Read Simte LUKE 8 Bible Online

LUKE 8 - Simte bible

LUKE 8

¹Huleh hichi ahung hi a, hunungin Jesu chu thuhilh kawm leh Pathian gam tanchinpha soi kawmin kholian leh khoneu ah a vaah lehleh a, huleh sawmlenihte chu a kawmah a um uhi.

²Huleh numei kuate aha, dawipaai dam kiit leh natnate apat dam kiit Mari Magdalene a chih uh, a sung apat dawi sagih pawtdohnanu toh,

³Huleh Herod sumkoltu Chuza ji Joanna toh, Susanna toh, huleh midang tampite toh ahi va, hute’n chu a neihsa un a nna a tohsah jel uhi.

⁴Huleh mipi nasatah hungkhawma, khochina mi a kawma a hung tahun, tehkhinthu a soi a;

⁵Buhchithehtu khat buhchi theh in a kuan a; huleh a theh laiin khenkhat lampi geiah a tu a, huchu a kituanchil a, huleh tungleeng vate’n a tom beita hi.

⁶Huleh khenkhat suang tungah a tu a; huleh ahung pou pan leh a vulpahta hi, a lei a nom louh jiahin.

⁷Huleh khenkhat chu loulingnei lahah a tu a; huleh ling toh ahung poukhawm a, a deep lumta hi.

⁸Huleh a dang chu lei hoih ah a tu a, ahung pou a, a lehza in a gahta hi, a chi a. Huleh hithute a soi zohin a kikou a, Koipouh jahna diing a bil nei in ja heh, a chi a.

⁹Huleh a nungjuite’n, Hi tehkhinthu hi bang chihna ahiai? chi'n amah a dong va.

¹⁰Huleh ama’n, Pathian gam thuguuhte chu nanguh diingin heet phal ahi a; hizongleh midang kawmah chu tehkhinthu a soi ahi; mu zing ngal a a muh louhna diing uleh, ja zing ngal a, a heetsiamlouhna diingun.

¹¹Hu tehkhinthu chu hikhu ahi; Buhchi chu Pathian thu ahi a.

¹²Huleh lampi geia tute chu thu jate ahi uh; huin diabol chu a hung a, thu chu a lungtang vapat a lamang hi, a gintaat va hutdama a um louhna diingun.

¹³Suang tungate chu hichi bangte ahi uh, a jah tahun thu chu kipaahtahin a pom va; huleh hite’n chu zung a nei sih a, tomkhat sunga gingta va, heemna a tuaah chiangun a puuh veu uhi.

¹⁴Huleh loulingnei laha tute chu hichibangte ahi uh; a jah nungun a chiah va, khosah diingdan ngaihtuahnate, hauhsatnate, huleh damsung nopsahnate’n a deep a, a gah piching ngei sih hi.

¹⁵Hizongleh lei hoiha tute chu hichibangte ahi uh; lungtang siangthou leh hoihin thu chu a ja va, a pom va, huleh kuhkaltahin gah a suang uhi.

¹⁶Mi koimah in thaumei a det chiangin kuang in a khuh ngei sih, ahihlouhleh lupna nuaiah zong a koih ngei sih hi; hizongleh a luut photmahin a muh theihna diingin a koihna ah a koih zaw hi.

¹⁷Ajiahchu kiphuang lou diing a iim bangmah a um sih a, huleh heet louh diing leh kilang lou diing a phual zong bangmah a um sih hi.

¹⁸Hujiahin bangchi'n ahiai na jah uh pilvaangun; ajiahchu koi hizongleh a nei chu piahbeh ahi diing a, huleh koi hizongleh a nei lou chu neia a kingaih nasan laahsah ahi diing hi, a chi hi.

¹⁹Huleh a kawmah a nu leh a unaute a hung a, huleh mipi jiahin a kawm a tung thei sih va.

²⁰Huleh, Na nu leh na unaute nang hung mu nuamin innpua ah a ding uh, chi'n a hilh uh a,

²¹Huin ama’n a dawng a, a kawmvah, Ka nu leh ka unaute chu hi Pathian thu ngaikhia a juite ahi uh, a chi hi.

²²Huleh hichi ahung hi a, ni khat chu a nungjuite toh kuang ah a tuang a; huleh ama’n a kawmvah, Diil gaal lehlamah i kai diing uh, a chi a. Huleh kuang chu phelin a tawlta va.

²³Hizongleh a kitawl laiun amah chu a ihmuta a; huleh hu diil tungah huihpi ahung nungsuh a; a kuang uh tui in a dimta a, huleh lauthawng huai tahin a umta hi.

²⁴Huleh amahuh chu a kawmah ahung va, a phawng va, Houtupa, houtupa, beimang ka hita uh, a chi va. Huin amah chu ahung thou a, huih leh tuikinawh chu a taita a; huin a tawp a, ahung daaita hi.

²⁵Huin ama’n a kawmvah, Na ginna uh khoia um ahiai? a chi a. Huleh amahun chu lauin limdang a sa mahmah va, Hipa hi bangtobang mi hi ahiai! ajiahchu huihte leh tui nasan thu a pia a, a mang mai uh, a kichi va.

²⁶Huleh Galili gaal zawna um Gadarate gam ahung tungva.

²⁷Huleh amah gam a a kaidoh tahin hun sawtpi dawi paai koi ahakhat in khopi apat amah ana kituaahpih a; ama’n chu puan a silh sih a, huleh inn mawngmawng a zong a um sih a, haante chauh ah a um veu hi.

²⁸Huleh ama’n Jesu a muh tahin, a kikou a, a ma ah a puuh a, huleh aw ngaihtahin, Jesu, Nang Pathian Tungnungpen Tapa, kei leh nangin kizopna bang i nei ei? hung sugim lou diingin ka hung ngen ahi, a chi a.

²⁹(Ajiahchu ama’n dawiniin chu mipa sunga kipan pawt diingin thu ana peta hi. Tamveipi dawiniin in amah chu a mankhata a; khainiang leh kol buhsah in a um a; huleh ama’n a kikaannate chu a phutan a, gamdaiah dawi delhmang in a um veu hi)

³⁰Huleh Jesu’n a kawmah, Na min bang ahiai? chi'n a dong a Ama’n, Nuai, a chi a; a sunga dawi tampi a luut jiahin.

³¹Huleh amahun kokhuuh thuuh a chiah diing a thu pe lou diingin amah a ngen va.

³²Huleh hu munah taang ah voh hon tampi a ta va; amahun hute sunga a luut uh phalsah diingin a kawmah a ngen va. Huleh ama’n a phalsah hi.

³³Huin dawite chu hu mipa sunga kipan pawt in vohte sungah a luut va; voh hon chu diil lamah munkeenah a taisuh huthut va, tui valh in a sita uhi.

³⁴Huin a khawite’n sil umdan a muh tahun a tai va, hi thu khopi leh khoneu ah a va soi uhi.

³⁵Huin bang thu ahitai chi a en diingin ahung pawt va; huleh Jesu kawm ahung tun uleh dawi matpa chu puan silh a, lungsim hoihtah pua a Jesu keengbula tou ahung mu va; huleh a lauta uhi.

³⁶Huleh a mute’n dawimatpa suhdama ahung umdante amahuh ana hilh va.

³⁷Huin Gadara gam kimvela mi zousiah in a lau mahmah jiahun amah chu a kawmva kipan chiahmang diingin a ngen va; huin amah chu kuang sungah a luut a, a kiih kiitta hi.

³⁸Huleh a sunga kipana dawi hung pawtnapa’n chu a kawma umden diingin a ngen a; hizongleh Jesu’n amah chu a sawlkhia a,

³⁹Na inn ah chiah kiit inla, Pathian in na tunga bangchituh a sil loupi hung bawlsah ahitaimah chih va hilh in, a chi a. Huin amah chu a chiahta a, Jesu’n sil loupitah amah diing a, a bawlsah chu khopi pumpi ah a phuangjahta hi.

⁴⁰Huleh hichi ahung hi a, Jesu chu ahung kinungleh kiitin mipi’n amah nasatahin ana kipaahpih va; ajiahchu a bawnva amah na ngaah zing ahi uh.

⁴¹Huleh ngai in, pasal khat a min Jaira kichi kikhopna inn vaihawmtu a hung a; Jesu keengbulah a khupboh a, a inn a hung diingin a ngen a.

⁴²Ajiahchu ama’n tanu kum sawmlenih vel pha khat chauh a nei a, amah chu laitat in a lum a. Hizongleh Jesu a chiah tahin mipi’n a tuam huthut uh a.

⁴³Huleh numei khat kum sawmlenih sipuut, a neih zousiah doctorte kawma zangbeita a, hizongleh koima’n a suhdam zoh louh uh,

⁴⁴A nungah a hung a, a puan mong a khoih a; huin thakhat in a sipuut chu a kangta hi.

⁴⁵Huin Jesu’n, Koi ahiai ahung khoih? a chi a. Huleh mi zousiah in kei ka hi sih a chih chiat phetun Peter leh a lawite’n, Houtupa, mi honpi’n hung tuam a, hung neh huthut a, Koi ahiai hung khoih na chih, a chi va.

⁴⁶Jesu’n, Koi ahakhat in ahung khoih hi; ajiahchu silbawltheihna ka sunga kipanin a pawt hi chih ka he hi, a chi a,

⁴⁷Huin numeinu’n a kiphual theih louh a muh tahin kiliing pum in a hung a, a ma ah a puuh a, mipi zousiah maaiah a kawmah a khoih nasan leh ahung dampahdan a phuangta a.

⁴⁸Huin Jesu’n a kawmah, Tanu, hamuangtahin um in; na ginna in ahung damsah ahi; lungmuangtahin chiahta in, a chi a.

⁴⁹Ama’n hichia thu a soi laiin kikhopna inn vaihawmtu inn a kipanin mi khat a hung a, Na tanu a sita hi, Houtupa subuai dah mai in, a chi a.

⁵⁰Hizongleh Jesu’n hi a jahin a dawng a, a kawmah, Lau sin; gingta mai in, huchi'n amah chu a damdoh kiit diing, a chi a.

⁵¹Huleh inn sunga a luut tahin Peter toh, Jakob toh, John toh huleh naupang pa leh nu chih louh koimah luut a phal sih a.

⁵²A bawnun amahnu kahin ana mau jenjun va; hizongleh ama’n, Kap sih un; a si sih hi, a ihmu ahi zaw, a chi a.

⁵³Amahun amahnu a sita chih a heet jiahun amah chu musit in a nuihsan uhi.

⁵⁴Huleh ama’n a bawnun a sawldoh veh a, amahnu chu a khut in a tu a, Nungaah, thou in, chi'n a kou a.

⁵⁵Huin a hagau ahung kiit a, a thoukhepah a; huin amahnu chu neeh diing pe diingin thu a pia hi.

⁵⁶Huleh a nu leh a pa’n limdang a sa mahmah va; hizongleh hu sil kibawl chu koimah hilh lou diingin ama’n amahuh a khapta hi.