Read Simte JOHN 11 Bible Online

JOHN 11 - Simte bible

JOHN 11

¹Huleh mi khat, Mari leh a sanggamnu Martha teenna khua Bethani khua a um, a min Lazar kichi a chi na a.

²(A sanggampa Lazar china nu chu Lalpa thau namtui nuh a, a sama a keeng siaahnu Mari chu ahi).

³Hujiahin a sanggamnute’n Jesu kawmah, Lalpa ngai in, na lungsiatpa a chi na hi, chi'n mi a sawl va.

⁴Jesu’n hu thu a jahin, Hi natna chu sihna diing hial ahi sih a, hizongleh hi jiaha Pathian Tapa paahtawia a um theihna diing a Pathian loupina diing ahi zaw hi, a chi a.

⁵Jesu’n Martha leh a sanggamnu leh Lazar a lungsiat hi.

⁶Hujiahin a chi na chih a jahin a umna mun mah ah ni nih a um nalai hi.

⁷Huzohin a nungjuite kawmah, Judia gam ah i chiah kiit diing uh, a chi a.

⁸A nungjuite’n a kawmah, Houtupa, tuma deuh mahin Judate’n suang in seh ahung tum va, hutah ah chiah na sawm kiit maw? a chi va.

⁹Jesu’n a dawng a, Suun khat sungin daahkal sawmlenih a um sih eimah? Mi koizong suuna a vaah inchu a kisui ngei sih, hi khovel vaah a muh jiahin.

¹⁰Hizongleh mi koizong jan a, a vaah inchu a kisui veu hi, amah a vaah a um louh jiahin, a chi a.

¹¹Hi thute ama’n a soi a, huzohin a kawmvah, i lawmpa uh Lazar a ihmuta, hizongleh a ihmutna apat phawng diingin ka chiah diing, a chi a.

¹²Huin a nungjuite’n, Lalpa, ihmu ahih inchu a dam kiit na diing hi, a chi va.

¹³Ahiinlah Jesu’n a sih thu a soi ahi a; hizongleh amahun ihmu a khawldam thu soi hiin a ngaihtuah uhi.

¹⁴Huin Jesu’n chiantahin a kawmvah, Lazar a sita hi,

¹⁵Huleh nanguh vanga hutah a ka um louh ka kipaah hi, na gintaat theihna diingun; Ahiinlah a kawmah i chiah diing uh, a chi a.

¹⁶Huin Thoma, Didum a kichipa’n a nungjui hihpihte kawmah, Amah toh i sihkhawm theihna diingin ei u’zong i chiah diing uh, a chi a.

¹⁷Huin Jesu ahung tunin amah haanah ni li ana umta chih ahung heta.

¹⁸Bethani chu Jerusalem khokawm naih, chiing sawmlengaa vela gamla ahi a.

¹⁹Huleh Judate tampi Martha leh Mari kawmah a hung va; a sanggampa uh sih na tunga amahuh hehnem diingin.

²⁰Huin Martha chu, Jesu ahung chih a jah tahin, a chiah a, amah a va lamtuah a; hizongleh Mari chu inn sungah a tou nalai hi.

²¹Huin Martha in Jesu kawmah, Lalpa, hitaha um hilechin chu ka sanggampa si lou diing hi a,

²²Hizongleh tuin zong Pathian kawma na nget photmah Pathian in ahung pe diing chih ka he hi, a chi a.

²³Jesu’n amahnu kawmah, Na sanggampa a thou kiit diing hi, a chi a.

²⁴Martha in a kawmah, Ni tawpni a misite thoh kiit na ah a thou kiit diing chih chu ka he hi, a chi a.

²⁵Jesu’n amahnu kawmah, Kei thoh kiit na leh hinna ka hi; koipouh kei hung gingta chu si mah zongleh a hing diing;

²⁶Huleh hinga hung gingta photmah chu bangchih tanin a si sih diing hi. Hikhu na gingta ei? a chi a.

²⁷Amahnu’n a kawmah, Hi, Lalpa, nang chu Khrist, Pathian Tapa, khovel a hung diingpa chu na hi chih ka gingta hi, a chi a.

²⁸Huchi a, a soi zohin a chiah a, a sanggamnu Mari chu a guuh in a kou a, Houtupa a hung a, ahung kou hi, a chi a.

²⁹Amahnu in hu a jahin kintahin a thou a, a kawmah ahung a,

³⁰Jesu chu khosung ahung tung nai sih a, Martha in a va lamtuahna munah a um nalai hi.

³¹Huin Judate, inn sunga amah hehnema amah toh umte’n Mari chu kintaha thou a pawtdoh a muhun a nung a jui va, Haanah kap diingin a chiah, chi in.

³²Huin Mari in Jesu umna mun ahung tun a, amah a muh in, a keengbulah a puuh a, a kawmah, Lalpa, hitaha um hilechin chu ka sanggampa si lou diing hi a, a chi a.

³³Jesu’n Mari kap leh, amah toh hung Judate zong kapa um a muh in lungsim in a thuum a, huleh a mangbang a.

³⁴Huleh, Amah khoiah na sial viai? a chi a. Amahun a kawmah, Lalpa, hung inla, en in, a chi va.

³⁵Jesu a kapta.

³⁶Huin Judate’n, En dih vua, lungsiat hina mai e! a chi va.

³⁷Khenkhat in, Hipa mittaw mit suhvaahsahpa’n hipa zong silou sah thei lou adiai? a chi va.

³⁸Hujiahin Jesu chu a lungsima thuum kiit in haan ah a hung a, haan chu kohawm ahi a, huleh suang a sit ahi.

³⁹Jesu’n, A suang ladoh un, a chi a. Misipa sanggamnu Martha in a kawmah, Lalpa, tu inchu a uihta diing; ajiahchu a sih na ni li ahita hi, a chi a.

⁴⁰Jesu’n amahnu kawmah, Na gintaata ahihleh Pathian loupina na mu diing, na kawmah ka chi sih eimah? a chi a.

⁴¹Huin amahun misi umna apat suang chu a ladoh va. Huleh Jesu chu a vaandaah a, Pa, ka thu na ngaihkhiah jiahin na tungah ka kipaah hi;

⁴²Huleh na hung ngaikhe zingzing chih zong ka he hi, hizongleh ka kiima diing mipite jiahin hikhu ka chi ahi, Nangma'n na hung sawl chih a gintaat na diingun, a chi a.

⁴³Huchi a, a soi zohin aw ngaihtahin, Lazar, hung pawtdoh in, chi'n a kikou a.

⁴⁴Huin misi chu a khut a keeng haan puana kituamin ahung pawtdoh a; a maai chu kisiaahna puana tuam ahi a. Jesu’n a kawmvah, Phel unla, paisah un, a chi a.

⁴⁵Huchi'n Mari kawma hung, huleh Jesu silmah bawl mu Judate tampiin Jesu a gingta ta uhi.

⁴⁶Hizongleh khenkhat chu Pharisaite kawmah a chiah va, Jesu silbawlte a va hilh uhi.

⁴⁷Huin siampu lalte leh Pharisaite’n vaihawmtute a koukhawm va, Bang i lohta diai? hipa’n silmah tampi a bawl hi.

⁴⁸Hichibanga i hahjan unchu mi zousiah in amah a gingta diing va, huleh Romemite ahung diing a, i mun leh chite ahung laahsah diing uh, a chi uh.

⁴⁹Huin a lahva mi khat, Kaiapha a chih un, hu kum a siampulal ahi a, a kawmvah, Bangmacha na he sih uh,

⁵⁰I nam pumpi a man louhna diing a mipi luang a mi khat sih eiuh diingin a hoih chih zong na ngaihtuah sih uh, a chi a.

⁵¹Hichu ama’n amah phuaahthuh in a soi ahi sih a, hu kum a siampulal ahi a, hu namte luang a Jesu a sih diing a soilawh ahi.

⁵²Huleh hu namte chauh hilou in, Pathian ta kithehdalhte zousiah pawl khata a puikhawm theihna diingin zong ahi.

⁵³Huin hu ni a kipanin amah thah na diing ngaihtuahin a kihou zingta uhi,

⁵⁴Hujiahin Jesu chu Judate lahah a langtangin a vaah nawn sih a; hizongleh hu a kipanin gamdai naih lamah Ephraim kichi khopi khat ah a chiah a, hutah ah a nungjuite toh a um zingta uhi.

⁵⁵Huleh Judate chiahkaan gual vaahna chu ahung naita a; mi tampite gam a kipanin kisusiang diingin Jerusalem ah chiahkaan gual vaah hun ma in a chiahtou uh.

⁵⁶Huin amahun Jesu a hawl va, Pathian biahinn a ding kawmin a kihou va, Bangchi'n na ngaihtuah viai? gual vaahna a hunglou diing adiai? a chi va.

⁵⁷Siampulalte leh Pharisaite’n amah a mat theihna diingun mi koipouh in a umna a heet leh a soilat diing ahi chih thu a peta uhi.