Read Simte LUKE 6 Bible Online

LUKE 6 - Simte bible

LUKE 6

¹Huleh hichi ahung hi a, khawlni masapen zoh a khawlni nihna pen niin buhleite ah a paisuaah a; a nungjuite’n buhvui a sihtan va, a khut va nuaisiangin a ne va.

²Huleh Pharisai koite aha in a kawmah, Bang diinga khawlni a bawl sianglou na bawl uh ahiai? a chi va.

³Huleh Jesu’n a dawng a, David in a gilkial laia a lawite toh a silbawl uh simkha lou na hi viai mah?

⁴Huchia Pathian inn a, a luut a, siampute loungal neeh siang louh tanghou chu a laah a, a neeh a, huleh a lawite kawma zong a piah thu chu, a chi a.

⁵Huleh ama’n a kawmvah, Mihing Tapa chu khawlni Lalpa zong ahi, a chi hi.

⁶Huleh hichi ahung hi a, khawlni dangin kikhopna inn ah a luut a, thu a hilh a, huleh huah mi khat khut jiatlam zoi ana um a.

⁷Huleh lehkhagialtute leh Pharisaite’n a heehna diing a muhtheihna diingun, khawlnia a suhdam leh suhdamlouh a ensim va.

⁸Hizongleh ama’n a ngaihtuah uh a he a, khut zoipa kawmah, Thou inla, a lai ah dingdoh in, a chi a. Huin amah chu a thou a, a dingdohta a.

⁹Huin Jesu’n a kawmvah, Sil khat ka hung dong diing hi, Khawlni a sil hoih bawl ahiai siang, sil gilou bawl? Hutdam ahiai siang, suhlup? a chi a.

¹⁰Huleh a kiima umte zousiah a en vel a, hupa kawmah, Na khut zandoh in, a chi a. Huin ama’n a jan a; huchi'n a khut chu a langkhat lam bangin a damta hi.

¹¹Huleh amahuh chu a lungthah segawp va, Jesu tunga a bawl dan diing uh khat leh khat a kihouta uhi.

¹²Huleh hulaiin hichi ahung hi a, taang ah haamtei diingin a chiah a, Pathian kawmah jankhovaah in a haamtei hi.

¹³Huleh khovaah phetin a nungjuite a kou a; a lah vapat sawmlenih a teel a, a min u’zong sawllehte ahisah hi.

¹⁴Simon (ama’n Peter zong a chih) leh a unaupa Andru, Jakob leh John, Philip leh Bartholomai;

¹⁵Matthai leh Thoma, Alphai tapa Jakob, huleh Simon Zelot a chih uh,

¹⁶Huleh Jakob unaupa Juda, huleh a mansahtu Juda Iskariot zong ahi uh.

¹⁷Huleh amahuh toh a kitonsuh a, munjang ah a ding a, a nungjuite mi tampi leh, Judia gam pumpi leh Jerusalem a kipan leh Tura leh Sidon kho lama tuipi geia kipan mipi nasatah toh, hute chu thu ngai diing leh a damlouhnate uh suhdam ut in a hung va,

¹⁸Huleh hagau niin suhgentheihte zong a hung va; ahung dam vehta uh.

¹⁹Huleh amah a kipana silbawltheihna pawtkhia a amahuh zousiah a suhdam jiahin mipite’n a bawnun amah khoih a tum uhi.

²⁰Huin amah chu a khodaah a, a nungjuite a en a, Nanguh migentheite na hampha uh; ajiahchu Pathian gam nanguh a ahi.

²¹Nanguh tu a gilkialte na hampha uh; ajiahchu vah diing na hi uhi. Nanguh tu a kapte na hampha uh; ajiahchu nui diing na hi uhi.

²²Mihing Tapa jiaha mite’n ahung muhdah va, a lahva kipana ahung nohdoh va, ahung tai va, huleh na min uh hoihlouchia ahung pampaih chiangun na hampha uh ahi;

²³Hu niin kipaah unla, nuamin kidiang un; ajiahchu, ngai un, vaan ah na kipaahman uh a loupi ahi; Bang jiahin ahiai i chih leh huchimah bangin a pulepate un zawlneite ana bawl uhi.

²⁴Hizongleh nanguh mihausate na tunguh a gih hi; ajiahchu nangun na hamuanna uh na mu zouta uhi.

²⁵Nanguh tu a gil vahte na tunguh a gih hi; ajiahchu kial diing na hi uhi. Nanguh tu a nuite na tunguh a gih hi; ajiahchu mau a kap diing na hi uhi.

²⁶Mi zousiah in ahung phat chiangun na tunguh a gih hi; ajiahchu huchimahbangin a pulepate un zawlnei tahloute tungah ana bawl uhi.

²⁷Hizongleh nanguh ka thu ngaikhete kawmah ka hung hilh ahi, Na meelmate uh lungsiat unla, ahung mudahte hoihbawl un.

²⁸Haansia hung lohte vangpiah unla, ahung simmohbawlte diingin haamteisah un.

²⁹Na ngeiphe hung behsahtu kawmah a langkhat lam zong doh in; huleh na puanjal uh hung laahsahtu kawmah na puannaah uh laah zong nial sih un.

³⁰Na kawmva hung ngen photmah kawmah pia unla; huleh na thuampua uh hung laahsahtu kawmah ngen kiit nawn sih un.

³¹Huleh mi'n na tungva a bawl diing na deih bang ngei un, nangun zong amahuh tungah bawl un.

³²Bang jiahin ahiai i chih leh nanguh hung lungsiatte chauh na lungsiat uleh paahtaat bang na loh diviai? misualte’n zong amahuh lungsiattute a lungsiat uhi.

³³Huleh na tungva hoihte tung chauh a na hoih uleh paahtaat bang na loh diviai? ajiahchu misualte’n zong huchimahbangin a bawl uhi.

³⁴Huleh muh kiitna kinepnate uh kawm chauha na thunglaahsah uleh paahtaat bang na loh diviai? ajiahchu misualte’n zong a zahmah muh kiit diingin misualte kawmah a thunglaahsah uhi.

³⁵Hizongleh nangun chu na meelmate uh lungsiat unla, hoih bawl un, bangmah muh kiit kinem louin thunglaahsah un; huchi leh na kipaahman uh a loupi diing a, Tungnungpen tate na hi diing uhi; ajiahchu ama’n kipaahnadan heloute leh migiloute a hehpih veu hi.

³⁶Hujiahin na Pa uh mi hehpih a siam bangin nanguh zong mi hehpih siam un.

³⁷Soisel sih un, huchi'n soiselin na um sih diing uh; mohpaih sih un, huchi'n mohpaihin na um sih diing uh; huleh ngaidam un, huchi'n ngaihdamin na um diing uhi.

³⁸Pia un, huchi'n piah in na um diing uh; hoihtaha teh in, sawndet in, lohhal in, huleh dimlet in, mite’n na aangsung vah ahung pe diing uhi. Ajiahchu na tehna mah un ahung tehsah kiit diing uhi, a chi a.

³⁹Huleh ama’n a kawmvah tehkhinthu khat a soi a, Mittaw in mittaw mah a pui thei diai? a nih va kokhuuh a kekhawmta lou diing ahi viai mah?

⁴⁰Nungjui chu a pu tungah a um sih; hizongleh michih a bukim taphot chu a pu bangin a um diing hi.

⁴¹Huleh bang diinga nangmah mit a innkam um chu ngaihtuah lou a, na unaupa mit a niinthem um mu na hiai?

⁴²Nangmah mit a innkam mu loupi a, na unaupa kawma, Unaupa, na mit a niinthem um hung lakhesah in, bangchi a chithei na hiai? Nang milepchiah, na mit a inkam um chu lakhe masa in, huchileh na unaupa mit a niinthem laahkhiah diing chiantahin na mu thei diing hi.

⁴³Ajiahchu sing hoih a gah a se ngei sih a; huleh sing sia zong gah hoihin a gah ngei sih hi.

⁴⁴Sing chin a gah ah heet ahi. Ajiahchu mi'n lingkungah theipi a lou ngei sih va, huleh lingnoh lahah zong grep a lou ngei sih uhi.

⁴⁵Mihoih in a lungtang goubawm hoiha kipanin sil hoih ahung suahkhia a; huleh migilou in a lungtang goubawm sia a kipanin sil hoihlou ahung suahkhe veu hi. Bang jiahin ahiai i chih leh lungtang a dim val chu a ka min a soi ahi.

⁴⁶Huleh nangun bang diinga ka soite bawlloupi a Lalpa, Lalpa, hung chi na hi viai?

⁴⁷Koipouh ka kawma hunga, ka thusoite za a, huleh jui chu bang tobang mi ahiviai chih ka hung ensah diing;

⁴⁸Amah chu innbawlmi, thuuhtaha tou a, suangpi tunga innbul lem toh kibang ahi; huleh tui ahung letin tuikhauhin hu inn chu ahung khoh a, a suliing but sih hi; suangpi tunga bawl ahih jiahin.

⁴⁹Hizongleh ja ngal a jui lou chu, innbul kiptah a lem lou a, leitung maia innbawlmi bang ahi; huchu tuikhauhin ahung khoh a, a puuhpah hi; huleh hu inn siat chu ana sa ahi, a chi hi.