei, amah ka he sih hi chi'n a kiheetmohbawl a.

⁵⁸Huleh tomkhat zouin midang khat in a mu kiita, Nang zong a lahva mi na hi, a chi a. Huin Peter in, Ka hi sih, mihing, a chi a.

⁵⁹Huleh pung khat vel nungin midang khat in, Hipa zong a kawma um himah tham ve aw, Galilimi ahi ngal a, a chi tenten a.

⁶⁰Peter in, Na thusoi ka he sih, mihing, a chi a. Huin a thusoi laitahin aah ahung khuangta a.

⁶¹Huin Lalpa chu a kiheia, Peter a ena Peter in, Tuni’n aahkhuan ma in thumvei na hung kiheetmohbawl diing, chia Lalpa’n a kawma a chih chu ahung hedohta a.

⁶²Huin Peter chu a pawtdoh a, a kap huthutta hi.

⁶³Huleh Jesu mantute’n amah chu chiamnuih bawlna’n a zang va, a vua va.

⁶⁴Huleh amaikaan zohun a maai a beeng va, Koi ahiai hung vua? soi in, chi'n a dong va.

⁶⁵Huleh thudang tampiin amah soisia in a kawh uhi.

⁶⁶Huleh kho vaah tahin vaantaang upate leh, siampu lalte leh, lehkhagialtute ahung kikhawm va, a vaihawmna ma- vah a puiluut va;

⁶⁷Khrist na hiai mah? hung hilh in, a chi va Ama’n a kawmvah, Hung hilh mah zongleng na gingta sih diing uh;

⁶⁸Huleh ke'n zong nanguh thu hung dong leng na hung dawng saam sih diing va, chiah lah na hung chiahsah sih diing uh;

⁶⁹Tukalsiah mihing Tapa chu Pathian silbawltheihna jiatlam ah a tou ta diing hi, a chi a.

⁷⁰Huin a bawnun, Ahihleh, Pathian Tapa na hi maw leh? a chi va. Ama’n a kawmvah, Na hung chih bangun ka hi, a chi a.

⁷¹Huin amahun, Heetsahna dang bang i ngai nawntuan eimah? Eimah ngei in a kamsuaah i zata uhi, a chi va.