Read Simte JOHN 3 Bible Online

JOHN 3 - Simte bible

JOHN 3

¹Pharisaite laha mi, a min Nikodem kichi, Judate vaihawmtu khat a um a.

²Amah chu janin Jesu kawmah a hung a, a kawmah, Rabbi, Pathian akipana thuhilhtu diing a hung na hi chih ka he uh; ajiahchu Pathian a kawma a um louhleh na silmah bawlte koima’n a bawl thei sih diing, a chi a.

³Jesu’n a dawng a, a kawmah, Chihtahzetin, chihtahzetin ka hung hilh ahi, mi koipouh in a pianthah louhleh Pathian gam a mu sih diing hi, a chi a.

⁴Nikodem in a kawmah, mi a teeh nungin bangchi'n a piang thei diai? a nu sunga nihvei luut in a piang thei diing maw? a chi a.

⁵Jesu’n a dawng a, Chihtahzetin, chihtahzetin ka hung hilh ahi, mi koipouh tui leh Hagau a, a pian louhleh Pathian gam a luut sih diing hi.

⁶Sa a piang phot chu sa ahi a; huleh Hagau a piang photmah chu hagau ahi.

⁷Na pianthah ngeingei diing ahi, na kawma ka chih limdang sa sin.

⁸Huih a utna pouh ah a nung a, agin na ja hi, hizongleh khoia kipana hung a, khoilama chiah diing chih na he sih; koipouh Hagau a piang chu huchibang ahi; a chi a.

⁹Nikodem in a dawng a, a kawmah, Hi silte bangchi’n ahithei diai? a chi a.

¹⁰Jesu’n a dawng a, a kawmah, Israelte houtu na hi a, hi silte na he sih maw?

¹¹Chihtahzetin, chihtahzetin ka hung hilh ahi, Kei unchu ka heet uh ka soi va, ka muh uh ka hesah uh; ahihvangin nangun ka thu heetsah uh na awi sih uh.

¹²Leitung silte ka hung hilh bawn gingta lou na hih uleh, vaan lam silte hung hilh leng bangchi’n na gingta diviai?

¹³Vaan apata hung kumsuh mihing Tapa vaan a um chih louh kuamah vaan ah a kal ngei nai sih hi.

¹⁴Huleh Mosi’n gamdai a guul a khaikaang mahbang in mihing Tapa zong khaikaang in a um ngei diing ahi.

¹⁵Koipouh amah gingta in a beimang louh a, kumtuang hinna a neih zawh na diingin.

¹⁶Ajiahchu Pathian in khovel a lungsiat mahmah a, huchi'n a Tapa tangkhat neihsun a pia, koipouh amah gingta in a beimang louh a, kumtuang hinna a neih zawh na diingin.

¹⁷Khovel siamlouhtangsah diingin Pathian in a Tapa khovel ah a sawl sih, khovel amah jala hutdam ahihtheihna diingin a sawl zaw hi.

¹⁸Amah gingta chu siamlouhtansah in a um sih; hizongleh a gingta lou chu siamlouhtansah zoh ahita, Pathian Tapa tangkhat neihsun min a gintaat louh jiahin.

¹⁹Hichu siamlouhtanna ahi, vaah khovel ah a hung a, hizongleh mite’n vaah sangin mial a deih zaw uh, a silbawlte uh a giitlouh jiahin.

²⁰Ajiahchu koipouh sil gilou bawl in vaah ahaw veu uh, huleh vaah ah zong ahung ut sih uh; huchilou inchu a sil bawlte uh a langkha diing.

²¹Hizongleh koipouh sildih bawl chu vaah ah ahung uh, a silbawlte uh Pathiana bawl ahi chih a lat theihna diingin.

²²Hi silte nungin Jesu chu a nungjuite toh Judia gam ah a hung va; hutah ah amahuh toh a um zinga, huleh a baptis hi.

²³Huleh John in zong Salim kawm Ainon ah a baptis a, hutah a tui a tam jiahin; huleh amahuh a hung va, baptisma a tang uh.

²⁴Ajiahchu huchihlaiin John suangkul ah khum ahi nai sih hi.

²⁵Huin John nungjuite leh Judate kikal ah kisuhsiangthou thu ah kinialna ahung umta a.

²⁶Amah u’chu John kawmah a hung va, a kawmah, Rabbi, Jordan gaala na kawma um, a tanchin na heetpihpa’n, ngai in, hupa’n baptisma a bawl a, mi zousiah a kawmah ahung uh, a chi va.

²⁷John in a dawng a, Vaana kipana piah ahihlouhleh mihingin bangmah a nei thei sih,

²⁸'Kei Khrist chu ka hi sih a, a ma a sawl ka hi zaw chih nanguh mahin na hung heetpih uhi.

²⁹Mou neitu chu mou pasal ahi a, hizongleh mou neitu lawmpa, a kawma dinga a thu ngaikhia chu mouneitu aw jiahin nasatahin a nuam hi, hi ka nuamna chu a bukimta hi.

³⁰Amah chu a khantouh diing ahi a, kei chu ka kiamsuh diing ahi.

³¹Tunglama kipana hung chu mi zousiah tunga ahi a; leia piang chu leimi ahi, huleh lei thu a soi veu; vaan akipana hung chu mi zousiah tunga ahi.

³²Huleh a muh leh a jah chu ama’n a hesah hi; koimah in a thuheetsah a awi sih.

³³Koipouh a thuheetsah awi in Pathian chu a dih hi chi'n a minin namdetna a bawl hi.

³⁴Ajiahchu Pathian sawlin Pathian thu a soi veu; Pathian in laha kawmah Hagau teh detdetin a pe sih.

³⁵Pain Tapa a lungsiat a, a khutah sil zousi ah a peta hi.

³⁶Koipouh Tapa gingta in kumtuang hinna a neita, koipouh Tapa gingta louin hinna a mu sih diing a, hizongleh Pathian lungthahna a tungah a um zing hi, a chi hi.