Read Simte JOHN 15 Bible Online

JOHN 15 - Simte bible

JOHN 15

¹Kei grepgui dihtah chu ka hi, ka Pa a hu an enkoltu ahi.

²Keimah a um ba gahlou photmah chu a paaimang veu a; a gah photmah chu a susiangthou veu hi, a gah tam sem theihna diingin.

³Huin nang u’chu na kawmva ka thusoi jiahin na siang uhi.

⁴Keimah ah um ngiitngeet un, kei zong nanguh ah ka um ngiitngeet diing. Ba in grepguia a um ngiitngeet louhngalleh amah ngen a, a gah theih louh mahbangin, nanguh zong keimaha na um ngiitngeet louh uleh na gah thei sih diing uhi.

⁵Kei grepgui chu ka hi, nanguh a bate na hi uh; koipouh keimah a um ngiitngeet leh, kei amah a ka um ngiitngeet napa chu tampiin a gah veu hi; ajiahchu keimah louin bangmah na bawl thei sih uhi.

⁶Mi keimah a, a um ngiitngeet louhleh ba bangin paihdohin a um a, a vuai veu hi; huleh mi’n amahuh a tomkhawm a, meiah a paai va, a kaang veu hi.

⁷Keimaha na um ngiitngeet va, huleh ka thu zong nanguh a, a um ngiitngeet inchu na utut uh na ngen diing va, huchu ahung kibawlsah diing hi.

⁸Hikhu ah ka Pa paahtawi in a um hi, tampi a na gah vah; huchi'n ka nungjuite na hi diing uhi.

⁹Pa’n kei ahung lungsiat bangin ke'n nanguh ka hung lungsiat hi; ka lungsiatna ah um ngiitngeet un.

¹⁰Nangun ka thupiahte na juih uleh ka lungsiatna ah na um ngiitngeet diing uh; Ke’n ka Pa thupiahte ka juih a, a lungsiatna a ka um ngiitngeet mah bangin.

¹¹Ka kipaahna nanguh a, a umden theihna diing leh, na kipaahna uh a bukim theihna diingin hi thute na kawmvah ka soi ahi.

¹²Ke’n nanguh ka hung lungsiat bangin nanguh zong khat leh khat kilungsiatun chih ka thupiah ahi.

¹³Mi’n a lawmte’ diing a hinna a piah sanga lianzaw lungsiatna koima’n a nei sih hi.

¹⁴Thu ka hung piah photmah na bawl unchu ka lawmte na hi diing uhi.

¹⁵Tu a kipat suaahte ka hung chi nawn sih diing; ajiahchu suaahin a pu in bang a bawl a he sih; lawmte ka hung chi zawta diing; ajiahchu ka Pa kawma ka jah zousiah na kawmvah ka hung hilhta hi.

¹⁶Nangun kei na hung teel sih va, ke’n nanguh ka hung teel zaw hi; huleh chiah a gah diing leh, na gah uh um zing diingin, huleh ka mina Pa kawma na nget photmah uh ahung piah theihna diingin nanguh ka hung guat hi.

¹⁷Hi thute nanguh ka hung pia hi, khat leh khat kilungsiat un.

¹⁸Khovel in nanguh ahung huat leh, nanguh ahung huat ma in kei ahung haw zouta chih he un.

¹⁹Khovel a hile u’chin khovel in amah a, a lungsiat diing hi; hizongleh khovel a hilou a, khovel a kipana ka hung teeldoh na hihzawh jiahun khovel in nanguh ahung hua ahi.

²⁰Suaah a pu sangin a lianzaw sih chih na kawmva ka thusoi he zing un. Amahun kei ahung sawi unchu nanguh zong ahung sawi diing uh; ka thusoite a juih uleh nanguh soi zong a jui diing uh.

²¹Hizongleh ka min jiahin hi silte zousiah na tungvah a bawl diing uh, ahung sawlpa a heet louh jiahun.

²²Kei hunglou a, a kawmva thu soilou hileng sualna nei lou diing hi va, hizongleh tuin chu a sualna uh khuh na diing a neita sih uhi.

²³Koipouh kei hung huain ka Pa zong a hua ahi.

²⁴Mi dang koimah bawl ngei louh nna a lahva bawllou hileng sualna nei lou diing hi va, hizongleh tuin chu muh zong ahung muta va, huleh kei leh ka Pa ka nih un hua zong ahung hua uhi.

²⁵Hizongleh hichu, Amahun ajiah beiin ahung hua uh, chih a daanbu va kigial thu a taangtun na diing a hung um ahi.

²⁶Hizongleh Pa kawm apat na kawmva ka hung sawl diing, Hamuantu, Pa apat hung pawt, thutah Hagau ahung tun chiangin, ama’n ka tanchin a hesah diing hi.

²⁷Huleh nangun zong na hesah diing uh, a chiila kipana ka kawma um na hih jiahun.