Read Simte JOHN 13 Bible Online

JOHN 13 - Simte bible

JOHN 13

¹Huleh chiahkaan ankuang lui ma in, Jesu’n hi khovel apat paimanga Pa kawma a chiah diing hun ahung tungta chih a he a; khovel a um a mite chu ana lungsiatta in, amahuh chu a tawptanin a lungsiat hi.

²Huin nitaah an neeh laiin diabol in Simon tapa Juda Iskariot lungtang ah Jesu matsah diing a ngaihtuahsah a.

³Jesu’n Pain sil bangkim a khutah a peta chih leh, Pathian a kipana hunga, Pathian kawma chiah kiit diing a hihdan he in,

⁴Nitaah an uumlai a ding a, a puansilh a koih a; huleh kisiaahna puan a la a, a teeng a.

⁵Huleh kisilna kuang a tui a sun zohin a nungjuite keeng a silsah a, kisiaahna puan a teen in a siaah jui peh hi.

⁶Huin Simon Peter kawmah ahung a, Peter in a kawmah, Lalpa, Nang in maw ka keeng na sil diing? a chi a.

⁷Jesu’n a dawng a, a kawmah, Ka silbawl tuin na he sih; hizongleh tunung chiangin na hung he diing hi, a chi a.

⁸Peter in a kawmah, Ka keeng na sil hial sih diing, a chi a. Jesu’n a dawng a, Ka hung sil louhleh ka kawmah tan bangmah na nei sih diing, a chi a.

⁹Simon Peter in a kawmah, Lalpa ka keeng chauh hilou in, ka khut leh ka lu zong hung sil in, a chi a.

¹⁰Jesu’n a kawmah, Koipouh kisilsain a keeng loungal sil a mamoh sih, hizongleh a pum in a siang hi, na bawnun chu hilouin, a chi a.

¹¹Ajiahchu ama’n a mansah diingpa a he a; hujiahin, Na bawnva siang veh na hi sih uh, a chi ahi.

¹²Huchi'n a keeng uh a silzoh a, puansilh la a, a tou kiit zohin a kawmvah, Na tungva ka silbawl bang ahih na he viai?

¹³Nangun kei chu, Houtupa leh Lalpa, na hung chi va, na hung chi dih ngei uh, ajiahchu ka hi him hi.

¹⁴Huchia kei na Lalpa uleh Houtupaun bawn na keeng uh ka sila ahihleh nanguh zong khat leh khat keeng na kisilsah diing uh ahi.

¹⁵Na tungva ka bawl banga na bawlve na diingun na etton diing uh ka hung pia ahi.

¹⁶Chilitahzetin, chihtahzetin ka hung hilh ahi, Suaah chu a pu sangin a lianzaw sih a, huleh a kisawlpa zong a sawltu sangin a lian zaw sih;

¹⁷Hi silte na heet unchu, bawl leh u’chin mi hampha na hi diing uhi.

¹⁸Na bawnva thu ka soi sih; ka teelte ke'n ka he hi, hizongleh huchu, Ka tanghou neehpihpa’n ka tungah a khetuul a lehta, chih Pathian lehkhathu a taangtun theihna diing ahi.

¹⁹Ahung tun ma in tuin ka hung hilh ahi, ahung tun chianga amah ka hi chih na gintaat theihna diingun.

²⁰Chihtahzetin, chihtahzetin ka hung hilh ahi, Koipouh ka sawltaphot kipaahpih chu kei hung kipaahpih ahi; huleh koipouh kei hung kipaahpih in ahung sawlpa a kipaahpih ahi, a chi hi.

²¹Jesu’n hichibanga a soi zohin a lungsim a mangbang a, Chihtahzetin, chihtahzetin ka hung hilh hi, na lahva khat in ahung mansah diing, chi'n a hesahta a.

²²Nungjuite’n koipen ahiai a soi chih he louin a kientuah va.

²³Huleh a nungjuite laha khat Jesu’n a lungsiatpa chu Jesu aang a kingai in a um a.

²⁴Hujiahin Simon Peterin, Koi thu ahiai a soi chih dong diingin amah chu mitmeiin a houpih a.

²⁵Huin Jesu awma kingaipa’n a kawmah Lalpa, koipen ahiai? a chi a.

²⁶Jesu’n a dawng a, Tanghou them ka diah a, ka piah penpen chu amah ahi, a chi a. Huin tanghou them a diah zohin Simon tapa Juda Iskariot kawmah a pia hi.

²⁷Huleh tanghou them a piah zohin Setan a sungah a luutta a. Jesu’n a kawmah, Na bawl diing chu kintahin bawl in, a chi a.

²⁸Dohkaan kiima pute koimah in bang chihna a hu thu a kawma a soi chih a he sih uh.

²⁹Ajiahchu a lahva khenkhat in, Juda in dangka ip a kol jiaha Jesu’n a kawma, Gual vaahna a i mamoh diing silte lei in, chi aha, ahihlouhleh tagahte kawma bang aha khat a piah diing chi ahain a ngaihtuah uhi.

³⁰Huin amah chu tanghou them la zouin a pawtdohpah a; hulai chu jan ahi a.

³¹Hujiahin, a pawtdoh nungin Jesu’n, Tuin chu mihing Tapa paahtawi in a umta, huleh Pathian zong amah ah paahtawi in a um hi.

³²Amah a Pathian paahtawia a um inchu, Pathian in zong amah ah amah a paahtawi diing a, a paahtawipah ngal diing hi.

³³Naute haw, tomchakhat na lahvah ka umta dih hi. Nangun na hung hawl diing va, Judate kawma, Ka chiahna ah na hung thei sih diing uh, ka chih mah bangin, tuin na kawmvah ka chi ahi.

³⁴Thupiah thah ka hung pia hi, Khat le khat kilungsiat un; Ke’n nanguh ka hung lungsiat bangin, nanguh zong khat leh khat kilungsiat un.

³⁵Khat leh khat na kilungsiat uleh mi zousiah in ka nungjuite na hi uh chih hikhu ah a he diing uhi, a chi hi.

³⁶Simon Peter in a kawmah, Lalpa khoiah ahiai na chiah diing? a chi a. Jesu’n amah a dawng a, Ka chiahna diing ah tuin na hung jui thei sih diing, a chi a.

³⁷Peter in a kawmah, Lalpa, bang jiahin ahiai tu a ka hung juih theih louh diing? nang jiahin ka hinna ka pekhe diing, a chi a.

³⁸Jesu’n amah a dawng a, Keimah jiahin na hinna na pekhe diing maw? Chihtahzetin, chihtahzetin ka hung hilh hi, Nangma'n thumvei na hung kiheetmohbawl ma in aah a khuang sih diing hi.