Read Simte LUKE 7 Bible Online

LUKE 7 - Simte bible

LUKE 7

¹Huleh mipite jah a, a thusoi zousiah a zoh nungin Kapernaum khua ah a luut a;

²Huleh sepaih zahoutu koi ahakhat suaah deihtah chu damlou in a si dehdeh a.

³Huleh ama’n Jesu tanchin a jah tahin, a kawma hunga, a suaahpa hung sudam diing a ngen diingin Juda upate a kawmah a sawl a.

⁴Huleh amahun Jesu kawm a va tun un, Amah chu hi sil na bawlsahtaah ahi,

⁵Ajiahchu ama’n ka nam uh a ngaina a, huleh ka kikhopna inn uh zong ahung bawlsah hi, chi'n hoihtahin a ngen va.

⁶Huin Jesu chu amahuh toh a hungta a. Huleh inn apat gamla lou ahung geiin, hu sepaih zahoutu in a kawmah a lawmte a sawl a, Lalpa, kisugim nuam dah mai in; ajiahchu ka innsung na luutna taah ahi sih hi;

⁷Hujiahin kei zong na kawma hung taah in ka kingai sih hi, hizongleh a thu in soi lechin ka suaahpa chu a dam mai diing hi,

⁸Ajiahchu kei zong mi thunuaia um ka hi a, ka nuaiah sepaihte a um a, khat kawma, Chiah in, ka chihleh a chiah a; huleh a dang kawma, Hung in, ka chihleh a hung a; huleh ka suaahpa kawma, Hi bawl in, ka chih leh a bawl jel hi, chi'n.

⁹Jesu’n hi thute a jah in, amah chu limdang a sa mahmah a, a kinunghei a, mipi amah juite kawmah, Na kawmvah ka soi ahi, Israelte laha zong hichi bang lawma ginna lian ka mukha sih hi, a chi a.

¹⁰Huleh hu a misawlte chu inn lamah a chiah kiit va, suaah damloupa chu damin a muta uhi.

¹¹Huleh hunungin hichi ahung hi a, amah chu Nain kichi khua khat ah a chiah a; huleh a nungjuite tamtah leh mipi tampi mahmahin a jui va.

¹²Huleh khopi kotkhaah kawm ahung tunin ngai in, misi khat ahung zawngdoh va, a nu tapa neihsun ahi a, amahnu chu meithai ahi a; huleh hu khua a mipi tampi a kawmah a um uh;

¹³Huleh Lalpa’n amahnu a muh tahin a hehpih mahmah a, huchi'n a kawmah, Kap sin, a chi a.

¹⁴Huin a hung a, a laang chu a khoih a; huleh a zawngtute chu a dingta uh; Huin ama’n, tangval, thou in, ka hung chi ahi, a chi a.

¹⁵Huleh hu misi chu ahung toudoh a, ahung haamta hi; huin ama’n amah chu a nu kawmah a pekheta hi.

¹⁶Huin mi zousiah ahung lauta va, Pathian a paahtawi va; I lahah zawlnei loupitah ahung suaahta; huleh Pathian in a mite ahung vehta ahi, chih.

¹⁷Huleh hi a tungtaang thu chu Judia gam pumpi leh a kiimvel gam zousiah ah a thangsuaahta hi.

¹⁸Huleh John nungjuite’n hi thu zousiah amah a hilh va.

¹⁹Huin John in a nungjuite laha mi nih a kou a, Jesu kawmah a sawl a, Ahung diingpa chu na hiai mah? ahihlouhleh midang hungaih nalai diing ka hi viai mah? chi'n.

²⁰Hute chu Bang diinga ahung tunun, Baptistu John in, Ahung diingpa chu na hiai mah? ahihlouhleh midang hungaih nalai diing ka hi viai mah? chi a na kawma ahung sawl ka hi uh, a chi va.

²¹Huleh hulai ngei in ama’n mi tampi, damloute, hiveite, huleh dawimatte a sudam a; huleh mittaw tampite mit a suhvaahsah a.

²²Huleh Jesu’n a dawng a, a kawmvah, Chiahta unla, na sil muh uleh na jahte u’chu John va hilh un; bangchi banga mittawte mit hung vaahta a, keengbaite ahung paitheita a, miphaahte ahung siangthouta a, bilngongte’n ahung ja theita a, misite kaihthoh in a umta a, huleh tagahte kawmah tanchinpha soi in a umta, chih.

²³Huleh koipouh ka tunga lunghih louhna mu lou chu a hampha hi, a chi a.

²⁴Huleh John misawlte a pai nungun ama’n mipite kawmah John tungtaang thu a soi panta a, Bang en diinga gamdai a chiahdoh na hi viai? sialluang huih muutliing maw?

²⁵Ahihlouhleh bang en diing a chiahdoh na hi viai? Puannem silh maw? Ngai un, puan loupi silh leh mi nuamsate chu kumpipate inn ah ahi a um uh.

²⁶Ahihlouhleh bangpen en diing a chiahdoh na hi viai? zawlnei maw? Ahi, ka hung chi ahi, zawlnei sanga loupizaw ahi.

²⁷Ngai in ka thangkou na ma ah ka sawl a, ama’n na ma ah na lampi a siam diing, chia a tanchin kigial chu amah ahi.

²⁸Numei hin lahah Baptistu John sanga loupizaw zawlnei a um sih; hizongleh Pathian gam a neupen zong amah sangin a loupizaw hi, chih ka hung hilh ahi, a chi a.

²⁹Huleh a thu ja zousiah leh siahdongte’n chu John baptisma tang in, Pathian siam a tan uhi.

³⁰Hizongleh Pharisaite leh daanhetute’n chu a kawma baptisma tang louin Pathian in amahuh diing a, a lemguatsah chu a nualta uhi.

³¹Huin Lalpa’n, Tulai khang thahte bang toh ka tehkhinta diai? huleh bang tobang ahi viai?

³²Amah u’chu naupang dawlmun a tou a, khat leh khat kikoutuah a, Theile ka hung muutsah va, na laam sih va; ka hung kah uh lelah na kap tuan sih uh, kichite bang ahi uhi.

³³Bang jiahin ahiai i chih leh Baptistu John chu an lah nelou, uain lah dawn louin ahung a, huleh nangun amah chu dawipaai ahi, na chi uh.

³⁴Huleh mihing Tapa chu ne leh dawnin a hung a, huleh nangun, Endih vua, an haipa, uain haipa, siahdongtute leh misualte lawmpa, na chi jel uh.

³⁵Hizongleh pilna chu a tate zousiah in siam a tan uhi, a chi hi.

³⁶Huleh Pharisaite laha khat in amah toh an neehkhawm a ut a. Huin amah chu Pharisaipa inn ah a luut a, ankuang ah a touta a.

³⁷Huleh ngai in, hu khua a um numei sual khat in Jesu Pharisaipa inn ah an ne in a tou chih a heetin Alabastar bawmin thau gimtui ahung tawi a,

³⁸A nungah a keeng bulah kapkawmin a ding a, a keengphaangte chu a mittui in a sukawt a, a sam in a siaah a, huleh a keengpeh a tawp a, thau gimtui a nuh hi.

³⁹Huleh Pharisai amah koupa’n hikhu a muh in a lungsim in, Hipa zawlnei ahihleh hi a khoihnu koi ahiai, huleh bangchi bang mi ahiai chih he leh kilawma, amah lah misual ahi ngal a, a chi a.

⁴⁰Huin Jesu’n a dawng a a kawmah, Simon, na kawmah soinuam khat ka nei hi, a chi a; Huin ama’n, Houtupa soita’n, a chi a.

⁴¹Sum thunglaahsahtu koi ahakhat in leibatu nih a nei a; khat in makhai ja ngaa a ba a, huleh khat in sawmngaa.

⁴²Huleh a ditna diing a neih louh tahun a nih un a ngaidam tuaahta hi. Hujiahin, hung hilh in, a lahva koi zaw in amah a lungsiat naah zaw diai? a chi a.

⁴³Simon in a dawng a, A ngaihdam tam zawpa’n hi diingin ka ngaihtuah, a chi a. Huin ama’n a kawmah, Na chi dih hi, a chi a.

⁴⁴Huleh ama’n numeinu lam a nga a, Simon kawmah, Hi numeinu na mu ei? Na innsungah ka hung luut a, nang ka keeng silna diing tui na hung pe sih hi; hizongleh amahnu’n chu a mittui in ka keengpeh a sil a, a sam in a siaah hi.

⁴⁵Nang chu tawp zong na hung tawp sih a; hizongleh hi numeinu’n chu ka hung luut a kipanin ka keengpehte tawp a khawl nai sih hi.

⁴⁶Nang chu ka lu sathau na hung nuh sih a; hizongleh hi numei in chu ka keengpehte thau gimtui ahung nuh hi.

⁴⁷Hujiahin ka hung hilh ahi, a sualna tampi chu ngaihdam ahita hi; a lungsiat naah mahmah jiahin; hizongleh tawm ngaihdamnate’n a lungsiat tawm uhi, a chi a.

⁴⁸Huin ama’n numeinu kawmah, Na sualte ngaihdam ahita hi, a chi a.

⁴⁹Huleh amah toh ankuang a toukhawmte’n a lungsim un, Sualnate zong ngaidam, hipa hi kua ahiai, a chi va.

⁵⁰Huin ama’n numeinu kawmah, Na ginna in ahung hundamta hi; hamuangtahin chiahta in, a chi hi.