Read Simte LUKE 4 Bible Online

LUKE 4 - Simte bible

LUKE 4

¹Huleh Jesu chu Hagau Siangthou a dimin Jordan lui apatin a kilehkiit a, huleh gamdai ah Hagau puiin a um a.

²Ni sawmli sung diabol heemin a umta a; huleh hu nite sungin bangmah a ne sih a; huin a tawpah a gil ahung kialta hi.

³Huin diabol in a kawmah, Pathian Tapa na hihleh hi suang tanghou suaah diingin thupia in, a chi a.

⁴Huleh Jesu’n, Mihing tanghou chauhin a hing sih diing a, Pathian thu chinin a hing zaw diing, chih gelh ahi, chi'n a dawng a.

⁵Huin diabol in amah chu taang saang khatah a puitou a, mitphetkal louin khovel lalgam zousiah a ensah a.

⁶Huin diabol in a kawmah, Hi zousiah tunga thuneihna leh a loupina chu ka hung pe diing: ka kawma piahkhiah ahita ngal a; huleh ka piah nuam taphot kawmah ka pe veu hi,

⁷Hujiahin kei na hung biah phot inchu a bawnin nanga ahi diing, a chi a.

⁸Huin Jesu’n a dawng a, a kawmah, Ka nunglamah um in Setan; Lalpa na Pathian na biah diing a, Amah nna chauh na tohsah diing ahi, chih gelh ahi, a chi a.

⁹Huin diabol in amah chu Jerusalem ah a pui a, Pathian biahinn tungzum ah a koih a, a kawmah, Pathian Tapa na hihleh hitah apat ke khesuh in;

¹⁰Ajiahchu Ama’n bang ahung kem diing a, a vaansawllehte thu a pe diing a,

¹¹Huleh amahun a khut un ahung nadom diing uh; huchilou inchu na keeng in suang na suikha diing, chih gelh ahi, a chi a.

¹²Huin Jesu’n a dawng a, a kawmah, Lalpa na Pathian na ze-et louh diing ahi, chih ahi, a chi a.

¹³Huin diabol in a heemna diing tenga a heem zohin hun lemtaanga diingin a paisanta hi.

¹⁴Huleh Jesu chu Hagau silbawltheihna in Galili gam ah a kileh kiitta a; huleh a tanchin chu hu gam kiim zousiah ah a thangsuahta hi.

¹⁵Huleh a kikhopna inn vah thu a hilh jel a, mi zousiah paahtawiin a umta hi.

¹⁶Huleh a khanletna khua Nazareth ahung tungta a; huleh a hihdan ngeina bangin khawlni in kikhopna inn ah a luut a, sim diingin a ding a.

¹⁷Huleh a kawmah zawlnei Isaiah lehkhabu a pia va, huin ama’n hu lehkhabu chu a pheet a, hi thu kigelhna laitah a mu a,

¹⁸Migentheite kawma Tanchinpha soi diing a ahung guat jiahin Lalpa Hagau chu ka tungah a um hi; ama’n chu lungtang hasete sudam diing leh, saltaangte kawma suahtaatna thu leh, mittawte kawma mit vaah kiitna thu soi diing leh, bawlsiat thuaahte zalensah diingin,

¹⁹Lalpa lungdam kum thu bang soi diingin ahung sawl hi, chih.

²⁰Huin lehkhabu chu a jial a, thunatongtu kawmah a pe kiit a, a touta hi. Huleh kikhopna inn a um mi zousiah mit chu a tungah a tu vehta hi.

²¹Huin ama’n a kawmvah, Tuni’n hi Pathian Lehkhabu thu chu na jah un ahung taangtungta ahi, a chita hi.

²²Huleh mi zousiah in a thu a heetpih va, a kam a pawt hehpihna thute chu limdang a sa mahmah uhi. Huleh amahun, Hipa hi Joseph tapa hilou ahiai mah? a chi uhi.

²³Huleh ama’n a kawmvah Nangun hi paunaah, Doctor, nang leh nang kisudam in, Kapernaum khua a na silbawlte ka na jah zousiah uh, hi-ah nangmah kholamah zong bawl in, na hung chi ngei diing uh, a chi a.

²⁴Huin ama’n, Chihtahzetin ka hung hilh ahi, zawlnei koimah amah gam sungah kipaahpih in a um ngei sih,

²⁵Hizongleh thutah ka hung hilh ahi, Elijah damlaia kum thum leh ha guup vaan a kikhaah a, khovel a kial nasatah a tun laiin Israel gam ah meithai tampi a um uh;

²⁶Hizongleh Sidon gam a Sarepta khua a meithainu khat kawmah chih louh a lahva koimah kawmah Elijah sawl ahi sih hi.

²⁷Huleh zawlnei Elisa damlai in Israel gam ah phaah tampi a um uh, hizongleh Syriami Naaman chih louh koimah suhsiangthou in a um sih uhi, a chi a.

²⁸Huleh kikhopna inn a um zousiah in hi thute a jah un a lungthah mahmahta uh.

²⁹Huleh a dingdoh va, amah chu khua a kipanin a delhdoh va, a khotaang kawlkhou ah sawnkhiah diingin a pui uhi.

³⁰Hizongleh amah chu a lahvah paisuaah in a chiahta hi,

³¹Huleh Galili gam a khua khat, Kapernaum ah a hungsuh a, huleh khawlnite in amah uh thu a hilh a.

³²Huleh thuneitah a, a soi jiahin a thuhilh chu limdang a sa mahmah uhi.

³³Huleh kikhopna inn ah dawiniin hagau nei mi khat a um a, huleh aw ngaihtahin a kikou a;

³⁴Ka tangun hung umsah in; Nazareth Jesu, Nang leh kei un bang ahiai kizopna i neih? keiuh sumang diing a hung na hi maw? nang kua na hiai chih ka hung he hi, Pathian misiangthou na hi, a chi a.

³⁵Huin Jesu’n a tai a, Sip inla, a sung apatin hung pawt in, a chi a. Huin dawiin amah chu a lai va a suhpuuh zohin a sung apatin ahung pawt a, amah a suna sih hi.

³⁶Huleh a bawnun thumah a sa mahmah va, Hikhu bang thu hi ata’i le! ajiahchu thuneitah leh silbawlthei tahin dawiniinte thu a pia a, a pawt mai uh, chi'n a kihou va.

³⁷Huleh hu kiim gam mun chinah a tanchin a thangta hi.

³⁸Huleh amah chu a thou a, kikhopna inn apat a pawt a, Simon inn ah a luut a. Huleh Simon ji nu chu nasatahin ana khosih a; huchi'n amah diingin ana ngetsah va.

³⁹Huleh amah chu amahnu geiah a ding a, khosih chu a tai a, huchi'n a phata hi; huleh ahung thoupah a, ana uh a tohsahta hi.

⁴⁰Huleh nitumkuan ahung hihin natna tuamtuam a na damlou nei zousiah a kawmah ahung pui va; huleh ama’n a tung chiat vah a khut ana nga a, a sudamta hi.

⁴¹Huleh dawite zong, Nang Khrist, Pathian Tapa na hi, chi a kikou in mi tampite sung apat ahung pawtdoh uhi. Huleh ama’n amahuh a tai a a haam diing uh a phalsah sih hi; ajiahchu Khrist ahi chih a he uhi.

⁴²Huleh khua ahung vaah in a pawt a, gamgaw munah a chiah a; mipite’n amah a hawl uh a, a kawmah a hung va, amahuh nuse lou diingin a hou uhi.

⁴³Huleh ama’n a kawmvah, Pathian gam thu chu kho dangah zong ka soi diing ahi; hu diing a sawl ka hi him ahi, a chi a.

⁴⁴Huleh Galili gam a kikhopna innte ah thu a soi jel hi.