Read Simte JOHN 1 Bible Online

JOHN 1 - Simte bible

JOHN 1

¹A chiilin Thu a um a, Thu chu Pathian kawmah a um hi, huleh Thu chu Pathian ahi.

²Humah chu a chiilin Pathian kawmah a um hi.

³Sil zousiah amah siam ahi a; silsiam himhim amah siamlouh bangmah a um sih hi.

⁴Amah ah hinna a um a, hu hinna chu mihingte vaahna ahi.

⁵Vaah chu mial ah ahung vaah a, mial in huchu a he sih hi.

⁶Pathian a kipan a sawl mi khat a um a, a min John ahi.

⁷Humah chu heetpihtu diingin a hung a, hu vaah thu heetpih diingin, mi zousiah in amah jiaha a gintaat theihna diingun.

⁸Amah chu hu Vaah ahi sih a, hizongleh hu Vaah heetpih diing a sawl ahi zaw hi.

⁹Huchu Vaah dihtah, mi chin khovel a hung photmah hih vaahtu ahi.

¹⁰Amah chu khovel ah a um a, khovel amah siam ahi; huleh khovel in amah a he sih hi.

¹¹Amah a mite kawmah a hung a, amah a mite’n ana kipaahpih sih uh.

¹²Hizongleh amah kipaahpih photmahte chu a kawmvah Pathian tate hihtheihna diing silbawltheihna a pia hi, a min gingtate chu.

¹³Hute chu sisana piang ahi sih va, tahsa deihdana piang zong ahi sih va, huleh mihing deihdana piang zong ahi het sih uh; hizongleh Pathiana piang ahi zaw uhi.

¹⁴Huleh Thu chu sa ahung suaah a, i lahah a um hi, (Pa ta khat neih loupi bangin a loupi jia i mu uh) hehpihna leh thutah a dim.

¹⁵John in a thu a heetpih a, a kikou a, Ka nunga hung pai pa in ahung makhelhta hi, ka ma a um mawng ahihjiahin, chia a thu ka soi pa khu amah ahi,

¹⁶A taangchinna i tang chiat uh, hehpihna tunga hehpihna sawn toh,

¹⁷Ajiahchu daan thu chu Mosi manga piah ahi a; hizongleh hehpihna leh thutah chu Jesu Khrist jiahin ahung um hi.

¹⁸Kuama’n bangchihmahin Pathian a mu ngei sih; Tapa tang neihsun, Pa aangsunga umpa, amahin a tanchin a phuangta hi, chi in.

¹⁹Hichu Judate’n Jerusalem a kipan siampu leh Levimite a kawm a, Kua na hiai, chia dong diing a, a sawl lai va John thu theihsah ahi.

²⁰Huleh amah chu panglou in a kiphuang a, Khrist chu ka hi sih chi'n a kiphuang hi.

²¹Huin amahun, Ahihleh kua na hiai? Elijah na maw? chi'n a dong va. Ama’n, Ka hi sih, a chi a. Hu zawlnei na moleh? a chi va. Ama’n, Hilou, chi'n a dawng a.

²²Huin amahun a kawmah, Kua na hiai? ahung sawlte ka dawn theihna diingun hung hilh in nangle nang kua ka hi kichi na hiai? a chi va.

²³Ama’n, zawlnei Isaiah soi banga, Lalpa lampi sial tangun, chia gamdaia kikoupa aw chu ka hi, a chi a.

²⁴A misawlte uh chu Pharisaite laha mi ahi va.

²⁵Huleh amah a dong va, a kawmah, Khrist lah hilou, Elijah lah hilou, huleh hu zawlnei lah hilou na hihleh bang diing a na baptis ahiai? a chi va.

²⁶John in amahuh a dawng a, Ken chu tui in ka baptis a, hizongleh na heet louh uh khat na lahvah a ding hi;

²⁷A keengtophah khau zong suut taah ka hih louh, ka nunga hung pai ahung makhelhpa, amah chu hupa ahi, a chi a.

²⁸Hi silte chu Jordan ka la Bethabara, John in a baptis na muna kibawl ahi.

²⁹A jingni’n John in Jesu a kawm lama hungin a mu a, En un Pathian Belaamnou, khovel sualna pomangpa chu,

³⁰Hipa chu ahi, Mi khat ahung makhelhpa ka nungah ahung pai hi, ka ma a umsa mawng ahihjiahin, chia kana soi pa chu.

³¹Huleh ke'n amah kana he sih; hizongleh Israelte kawma a kisuhlat theihna diingin tuia baptis in ka hung ahi, a chi a.

³²Huleh John in a thu a heetpih a, Hagau vakhu banga vaan a kipan a hung kumsuh a, a tunga tuangden ka mu hi.

³³Ken amah kana he sih; hizongleh tuia baptis diing a hung sawlpa amahmahin ka kawmah, Kua tungah zong Hagau hung kumsuh a, a tunga tuangden na muh penpen, amah chu Hagau Siangthou a baptis diingpa chu ahi ahung chi a.

³⁴Huchu ka mu a, huleh hipa chu Pathian Tapa ahi chih ka heetpih ahi, a chi a.

³⁵A jing kiitin John chu a ding a, a nungjuite nih toh.

³⁶Huleh Jesu vaahlehleh lai a mu a, En un, Pathian Belaamnou, a chi a.

³⁷Hu nungjui nihte’n a thusoi a ja va, Jesu a juita uhi.

³⁸Huin Jesu a kihei a, ahung juih uh a muh in a kawmvah, Bang ahiai na hawl uh? a chi a. Amahun a kawmah, Rabbi, (huchu, Houtupa chihna ahi) khoiah ahiai na teen? a chi va.

³⁹Ama’n a kawmvah, Hung unla, en un, a chi a. Huin amahuh chu a hung va, a teenna a en va, huleh a kawmah huni a um uh, daah sawmna vel ahih jiahin.

⁴⁰John thusoi ja, Jesu juite geel laha khat chu Simon Peter sanggampa Andru ahi a.

⁴¹Ama’n a masapenin amah ngei sanggampa Simon a mudoh a, a kawmah, Messiah, Khrist kichipa chu ka muta uh, a chi a.

⁴²Huleh amah chu Jesu kawmah ahung pui a. Jesu’n amah a en a, Nang chu Jona tapa Simon na hi a; Kipha ahung kichita diing hi, a chi a, huchu Suang chihna ahi.

⁴³Huleh a jingni’n Jesu’n Galili gam ah chiah a tum a, Philip a mu a, a kawmah, Hung jui in, a chi a.

⁴⁴Philip chu Andru leh Peter teenna khua Bethsaida a teeng ahi a.

⁴⁵Philip in Nathanael a mu a, a kawmah, Mosi in daan lehkhabu a, a tungtaang ana gelh leh, zawlneite’n ana gelh uh Nazareth Jesu, Joseph tapa chu ka muta uh, a chi a.

⁴⁶Huin Nathanael in a kawmah, Nazareth a kipanin sil hoih a piang thei eimah? a chi a. Philip in a kawmah, Hung en in, a chi a.

⁴⁷Jesu in Nathanael a kawm zuana chiah a mu a, a kawmah, En un, giitlouhna nei lou, Israel mitah chu, a chi a.

⁴⁸Nathanael in a kawmah, Bang na hung chi heet ahiai? a chi a. Jesu’n a dawng a, a kawmah, Philip in nang ahung kouh ma in, theipi kung nuaia na um laiin ka hung mu hi, a chi a.

⁴⁹Nathanael in a dawng a, a kawmah, Rabbi, Pathian Tapa na hi; Israelte Kumpipa na hi, a chi a.

⁵⁰Jesu’n a dawng a, a kawmah, Theipi kung nuaiah ka hung mu na kawm a ka chih jiaha gingta na hi maw? hi silte sanga loupizaw na hung mu diing hi, a chi a.

⁵¹Huleh Jesu’n a kawmah, Chihtahzetin, chihtahzetin ka hung hilh ahi, Tunung vaan kihong a, Pathian angelte mihing Tapa tunga kal leh kum na muta diing uhi, a chi hi.