Read Simte JOHN 20 Bible Online

JOHN 20 - Simte bible

JOHN 20

¹Hapta ni masapenin, jingkal khua mial nalaiin, Mari Magdalene haanah a hung a, huleh haana kipat suang kiladohin a muta a.

²Huin a tai a, Simon Peter leh nungjui khatpen, Jesu’n a lungsiatpa kawmah a hung a, a kawmvah, Ha an apat in ka Lalpa a la mangta va, khoitah a a koih uh ka he sih uh, a chi a.

³Hujiahin Peter chu a pawtdoh a, nungjui dangpen zong, huleh haanlam zuanin a hung va.

⁴Huchi'n a nihun a taikhawm va; nungjui khatpenin Peter a makhelh a, haan ahung tung masa a.

⁵Ama’n kuunin a en a, puan malngaat um a mu a, ahihvangin a sungah a luut sih.

⁶Huin Simon Peter in a nungah ahung jui a, haan sungah a luut a, puan malngaat umte a mu a.

⁷Huleh a lu tuamna kisiaahna puan chu puan malngaat toh umkhawm loua a tuam a mun khata kijial a um a mu a.

⁸Huin haana tung masa nungjui dangpen zong a sungah a luut a, huleh a mu a, a gingtata hi.

⁹Ajiahchu amahun misi laha kipan a thohkiit diing ahi chih Pathian lehkhathu a he nai sih uhi.

¹⁰Huin nungjuite chu a inn lam vah a chiah kiitta uhi.

¹¹Hizongleh Mari chu haan pua ah kapin a ding a; huleh a kahpum in a kuun a, haan sunga en a.

¹²Huleh Jesu luang kisialna munah puan vaam silh angel nih, khat a lu lamah, khat a keeng lamah tou in a mu a.

¹³Amahun a kawmah, Numei, bang diing a kip na hiai? a chi va Amahnu’n a kawmah, Ka Lalpa a la mangta va, huleh a koihna uh ka heet louh jiahin, a chi a.

¹⁴Huchia a soi zohin a kinunghei a, Jesu diing a mu a, hizongleh Jesu ahi chih a he sih hi.

¹⁵Jesu’n a kawmah, Numei, bang diing a kap na hiai? koi ahiai na hawl? a chi a. Amahnu’n hu an veengpa sain a kawmah, Pu, hitah apat amah na puaahmang ahihleh na koihna hung hilhin, huchi'n ka la mang diing, a chi a.

¹⁶Jesu’n a kawmah, Mari, a chi a. Amahnu chu a kihei a, a kawmah, Rabboni, a chi a; huchu, Houtupa chihna ahi.

¹⁷Jesu’n a kawmah, Hung khoih sin; ajiah chu ka Pa kawmah ka chiahtou nai sih hi. Ahihvangin ka unaute kawmah chiah inla, a kawmvah, Ka Pa, na Pa uh, huleh ka Pathian, na Pathian uh kawmah chiahtou diing ka hi chi in, a chi a.

¹⁸Mari Magdalene chu a hung a, nungjuite kawmah Lalpa a muh thu leh hi silte ama’n a kawmah a soi hi chih a hilhta hi.

¹⁹Huni mah hapta ni masapen nitaahin, Judate lau jiaha nungjuite umna kotte a kikhaah nungin Jesu a hung a, a lai vah a ding a, a kawmvah, Na tungvah hamuanna um heh, a chi a.

²⁰Huchia a chih zohin a khutte leh a naah a kawmvah a lah a. Huin nungjuite’n Lalpa a muh phetun a kipaahta uhi.

²¹Huin Jesu’n a kawmvah, Na tungvah hamuanna um heh; ka Pa’n ahung sawl bangmahin nanguh ka hung sawl hi, a chi kiit a.

²²Hikhu a soi zohin a tungvah hu a haihkhum a, a kawmvah, Hagau Siangthou tangta un;

²³Kua sualna zong na ngaihdam phot uh ngaihdam ahi diing a, kua sualna zong na ngaihdam louh phot uh ngaihdam louh ahi diing, a chi a.

²⁴Hizongleh Thoma, Didum a kichi, sawmlenihte laha khat, Jesu hung lai in a kawmvah a um sih a;

²⁵Hujiahin nungjui dangte’n a kawmah, Lalpa ka muta uh, a chi va. Hizongleh ama’n a kawmvah, A khuta siihkilhna pawnte ka muh a, siihkilhna pawn sunga ka khutzung ka gu an a, huleh a naah a ka khut ka thun louhleh ka gingta sih diing, a chi a.

²⁶Huleh ni giat nungin nungjuite inn sungah a um kiit va, Thoma zong a kawmvah a um a; huin kot kikhaah ngalin Jesu a hung a, a lai vah a ding a, Na tungvah hamuanna um heh, a chi a.

²⁷Huin ama’n Thoma kawmah, Na khutzungin hung sawh inla, ka khutte en in; huleh na khut in hung baan inla, ka naah sawh in; gingta lou in um sinla, gingta mai in, a chi a.

²⁸Thoma’n a dawng a, a kawmah, Ka Lalpa leh ka Pathian, a chi a.

²⁹Jesu’n a kawmah, Thoma, nang chu na hung muh jiahin na gingta ahi a; mulou a gingtate a hampha uhi, a chi hi.

³⁰Huleh hi lehkhabua kigial lou chiamchihna dang tampi Jesu’n a nungjuite ma-ah a bawl hi.

³¹Hizongleh hite chu nangun Jesu chu Khrist, Pathian Tapa ahi chih na gintaat na diing uleh, na gintaat jiah va a mina hinna na neihna neihna diing va kigial ahi.