Read Simte JOHN 18 Bible Online

JOHN 18 - Simte bible

JOHN 18

¹Jesu'n hi thute a soi zohin a nungjuite toh a pawt va, Kidron luiguam a kaan va; huleh hutah ah hu an khat a um a, huah a nungjuite toh a luut hi.

²Huleh a mansahpa Juda in zong a mun a he a; Jesu a nungjuite toh hulama a vaah veu jiahin.

³Huin Juda in siampulalte leh Pharisaite apat sepaih pawl leh miman houtute pui in, thaumeite leh meiselte leh gaal vante tawi in hutah ah ahung ta uhi.

⁴Hujiahin Jesu’n a tunga siltung diing zousiah he in a pawtdoh a, a kawmvah, Koi ahiai na hawl uh? a chi a.

⁵Amahun a dawng va, Nazareth Jesu, a chi va Jesu’n a kawmvah, Kei ka hi, a chi a. Huleh a mansahpa Juda zong a kawmvah a ding hi.

⁶Huin, Kei ka hi, a chih tahin a nungtawl va, leiah a puuh uhi.

⁷Huin ama’n, Koi ahiai na hawl uh? chi'n a dong kiit a. Amahun, Nazareth Jesu, a chi va.

⁸Jesu’n a dawng a, Kei ka hi chi'n ka hung hilhta; hujiahin kei hung hawl na hih uleh hite chiahsah un, a chi a.

⁹Nang na hung piahte khatmah zong ka mangsah sih, chia ama’n a soi a taangtun theihna diingin.

¹⁰Huin Simon Peter in namsaau khat a neih a doh a, siampulal suaahpa a saat a, a bil jiatlam a saatkhiahsah hi. Hu suaahpa min chu Malka ahi.

¹¹Huin Jesu’n Peter kawmah, Na namsaau a paai ah siat in; ka Pa’n nou ahung piah chu ka dawn sih diai mah? a chi a.

¹²Huin sepaih pawlte leh, houtu lamkai leh, Judate houtute’n Jesu chu a man va, a kaan uh a.

¹³Amasapenin Ana kawmah a pui uh; ajiahchu amah hu kum a siampulal a pang Kaiapha sungpa ahi.

¹⁴Huleh Kaiapha chu, Mipite luang a mi khat sih a hoih hi, chia Judate kawma hilhpa ahi.

¹⁵Huleh Simon Peter in Jesu a jui a, huchi bangmahin nungjui dang khu inzong a jui hi; hu nungjuipa chu siampulal meelheet ahi a, siampulal inn huang sungah Jesu toh a luut khawm a.

¹⁶Hizongleh Peter chu polamah kotkhaah bulaha ding a. Nungjui khatpen, siampulal meelheetpa chu a va pawt a, kotkhaah ngaahnu kawmah a soi a, Peter ahung puiluut hi.

¹⁷Kotkhaah ngaah nungaahnuin Peter kawmah, Nang zong hipa nungjuite laha khat hilou na hi maw? a chi a. Ama’n, Ka hi sih, a chi a.

¹⁸Huleh suaahte leh houtute hutahah a ding va, a vot jiahin hutah ah suang meihol a chih va, a awi uh. Huleh Peter zong amahuh toh ding khawmin mei a awi hi.

¹⁹Huin siampulalin Jesu kawmah a nungjuite tungtaang leh a thuhilhna tungtaang a dong a.

²⁰Jesu’n a dawng a, Alangtangin khovel ah thu ka soi a, Judate umkhawm zingna kikhopna innte leh Pathian biahinn ah thu ka hilh zing, a guuh in bangmah ka soi sih.

²¹Bang diinga kei hung dong na hi viai? A kawmva bang ka soi ka thu jate kawmah dong un; ngai un, amahun ka soi a he uhi, a chi a.

²²Hutobanga a soi zohin a kawma ding houtu khat in a khut in Jesu a beeng a, Siampulal bang huchi'n na dawng maw? a chi a.

²³Jesu’n a dawng a, Thu gilou ka soi leh ka giitlouhna hung hesah in; hizongleh a hoih ka soi leh bang diinga hung beeng na hiai? a chi a.

²⁴Huchi'n Ana in amah chu kaansain siampulal Kaiapha kawmah a sawlta hi.

²⁵Simon Peter chu ding in mei a awi a. Hujiahin amahun a kawmah, Nang zong nungjuite, laha khat hilou na hi maw? a chi va. Ama’n a kiheetmohbawl a, Ka hi sih, a chi a.

²⁶Huin, Peter in a bil a saatkhiahsahpa sanggam, siampulal suaahte khat in, Hu an a amah toh na umkhawm uh ka hung mu sih eimah? a chi a.

²⁷Peter in a kihetmohbawl kiit a, huleh aah a khuangpahta hi.

²⁸Huin amahun Jesu chu Kaiapha inn a kipanin vaihawmna inn ah a puita va; jingkal matah ahi a; huleh amahuh chu vaihawmna inn sungah a luut sih uh; huchilouin chu a ki subuahkha diing va, chiahkaan gual vaahna a nethei sih kha diing uhi.

²⁹Pilat chu a kawmvah ahung pawta, Hipa heehna bang ahi’ai na neih uhi? a chi a.

³⁰Amahun a dawng va, a kawmah, Amah migilou hi sih leh na kawma hung pekhe hetlou diing ka hi uh, a chi va.

³¹Huin Pilat in a kawmvah, Pui unla, na dan dungjuiun vaihawmsah un, a chi a. Judate’n a kawmah, Keiuh diingin mi suhlup dan ahi sih hi, a chi va.

³²Hichu bangchibanga a sih diing thu Jesu’n a soi a taangtun theihna diingin ahi.

³³Huin Pilat vaihawmna inn sungah a luut kiit a, Jesu a kou a, a kawmah, Judate Kumpipa na hi maw? a chi a.

³⁴Jesu’n a dawng a, Hukhu nangmah lungsima suaah na soi ahiai? ahihlouhleh midangin ka tungtaang thu a hi ahung hilh ahiai? a chi a.

³⁵Pilat in a dawng a, Kei Judami ka hiai mah? Na chipihte leh siampulalte’n nang ka kawmah ahung pekhia ahi; bang ahiai na bawltaah? a chi a.

³⁶Jesu’n a dawng a, Ka gam hi khovel a ahi sih; ka gam hi khovel a hitaleh Judate khuta piahkhiah ka hih louh na diingin ka suaahte’n a dou diing uh; hizongleh ka gam chu hi a ahi nai sih hi, a chi a.

³⁷Hujiahin Pilat in a kawmah, Ahihleh Kumpipa na hi maw? a chi a. Jesu’n a dawng a, Kumpipa na chih chu ka hi. Huleh hikhu diing a piang ka hi a, huleh thutah heetpih diing a khovel a hung ka hi. Koipouh thutah a photmahin ka aw a ja uh, a chi a.

³⁸Pilat in a kawmah, Thutah bang ahiai? a chi a. Huleh hikhu a soi zohin Judate kawmah a pawt kiit a, a kawmvah, Amah ah dih louhna ka mu het sih hi.

³⁹Hizongleh chiahkaan ni a mi khat ka hung hahsah diing ahi chih tawndan khat na nei uh; Hujiahin Judate Kumpipa hung hahdohsah leng na ut viai? a chi a.

⁴⁰Huin a bawnun a kikou va, Hipa hilou in, Barabba zawh, chi'n. Barabba ahihleh suammang ahi.