Read Simte JOHN 17 Bible Online

JOHN 17 - Simte bible

JOHN 17

¹Hi thute Jesu’n a soi a, huleh vaanlam ngain a daah a, Pa, ahun a tungta, na Tapa paahtawi in, na Tapa’n zong Nangmah ahung paahtawi theihna diingin.

²Huchia nangma’n a kawma na piah photmahte kumtuang hinna a piah theihna diing a mi zousiah tunga thuneihna na piah bangin.

³Huleh hichu ahi kumtuang hinna, Nang Pathian tah chauh leh na sawl Jesu Khrist a heet uh.

⁴Leitungah na min ka paahtawita; bawl diing a na hung piah nna ka tong zouta hi.

⁵Tuin Aw Pa, khovel um ma a na kawma ka neih paahtawina in nangmah kawm ngeiah hung paahtawi in.

⁶Khovel a kipana na hung piahte kawmah na min ka sulangta hi; amahuh nanga ahi a, nang kei na hung piah ahi; huleh na thu a juita uh.

⁷Nang ka kawma na hung piah photmah nangmaha kuan ahi chih tuin a heta uh.

⁸Ajiahchu nang thu na hung piahte a kawmvah ka peta a, amahun zong a pomta uh; huleh tahzetin nanga kipana pawt ka hi chih a heta va, na hung sawl ahi chih a gingtata uhi.

⁹Amahuh diingin ka ngetsah hi; khovel a diingin ka ngetsah sih a, nang na hung piahte diingin ka ngetsah zaw hi; ajiahchu amahuh nanga ahi uh.

¹⁰Sil zousiah keia photmah nanga ahi a, nanga zousiah keia ahi; huleh amah vah paahtawi in ka um hi.

¹¹Tuin kei khovel ah ka um nawn sih diing, hizongleh hite khovel ah a um diing uh, kei na kawmah hung diing ka hi. Pa Siangthou, ei pumkhat i hih mahbanga amah u’zong pumkhat ahihtheihna diingun, nang na hung piahte na minin kem in.

¹²Khovel a amahuh toh ka um sungin na minin Amahuh ka kema, Pathian lehkhathu a taangtun theihna diingin mangthang tapa loungal khatbeeh a mangthang sih uh.

¹³Huin na kawmah hung diing ka hita; huleh amah va ka kipaahna a bukim theihna diingin hi silte khovel ah ka soi ahi.

¹⁴Na thu Amahuh ka peta a, khovel in amahuh a hua hi; kei khovel a ka hih louh mahbanga amah uh khovel a ahih louh jiahun.

¹⁵Amahuh khovel a kipana lamang diingin ka hung ngen ahi sih a, hizongleh migiloupa apat veeng diingin ka hung ngen ahi zaw hi.

¹⁶Amahuh khovel a ahi sih uh, kei khovel a ka hih louh mahbangin.

¹⁷Na thuin Amahuh susiangthou in; na thu chu thutah ahi.

¹⁸Kei khovel a na hung sawl mahbangin, ke’n zong amahuh khovel ah ka sawl hi.

¹⁹Amahuh jiahin ka kisusiangthou hi, thutah jala amah u’zong suhsiangthou a, a um theihna diingun.

²⁰Hite a diing chauhin ka ngen sih a, hizongleh a thu jiah va kei hung gingta diingte a diingin zong ka hung ngen hi.

²¹Pumkhat ahih theihna diingun; Pa, nang keimah a na um a, kei nangmah a ka um banga amah u’zong eimaha pumkhat ahihtheihna diingun; huleh nang na hung sawl chih khovel in a gintaat theihna diingun.

²²Huleh nang na hung piah loupina amah uh ka peta hi; ei pumkhat i hih banga amah u’zong pumkhat ahihtheihna diingun.

²³Kei amahuh ah, Nang keiah, pumkhat a amahuh suhbukima a um theihna diingun; huleh nang na hung sawl a, kei na hung lungsiat bangin amahuh na lungsiat chih khovel in a heet na diingun.

²⁴Pa, nang kei na hung piahte zong ka umna a kei toh um diingin ka deih hi; na hung piah loupina a muh theihna diingun; ajiahchu nang leilung siam ma pehin kei na hung lungsiat hi.

²⁵Aw Pa dihtat, khovel in nang ahung he sih a, hizongleh ke'n chu ka hung he hi; huleh nang na hung sawl chih hite’n a heta uhi.

²⁶Huleh a kawmvah na min ka hesahta a, ka hesah jel diing; keimah na hung lungsiatna a kawmva a um theihna diing leh, kei amah va ka um theihna diingin, a chi hi.