Read Simte JOHN 10 Bible Online

JOHN 10 - Simte bible

JOHN 10

¹Chihtahzetin, chihtahzetin ka hung hilh ahi, Koipouh kotkhaah a luutlou a, lamtuama kala belaam huanga luut chu guta leh suammang ahi.

²Hizongleh koipouh kotkhaah a luut chu belaampu ahi.

³Amah chu kotkhaah ngaahpa’n ana honsah a; belaamte’n a aw a ja uh; huleh ama’n a belaamte chu a min un a kou a, a puidoh veu hi.

⁴Huleh a belaamte a pawtdohsah chiangin a ma vah a pai a, belaamte’n a nung a jui uh; a aw a heet jiahun.

⁵Midangte chu a jui sih diing va, a taimangsan zaw diing uh; ajiahchu midang aw a ja thei sih uh, a chi a.

⁶Hi tehkhinthu Jesu’n a kawmvah a soi a; hizongleh amahun a kawmva bang thu ahiai a soi chih a he sih uhi.

⁷Huin Jesu’n a kawmvah, Chihtahzetin, chihtahzetin ka hung hilh ahi, Kei belaam kotkhaah chu ka hi.

⁸Ka ma a hung pai zousiah chu gutate leh suammangte ahi uh; hizongleh belaamte’n a thu uh a ngai sih uhi.

⁹Kei kotkhaah chu ka hi; koipouh keimaha a luut leh hutdam in a um diing; huleh luut in a pawt diing a, neeh diing a mu diing hi.

¹⁰Guta chu gu diing leh, that diing leh, suse diing loungalin ahung sih; kei chu amahun hinna a neihna diing uleh, tampi a, a neihna diing va hung ka hi.

¹¹Kei belaampu hoih chu ka hi; belaampu hoihin a belaamte diing in a hin na a pia hi.

¹²Hizongleh kiloh, belaampu tahlou, belaamte amah a hilou inchu ngei hung a muh chiangin belaamte a nusia a, a tai veu; huleh ngeiin amahuh a man a, a sudalh veu hi.

¹³Kiloh chu a tai veu; kiloh ahihjiahin, huleh belaamte a ngaihsah sih hi.

¹⁴Kei belaampu hoih chu ka hi, huleh ka belaamte ka he a, amahun zong kei ahung he uhi.

¹⁵Pain kei ahung heet bangin ke'n zong Pa ka he hi; huleh belaamte diingin ka hinna ka pia hi.

¹⁶Huleh hi belaam huang a lou belaam dang ka nei hi; amah u’zong ka hung pui diing a, ka aw a ja diing uh; huleh hon khat in a um diing va belaampu khat toh.

¹⁷Hujiahin ka Pain ahung lungsiat hi, laah kiit diing a ka hinna ka piah jiahin.

¹⁸Koima’n ahung laahsah ahi sih a, ka thuin ka pia ahi zaw hi. Piah theihna leh laah kiit theihna thu ka nei hi. Hi thupiah ka Pa apat ka muta hi, a chi a.

¹⁹Hujiahin hi thute jiahin Judate lahah kikhenna a um kiitta hi.

²⁰Huleh a lahva tampi in, Dawipaai ahi, a ngol ahi; bang diing a, a thu ngaikhia na hi viai? a chi va.

²¹Adangte’n, Hi thute dawipaai mi thusoi ahi sih; dawiin mittaw mit a suvaah thei eimah? a chi uhi.

²²Huleh Jerusalem a kipumpiahna gual vaah lai ahi a; phalbi lai ahi.

²³Jesu chu Pathian biahinn ah Solomon innliimah a vaah lehleh a.

²⁴Huleh Judate a kiimvelaha hung va, a kawmah, Bangtan ahiai lungawpkai a na hung koih diing? Khrist na hihleh chiantahin hung hilh in, a chi va.

²⁵Jesu’n amahuh a dawng a, Ka hung hilhta a, na gingta sih uh; ka Pa mina ka natohte’n ka tanchin ahung heetpih uhi.

²⁶Hizongleh na kawmva ka soi taah mah bangin ka belaam laha mi na hih louh jiahun na gingta sih uh.

²⁷Ka belaamte’n ka aw a ja uh, ke'n amahuh ka he hi; huleh amahun ahung jui uhi.

²⁸Huleh keima’n a kawmvah kumtuang hinna ka pia hi, kumtuang in a mangthai sih diing va, koima’n ka khut apat ahung laahsah thei sih diing uh;

²⁹Ka Pa amahuh hung pepa mi zousiah sangin a lian zaw hi; koima’n ka Pa khut apat ahung laahsah sih diing hi.

³⁰Kei leh ka Pa khat ka hi uh, a chi a.

³¹Huin Judate’n a sehna diingin suang a la kiit va.

³²Jesu’n a kawmvah, Na hoih tampi ka Pa akipanin nanguh ka hung musah a, hu nnate laha khoipen jiahin ahiai suang a na hung sehtum uh? a chi a a dawng a.

³³Judate’n a dawng va, Natoh hoih jiahin suang in seh ka hung tum uh ahi sih a; hizongleh Pathian na soisiat jiah leh, nang mihing hi ngal a, Pathian banga na kibawl jiahin ahi zaw, a chi uh.

³⁴Jesu’n a kawmvah, Na daan lehkhabu vah, pathiante na hi uh, ka chi, chih gelh hilou ahiai mah?

³⁵Pathian thu tunnate bawn pathiante chi ahihleh, Pathian lehkhathu lah suhsiat theih ahi sih a;

³⁶Pa in a guat, khovel a, a sawlpa tungah, Pathian Tapa ka hi ka chih jiahin Pathian na soisia na hung chi uh ahi maw?

³⁷Ka Pa natohte ka toh louhleh hung gingta sih un,

³⁸Hizongleh ka toh a ahihleh, kei hung gingta sih mah zong leh u’chin natohte beeh gingta un; Pa keimah ah a um a, kei amah ah ka uhi chih na heet va, na gintaat theihna diingun, a chi a.

³⁹Hujiahin amah mat a tum kiit va; hizongleh a khut vapat a pawt a,

⁴⁰John in a chiil a baptis a bawlna mun, Jordan gaal aha chiah kiita, hutah ah a va umta hi.

⁴¹Huleh mi tampi a kawmah a hung va, John in silmah bangmah bawl a nei sih, hizongleh hipa tungtaanga John in a soi zousiah a dih veh hi, a chi va.

⁴²Huleh hutah ah mi tampi’n amah a gingta uhi.