Read Simte LUKE 24 Bible Online

LUKE 24 - Simte bible

LUKE 24

¹Huleh hafta ni masa niin, jingkal matahin a gimtui bawlte uh tawiin, midang koite aha toh haan ah a hung va;

²Huleh suang chu haan apat liihdoha um a mu va.

³Huin a sung ah a luut va, Lalpa Jesu luang chu a muta sih uhi.

⁴Huleh hichi ahung hi a, hujiaha a lungbuai laiun ngai un, mi nih puan vaam tah mai silhin a kawmvah ahung diing a;

⁵Huleh amahuh laua lei a a bohkhup laiun amahun a kawmvah, Bang diinga misi laha mihing hawl na hi viai?

⁶Hi-ah a um nawn sih hi, a thou kiitta hi; Galili gam a, a um laia na kawmva a soi he un,

⁷Mihing Tapa chu misualte khuta matsah in a um diing a, kros ah a kilhbeh diing va, huleh ni thum ni’n a thou kiit diing, a chih, a chi va.

⁸Huin amahun a thusoite ahung hedohta uhi.

⁹Huleh haan apatin a nungchiah kiit va, hi silte zousiah sawmlekhatte leh midang zousiah kawmah a hilh ta uhi.

¹⁰Amah u’chu Mari Magdalene toh, Joanna toh, Jakob nu Mari toh, huleh a kawmva um numei dangte toh ahi va, hi silte chu sawllehte kawmah a hilh ta uhi.

¹¹Huleh a thusoi u’chu mawh thu mai in a ngai va, ana tahsang sih uhi.

¹²Huin Peter chu a dingdoha, haan ah a va taia; huleh kuuna a et leh puannemte chauh um chu a mu a, sil um daante chu limdang satahin a chiahmangta hi.

¹³Huleh ngai in, huni mahin a lahva mi nih Emmau kichi khua khat, Jerusalem apata farlong sawmgup banga gamla ah a chiah va.

¹⁴Amah u’chu hi sil hung umte zousiah thu ah a houlim va.

¹⁵Huleh hichi ahung hi a, houlima a kidottuah laiun Jesu ngei in ahung naih a, amahuh toh a chiahkhawm ta a.

¹⁶Hizongleh amah a heet theih louh na diingun a mit uh suhvaih in a um a.

¹⁷Huin ama’n a kawmvah, Na chiahkawmva na kihoulimna uleh, na dahna thu uh bang ahiai? a chi a.

¹⁸Huin khatpa, a min Kleopa kichi penin a dawng a a kawmah, Tulaia sil umdante na heet louh, Jerusalem a nang chauh mikhual na hiai mah? a chi a.

¹⁹Ama’n a kawmvah, Bang silte eimaw? a chi a. Huin amahun a kawmah, Nazareth Jesu, Pathian leh mi zousiah mitmuha silbawl leh thusoia zawlnei minthangtah tungtaang thu:

²⁰Amah chu siampu lalte leh ka houtute un sitaah a siamlouh tansah diing a a piahkhiah va, kros a, a kilhbeh uh thu.

²¹Hizongleh kei un chu Israelte tantu diing amah ahi chih ka kinem uh; huleh hihaw lou zong, hi silte tun kalsiah tuni ani thum ni ahita hi.

²²Hulezong ka lawi lahva numei khenkhat haan a mataha va chiahte’n thumah satahin ahung koih uhi.

²³Huleh a luang a muh louh phetun ahung kihkiit va, A hing kiitta, chia hung hilh angelte zong ka mu uh, a chi uh.

²⁴Huin ka umpihte lahva khenkhat haan ah a va chiah va, numeite soi bang ngei in a va mu va; hizongleh amah a mu tuan sih uhi, a chi va.

²⁵Huin ama’n a kawmvah, Aw mingolte leh, zawlneite thusoi zousiah tahsang diing a lungngongte;

²⁶Khrist in hi silte thuaah a, a loupina a, a luut diing him hilou ahiai mah? a chi a.

²⁷Huin Mosi leh zawlneite zousiah lehkhabu apanin Pathian lehkhabu pumpia amah tungtaang kigialte a kawmvah a hilhchianta hi.

²⁸Huleh a chiahna diing khua uh tung diing ahita va; amah chu gamlataha chiahsuaah tum bangin a um a.

²⁹Hizongleh amahun a hou va, Ka kawmvah um mai ta’n; nitaahlam ahita a, huleh ni zong tum diing ahita hi, a chi va, Huin a kawmva um diingin a luut ta hi.

³⁰Huleh hichi ahung hi a, amahuh toh ankuang a a touin tanghou a la a, vang a pia a, huleh a balkeeh a, a kawmvah a pia a.

³¹Huin a mit uh ahung vaahta a, amah a heta uh; huin amah chu a mitmuh vapat a mangta hi.

³²Huin amahun, Lampi a ahung houpiha, Pathian lehkhabu thute ahung hilhchian laiin i lungtang i sungah a kuang hial hilou ahiai mah? a kichi va.

³³Huleh hulaitah mahin a thou va, Jerusalem khua ah a kinungleh va, sawmlekhat umkhawmte leh a kawmva umte chu a mu uh.

³⁴Amahun, Lalpa chu a thou kiittahzet ahi, Simon kawmah zong a kilaahta, ana chi va.

³⁵Huin amahun zong lampi a sil hung umte leh tanghou a balkeeh a amah a heetdohdante uh a hilh uhi.

³⁶Huleh hichi-a a soi laiun, Jesu ngei chu a lahvah ahung dinga, a kawmvah, Na tungvah hamuanna um heh, a chi a.

³⁷Hizongleh amahuh chu a chija mahmah va, huleh a lau va; siha mu hiin a kingaihtuah uh.

³⁸Huin ama’n a kawmvah, Bang diinga mangbang na hi viai? huleh bang jiaha na lungtang va ginlahna hung um ahiai?

³⁹Ka khutte leh ka keengpeehte en un, kei mahmah hilou ka hiai mah? hung khoih unla, en un; ajiahchu ke’n neia na hung muh bangun siha in sa leh guh a nei sih hi, a chi a.

⁴⁰Huleh hichi-a a soi zohin a khutte leh a kengpeehte amahuh a lah hi.

⁴¹Huleh a kipaah luat jiah va agintaat louh uleh limdang a sah laiun ama’n a kawmvah, Hi-ah neeh diing bangaha na nei viai? a chi a.

⁴²Huin amahun a kawmah nga kikanggaw khat leh khuaizu khal khat a pia va.

⁴³Ama’n huchu a la a, a ma- vah a neta hi.

⁴⁴Huleh ama’n a kawmvah, Mosi daan leh zawlneite lehkhabu leh psalm bu-a ka tungtaang kigial zousiah ahung taangtun diingdan nang u’toh ka umkhawm laia na kawmva ka thusoite chu hihaw ahi, a chi a.

⁴⁵Huin Pathian lehkhabuthu a heet theihna diingun a lungtang uh a hihpil ta hi.

⁴⁶Huleh ama’n a kawmvah, Hichibanga gelh ahi, Khrist in gim a thuaah diing a, ni thum ni a misi laha kipan a thohkiit diing him ahi;

⁴⁷Huleh kisiihna leh sual ngaihdamna chu amah minin Jerusalem apatin nam chin lahah soi ahi diing;

⁴⁸Nanguh hi silte heetpihtute na hi uh.

⁴⁹Huleh ngai un, ka Pa silchiam na tungvah ka hung sawl diing hi; hizongleh tunglama kipana silbawltheihna a thop na hih masiah uh Jerusalem khopi ah um kinke'n un, a chi a.

⁵⁰Huleh amahuh chu Bethani tanphain a puidoh a, huin a baan a jah a, amahuh a vangpiah a;

⁵¹Huleh hichi ahung hi a, a vangpiah lai tahin amahuh a paisan ta a, vaan ah puitouhin a um ta hi.

⁵²Huin amahun amah abia va, kipaah mahmahin Jerusalem ah a kih kiitta uhi.

⁵³Huleh Pathian biahinn ah Pathian phat leh paahtawiin a um zingzingta uhi, Amen.