Read Simte LUKE 23 Bible Online

LUKE 23 - Simte bible

LUKE 23

¹Huin mipite chu a bawnun a ding va, amah chu Pilat kawmah a pui va;

²Hipa’n, Kei Khrist, kumpipa ka hi chi a Kaisar kawm a siah tawi a khap leh, ka jaatte uh a tohbuai ka he uh, chi'n a heeh ta va.

³Huin Pilat in, Judate kumpipa na hi maw? chi'n a donga. Ama’n a dawng a, Na chih chu ka hi, a chi a.

⁴Huin Pilat in siampu lalte leh mipite kawmah, Hipa tungah sualna bangmah ka mu sih, a chi a.

⁵Huin amahun, Hipa’n Galili gam apatin hi mun tanin Juda gam khochinah thu hilhin mipite a tohbuai veu hi, chi'n a hahpan sem uhi.

⁶Galili thu a jah tahin Pilat in hu mi chu Galili gam mi ahihleh hih louh a donga.

⁷Huleh Herod vaihawmna nuaia um ahi chih a heet tahin Herod kawmah a sawla, hulaiin amah zong Jerusalem a um ahihjiahin.

⁸Huleh Herod in Jesu a muh tahin a kipaah mahmah a; a tanchin tampi ana jah jiahin hun sawttah apat kimuhpih ut mawng ahi a; huleh a silmah bawl bangaha beeh muh zong a kinem a.

⁹Huin ama’n a kawmah thu tampi a donga; hizongleh ama’n bangmahin a dawng sih.

¹⁰Huin siampu lalte leh lehkhagialtute chu a dingkhia va, nasatahin a heeh uhi.

¹¹Huin Herod leh a sepaihte’n Jesu chu a simmohbawl va, chiamnuih bawlna’n a zang va, huleh puan loupi a silhsah va, Pilat kawmah a sawl kiitta uhi.

¹²Huleh huni mahin Herod leh Pilat chu a kihoutheita uh; hu masiah chu kilungdou zing ana hi uhi.

¹³Huin Pilat in siampu lalte leh houtute leh mipite a koukhawma,

¹⁴A kawmvah, Mite a tohbuai chi-a hipa ka kawma na hung pui uh ahi a; huleh, ngai un, na ma va hoihtaha ka etchian nungin na heehna thu vah a tungah bangmah dih louhna ka mu sih hi;

¹⁵Herod in zong a mu sih; ajiahchu nanguh a kawmah ka hung sawla, huleh ngai un, sihna khop hial bangmah a bawl sih hi;

¹⁶Hujiahin ka jep diing a, ka hah mai diing, a chi a.

¹⁷(Ajiahchu gualvaah ni a mi khat a kawmva hahkhiahsah teitei diing ahi a)

¹⁸Huin amahun thakhat in a kikou va, Hipa sumangthai inla, Barabba hung hahdohsah in, a chi va.

¹⁹(Hu pa chu khopi sunga helna bang aha jiah leh tualthah jiaha suangkul a taang ahi a)

²⁰Hujiahin Pilat in Jesu a hahdoh nuama, a kawmvah thu a soi kiita.

²¹Hizongleh amahuh chu a kikou va, Kros ah kilhbeh in, kros ah kilhbeh in, a chi va.

²²Huin ama’n a thumveina di’n a kawmvah, Bang jiahin eimaw? bang ahiai a suhkhelh? sihna khop hial a tungah bangmah ka mu sih hi; hujiahin ka jep diing a ka hah mai diing, a chi a.

²³Huleh amahun chu aw ngaihtahin kros a kilhbeh diingin a ngen teitei va. Huin amahuh aw leh siampu lalte aw in a neh zou zota hi.

²⁴Huin Pilat in a nget bang va bawl diingin thu a tanta a.

²⁵Huleh helna leh tualthahna jiaha suangkul taang a ngetpa u’chu ahah a; Jesu ahihleh a utut va bawl diingin a pekheta hi.

²⁶Huleh amah a pui laiun gam lama kipana hung Cyrene gam mi Simon chu a man va, Jesu nung nunga po diingin a tungah kros chu a ngata uhi.

²⁷Huleh mipi nasatah leh, amah kah a maau jenjun numei honin a jui va.

²⁸Hizongleh Jesu’n amahuh lam hung ngain, Jerusalem tanute, kei hung kah sih unla, nang uleh na tate uh diingin kap zaw un.

²⁹Ajiahchu ngai un, hichibang nite ahung tung diing a, huni chiangin chiingte leh nau paai ngei louhna gilte, huleh naungeeh teep ngei louh nawite a hampha uh, a chi diing uh.

³⁰Hu hun chiangin amahun taangte kawmah, Hung netkhum un, huleh mualte kawmah, Hung khuhkhum un, a chi diing uh.

³¹Bang jiahin ahiai i chih leh sing hinga bawn hi silte a bawl uleh, sing gaw ah bang a kibawltaphet diai? a chi a.

³²Huleh amah toh midang migilou nih zong suhlup diingin a pui va.

³³Huleh Kalvari a chih mun uh a tun un huah amah chu kros ah a kilhbeh va, migiloute toh, khat a jiat lamah, huleh khat a veilam ah a kilhbeh uhi.

³⁴Huin Jesu’n, Pa, amahuh ngaidam in; ajiahchu a silbawl uh a he lou uh ahi, a chi a. Huin a puansilh kihawmin aai a saan uhi.

³⁵Huleh mipite’n dingin a en zing uh. Huleh houtute’n zong, Midang bawn a hundam vele; Pathian miteel, Khrist ahih ngeel leh amah leh amah kihundamta henla, chi'n a eenghou va.

³⁶Sepaihte’n zong chiamnuih bawlna’n a zang va, a kawma hungin zu thuuh a pia va.

³⁷Huleh, Judate kumpipa na hih tahzet leh nangmah kihundam in, a chi uhi.

³⁸Huleh a lutung lamah Grik leh Latin leh Hebrai haa min, HIPA JUDATE KUMPIPA AHI chia kigial a tuang hi.

³⁹Huleh migilou kikhaite laha khat in amah a taia, Khrist na hihleh nangmah kihundam inla, kei u’zong hung hundamta’n, a chi a.

⁴⁰Hizongleh khatpen inchu amah taikawmin a dawng a, Kibang giapa ahung kigawt he in Pathian lau lou na hiai mah?

⁴¹Ei chu gawt taah mawng i hi; ajiahchu i silbawlte man mu i hi; hizongleh hipa’n chu bangmah a susual sih hi, a chi a.

⁴²Huin ama’n Jesu kawmah, Lalpa, na gam na tun chiangin hung he zing in, a chi a.

⁴³Jesu’n a kawmah, Chihtahzetin ka hung hilh ahi, Tuni’n ka kawmah paradis ah na um diing hi, a chi a.

⁴⁴Huleh hichu pung guupna vel diing ahi a, pung kuaahna tandongin leitung zousiah ahung mialta a.

⁴⁵Huleh ni ahung mialta a, Pathian biahinn puanjah chu a kimlaiah ahung keeh ta hi.

⁴⁶Huleh Jesu chu aw ngaihtahin a kikoua, Pa, na khutah ka hagau ka hung kolsah hi, a chi a; huleh huchia a chihzohin a hagau ahahta hi.

⁴⁷Huleh sepaih zahoutuin sil umdan a muh in, Hipa matheilouin midihtat ahi ngei mai, chi'n Pathian a paahtawita hi.

⁴⁸Huleh hu etnop en diing a hung khawm mipi zousiah in sil umdan a muhun a awm uh tuum kawm kawmin a chiah kiitta uhi.

⁴⁹Huleh a meelheette zousiah leh Galili gam a kipana amah hung jui numeite chu gamlapi ah a ding va, hi silte a en zing uhi.

⁵⁰Huleh, ngai un, mi khat a min Joseph kichi vaihawmtu a um a; amah chu mipha leh midih ahi a;

⁵¹(Ama’n chu a vaihawm uleh, a silbawl u’zong lem ana sahpih sih a; ) Amah chu Judate khopi Arimathiami ahi a, Pathian gam ngaah zinga um ahi.

⁵²Hipa chu Pilat kawmah a chiah a, Jesu luang a ngen a.

⁵³Huin a lakhia a, puannem in a tuama, koimah sialna ngei nai louh suang kikhuaah haan khatah a sialta hi.

⁵⁴Huleh hu ni chu kiginni ahi a, khawlni ahung naita a.

⁵⁵Huleh numeite, Galili gam a kipana amah toh hung kitonte’n zong a nung a jui va, a haan leh a luang kisialdan a mu uhi.

⁵⁶Huin a chiah kiit va, silgimnamte leh thau gimtuite a siam va; huleh thupiah dungjuiin khawlni in a khawlta uhi.