Read Simte JOHN 2 Bible Online

JOHN 2 - Simte bible

JOHN 2

¹Huleh ni thum ni’n Galili gam a Kana khua ah kiteenna khat a um a; huah chu Jesu nu a um a.

²Jesu leh a nungjuite zong kiteenna ah kouh ahi uh.

³Huleh uain ahung kitaahsap tahun Jesu nuin a kawmah, Uain a nei nawn sih uh, a chi a.

⁴Jesu’n a kawmah, Numei, nang hung heetsah diing bang a um ei? ka hun a tung nai sih hi, a chi a.

⁵A nuin suaahte kawmah, Ama’n na kawmva a soi photmah bawl un, a chi a.

⁶Huleh Judate tawndan dungjuia kisuhsiangthouna suang tuibeel buuh sawmli mun nih aha, mun thum aha dawl, guup hu munah a tungva.

⁷Jesu’n a kawmvah, Tuibeelte ah tui sungdim un, a chi a. Huin ageitan chiatin a sungdim va.

⁸Huleh ama’n a kawmvah, Tuin thaal unla, gual vaah vaihawmtu kawmah tawi un, a chi a. Amahun a tawi va.

⁹Gual vaah vaihawmtuin tui uain hung suaah chu a chepin khoia kipana hung um ahih a he sih a, (ahihvangin suaah tui thaalte’n chu a he va), gual vaah vaihawmtuin mouneipa chu a kou a,

¹⁰A kawmah, Michinin a chiilin uain hoih a tungkhia va, huleh tam deuh ahung dawn nung chiangun a hoihlou zaw a tungkhia uh; nangin chu tutan phain uain hoih na koih nalai hi, a chi a.

¹¹Hi silmah kipatna chu Jesu’n Galili gam a Kana khua a, a bawl ahi a; a loupi daan a sulang hi, huleh a nungjuite’n amah a gingta uhi.

¹²Huzohin Kapernaum ah a chiahsuh a, amah toh, a nu toh, a unaute toh, huleh a nungjuite toh; hutah ah ni tamlou khat a um uhi.

¹³Huleh Judate chiahkaan kuut ahung naita a, Jesu chu Jerusalem ah a chiahtou a.

¹⁴Huleh Pathian biahinna bawng leh, belaam leh, vakhu zuahte leh, sumhengtute tou chu a mu a.

¹⁵Huin jepna khauhual a bawl zohin biahinn a kipanin belaamte leh bawngte a nohdoh veh a, huleh sumhengtute dangka a sunbuahsah a, a dohkaan uh a sawn puuhsah hi.

¹⁶Huleh ama’n vakhu zuahte kawmah, Hi silte hitah apatin la mang un; ka Pa inn sumdawnna inn in bawl sih un, a chi a.

¹⁷Huin a nungjuite’n, Na inn a ka phatuamngaihna in ahung ne zouta, chih gelh ahih ahung hedoh uhi.

¹⁸Huin Judate’n a dawng va, a kawmah, hi silte na bawl, chiamchihna bang ahiai na hung muhsah theih? a chi va.

¹⁹Jesu’n a dawng a, a kawmvah, Hi biahinn susia un, ni thum sungin ka tungding diing, a chi a.

²⁰Huin Judate’n, kum sawmli leh guup hi biahinn bawlna’n a luuta, nangin ni thum sungin na tungding diing maw? a chi va.

²¹Ahihvangin ama’n huchu a tahsa biahinn a soi ahi.

²²Hujiahin misi laha kipana a thoh kiit nungin a nungjuite’n, a kawmvah hi thute a soi ahi chih ahung hedohta va; Pathian lehkhathu leh Jesu thusoi a gingta ta uhi.

²³Huchi'n chiahkaan ankuang luina a Jerusalem a, a um laiin a silmah bawlte a muhun mi tampite’n a min a gingta uh.

²⁴Hizongleh Jesu chu a kawmvah a kituluut nuam sih, ajiahchu ama’n mi zousiah a he a;

²⁵Huleh mihing sunga um a heet jiahin mihing thu koimah hilhchet a kiphamoh sih hi.