Read Simte JOHN 4 Bible Online

JOHN 4 - Simte bible

JOHN 4

¹Hujiahin Jesu’n John sangin nungjui a siam tamzaw a, a baptis chih Pharisaite’n a ja uh chih Lalpa’n a heet tahin,

²(Ahihvangin Jesu hialin chu a baptis sih a, a nungjuite’n a baptis zaw uh ahi a),

³Judia gam a nusia a, Galili gam ah a chiah kiitta a.

⁴Huchi'n Samaria gam tawn diing ahi a.

⁵Huin Samaria khopi khat, Saikar a chih uh, Jakob in a tapa Joseph kawma a munpiah kawm ahung tungta a.

⁶Hutah ah Jakob tuitohdoh a um a. Jesu chu a paigim jiahin tuitohdoh geiah a tou a; huchu daah guupna vel diing ahi a.

⁷Huin Samaria numei khat tuitawi diingin a hung a; Jesu’n a kawmah, dawn diing hung pia in, a chi a.

⁸(A nungjuite lah neeh diing lei in khopi ah a chiahta ngal va).

⁹Huin Samaria numeinu in a kawmah, bangchidana nang Juda mi in kei Samaria numei kawma dawn diing na hung nget ahiai? Judate’n lah Samarimite bangmahin a ngai sih ngal va, a chi a.

¹⁰Jesu’n a dawng a, a kawmah, Pathian silthawnpiah leh, na kawma, dawn diing hung pia in, chipa koi ahiai chih helechin zaw nang a kawma ngen diing china, ama’n tuihing hung pe diing hiveen, a chi a.

¹¹Numeinu’n a kawmah, Pu, a sawh na diing bangmah na nei sih a, tuitohdoh lah a thuuh ngal a, khoi a kipanin ahiai tui hing na laah diing?

¹²Ka pu uh Jakob sanga lian zaw na hiai mah? Ama’n hi tuitohdoh ahung pia a, huleh amah ngei in zong a dawn a, a tate leh a gangualte’n zong a dawn uh, a chi a.

¹³Jesu’n a dawng a, a kawmah, Koipouh hi tuitohdoh a dawn chu a dangtaah kiit diing;

¹⁴Hizongleh ke’n a kawma ka piah diing tui dawn photmah chu bangchih tanin a dangtaah sih diing uh; a kawmva ka piah diing tui chu a sung vah tuitohdoh in ahung um diing a, kumtuang hinna phain a kikhohdoh diing, a chi a.

¹⁵Numeinu’n a kawmah, Pu, hu tui hung pe ve, ka dang a taah louh na diing leh, tuitawi diing a hitaha ka hung louh na diingin, a chi a.

¹⁶Jesu’n a kawmah, na pasal va kou inla, hitah ah hung kiit in, a chi a.

¹⁷Huin numeinu’n a dawng a, pasal ka nei sih, a chi a. Jesu’n a kawmah, pasal ka nei sih, na chih na chi dih mahmah hi.

¹⁸Ajiahchu pasal ngaa na neita a, huleh tua na neih zong na pasal ahi sih; hi thu na soi dih hi, a chi a.

¹⁹Numeinu’n a kawmah, Pu, zawlnei na hi chih ka he,

²⁰Ka pulepate un hi taang ah Pathian a beveu uh; hizongleh nangun chu mite’n Pathian a biah na mun diing chu Jerusalem ahi na chi uh, a chi a.

²¹Jesu’n a kawmah, Numei, hung gingta in, hi taang ah khel lou zong, huleh Jerusalem khelah lou zong Pa na biah hun uh hung tung diing ahita.

²²Nangun na heet louh uh na bia uh; Kei un chu ka biah uh ka he uh; ajiahchu hutdamna Judate a hung kipan ahi.

²³Hizongleh ahun tung diing ahita, tuin zong a tung zing ahi, hu hun chiangin a be tahtahte’n Pa chu hagau leh thu tahin a be diing uhi, ajiahchu Pa’n huchibang mi amah be diingin a hawl ahi.

²⁴Pathian chu Hagau ahi a, huleh a be mite’n hagau leh thutah a, a biah diing uh ahi, a chi a.

²⁵Numeinu’n a kawmah, Khrist kichi, Messiah ahung diing chih ka he; amah ahung chiangin sil bangkim ahung hilh veh diing, a chi a.

²⁶Jesu’n a kawmah, Kei, na kawma thusoi chu amah ka hi, a chi a.

²⁷Huleh hulai tahin a nungjuite ahung tungva, numeinu a kihoupih limdang a sa mahmah va; hizongleh koima’n, Bang diinga numeinu na kihoupih, a chi keei sih uhi.

²⁸Huin numeinu in a tuibeel a taisan a, khopi ah a chiah a, mite kawmah,

²⁹Ka sil bawl zousiah hung hilh mi khat, hung unla, hung endihvua; Khrist hilou diing ahiai mah? a chi a.

³⁰Huin amahuh chu khopi apat a pawtdoh va, a kawmah ahung ta uhi.

³¹Huchihlaiin a nungjuite’n, Houtupa, an ne in, chi'n a sawl va.

³²Hizongleh ama’n a kawmvah, Nanguh heet louh neeh diing an ka nei, a chi a.

³³Hujiahin a nungjuite a kihou va, Koi aha in a neeh diing ahung tawisah adiai? a chi va.

³⁴Jesu’n a kawmvah, Ka an chu ahung sawlpa deihzawng bawl leh a na tohzoh ahi.

³⁵Nangun, Ha li zoh chiangin buhlaah hun ahung tung diing, na chi sih viai mah? ngai un, ka hung hilh ahi, Daah unla, loute en un; laah hunin a min vehta hi.

³⁶Koipouh a la in loh a mu a, kumtuang hinna tan um diing gah a kikhol veu hi; a tuhpa leh a lapa a kipaahkhawm theihna diingun.

³⁷Khatin a tuh a, a dangin a la veu chih thu hitah ah a dih ngeel ahi.

³⁸Na tohgim louh uh la diingin ka hung sawl ahi; mi dangte’n ana tong a, nangun a toh ah na sunzop uh ahi, a chi a.

³⁹Huleh, Ama’n ka bawl zousiah hung hilh, chih numeinu thusoi jiahin hu khopia Samarimi tampiin Jesu a gingta ta uh.

⁴⁰Huchi'n Samarimite chu Jesu kawm ahung tunun a kawmva um diingin a hou va; huleh amah chu hutah ah ni nih a tuang hi.

⁴¹Huleh amah thusoi jiahin mi dang tampi in a gintaat behlap uh.

⁴²Huleh numeinu kawmah, Tuin chu nang soi jiaha gingta ka hi sih va, keiuh ngei in a thu ka ja va, huleh hipa chu khovel hundampa, Khrist ahi chih ka he uhi, a chi va.

⁴³Huleh ni nih nungin hu a kipanin a pawt a, Galili gam ah a chiahta hi.

⁴⁴Ajiahchu, amah Jesu ngei in, zawlnei amah gam lamah paahtawiin a um ngei sih chih a hesahta hi.

⁴⁵Huin Galili gam ahung tun in, Jerusalem a gual vaahna a, a silbawl zousiah a muh jiahun Galilimite’n ana kipaahpih uh, ajiahchu amah u’zong hu gual vaahna ah a va chiah uhi.

⁴⁶Huchi'n Jesu chu tui uain a suaahsah na Galili gam a Kana khua ahung tung kiit a; Huleh hutah ah mi loupi khat, a tapa Kapernaum khua a china, a um a.

⁴⁷Jesu Judia gam apat hung pawt in Galili gam ah a hungta chih a jah tahin, a kawmah a chiah a, huleh hungsuh a, a tapa sudam diingin amah a ngen a; ajiahchu amahpa si dehdeh a china ahi.

⁴⁸Jesu’n a kawmah, chiamchihna leh silmahte na muh louh uleh na gingta sih diing uh, a chi a.

⁴⁹Mi loupipa in a kawmah, Pu, ka tapa sih ma in hungsuh in, a chi a.

⁵⁰Huin Jesu’n a kawmah, chiahta in, na tapa a damta hi, a chi a. Huleh hu mipa’n Jesu’n a kawma a thusoi chu a gingta a, a chiahta hi.

⁵¹Huleh a paisuh laiin a suaahte’n ana kituaahpih va, Na tapa a damta, chi'n ana hilh uh.

⁵²Huin ama’n ahung dam pat lai hun a kawmvah a dong a Amah un a kawmah, jaanni, daah sagih hunin a khosih in amah a nuseta hi, a chi va.

⁵³Huchi'n a pa in huchu Jesu’n a kawma, Na tapa a damta, a chih hun laitah ahi chih a heta a; huleh amah leh a innkuanpih tengin a gingta ta uhi.

⁵⁴Hichu Jesu’n Judia gam apat ahung pawta Galili gam a ahung laia a silmah bawl nihna ahi.