Read Simte JOHN 6 Bible Online

JOHN 6 - Simte bible

JOHN 6

¹Hi silte nungin Jesu chu Galili diil, Tiberi diil kichimah gaal lamah a chiahta a.

²Huleh natna veite tunga a silmah bawlte a muh jiahun mipi nasatahin amah a jui va.

³Jesu chu taang ah a chiahtou a, huah a nungjuite toh a tou hi.

⁴Huleh chiahkaan kuut, Judate gual vaahna chu a naita a.

⁵Huin Jesu a daah a, mi tampi a kawm lam zu an a muh in Philip kawmah, Hite neeh diing tanghou khoi a ahiai i lei diing? a chi a.

⁶Ama’n hichu amah etkhiahna diing a, a soi ahi a, ajiahchu bang ahiai a bawl diing ama’n a kiheet hi.

⁷Philip in a kawmah, Mi chinin themkhat chiata a tan diing u’zong makhai za nih man tanghou in a daih sih diing hi, a chi a, a dawng a.

⁸A nungjuite laha khat, Simon Peter unaupa Andru in a kawmah,

⁹Hitah ah barley-buh tanghou pheeng ngaa leh ngagawp nih nei naupang khat a um hi, ahihvangin mi hizahpi lahah bangtham ahi diai? a chi a.

¹⁰Jesu’n, Mipite tousah un, a chi a. Huleh hutah ah hampa tampi a um a. Huchi'n mipite chu a touta va, a tam lam u’chu saang ngaa vel ahi uh.

¹¹Huin Jesu’n tanghou pheengte chu a la a, huleh a vangpiah zohin a nungjuite kawmah a hawm a, a nungjuite’n a toute kawmah; huchimahbangin ngate zong a deihkhop un a hawm uhi.

¹²Huin a kham nungun ama’n a nungjuite kawmah, Bangmah mang lou diingin a nengthemte luaah un, a chi a.

¹³Hujiahin a luaahkhawm va, barley buh tanghou pheeng ngaa nete neeh valin bawm sawm le nih a luaah dim uhi.

¹⁴Huin Jesu silmah bawl a muhun hu mipite’n, Tahzetin hipa chu khovel a zawlnei hung diingpa ahi ngei mei, a chi uhi.

¹⁵Huin Jesu’n amah chu kumpipa a bawl diing a pawngmat diingin hung diing ahi uh chih a heet tahin amah ngenin a chiahtuamta a.

¹⁶Huleh nitaah lam ahung hihin a nungjuite diilaha chiahsuh va.

¹⁷Kuang khatah a tuang va, Kapernaum lam zuanin diil tungah a chiahuh. Huleh khua a mialta a, Jesu laha kawmvah ahung nai sih hi.

¹⁸Huihpi haat tah a nun jiahin tui a kinawh saang hulhul a.

¹⁹Huchi'n farlong sawmnih le ngaa aha, sawmthum aha a jap nungun Jesu diil tunga a keenga pai a, kuang lam hung naih a mu va, huleh a lau uhi.

²⁰Hizongleh ama’n a kawmvah, Kei ka hi, lau sih un, a chi a.

²¹Huin amahun uttahin amah chu kuang ah a tuangsahta va; huleh kuang chu thakhat in a zot gam uh a tungpahta hi.

²²A jingni’n diil gaal lehlam a ding mipite’n a nungjuite tuanna loungal kuang dang a um sih chih leh, Jesu a nungjuite toh kuang ah a chiah sih a, a nungjuite a ngen un a chiah uh chih a heta va.

²³(Ahihvangin Tiberi akipanin Lalpa’n a vangpiah nunga tanghou a neehna mun kawmah kuang dang ahung tung ngal a;)

²⁴Huchi'n mipite’n Jesu hileh, a nungjuite hileh a um nawn sih uh chih ahung heet tahun amah u’zong kuang neute ah a tuang va, Jesu hawlin Kapernaum ahung tung va.

²⁵Huleh amah chu diil gaal lehlama ahung muh tahun a kawmah, Rabbi, bangchih a hitah tung na hiai? a chi va.

²⁶Jesu’n a dawng a, a kawmvah, Chihtahzetin chihtahzetin ka hung hilh ahi, Silmahte na muh jiah va hung hawl na hi sih va, hizongleh tanghou na neeh va, na vah jiahun na hung hawl uh ahi zaw hi.

²⁷An mangthang diing mai hawlin phephe sih unla, kumtuang hinna dong a um zing diing an, mihing Tapa in ahung piah diing hawlin phe zaw un; ajiahchu Pa Pathian in amah a chiamchihta hi, a chi a.

²⁸Huin amahun a kawmah, Pathian nna ka toh theihna diingun bang ahiai ka bawl diing uh? a chi va.

²⁹Jesu’n a dawng a, a kawmvah, Amah ahung sawlpa na gintaat uh, hichu Pathian natoh ahi, a chi a.

³⁰Hujiahin amahun a kawmah, Ahihleh ka muh va ka hung gintaat theihna diingun bang chiamchihna na hung ensah diai?

³¹Ka pulepate un gamdaiah manna a ne uh; Ama’n vaan a kipanin neeh diing tanghou a pia, chia kigelh bangin, a chi va.

³²Huin Jesu’n a kawmvah, Chihtahzetin, chihtahzetin ka hung hilh ahi, Mosi in hu tanghou vaan a kipanin ahung pe sih a, hizongleh ka Pa in vaan a kipanin tanghou dihtah ahung pe zaw hi.

³³Bang jiahin ahiai i chih leh Pathian tanghou chu vaan a kipana hung kumsuh, khovel kawma hinna pe pa chu ahi, a chi a.

³⁴Amahun a kawmah, Lalpa, hu tanghou chu kumkhuain hung pia in, a chi va.

³⁵Jesu’n a kawmvah, Kei hinna tanghou chu ka hi; koipouh ka kawma hung chu a gilkial ngei sih diing, huleh koipouh kei hung gingta chu a dangtaah ngei sih diing,

³⁶Hizongleh ka hung hilh ahi, Nangun na hung muh un zong na hung gingta sih uh.

³⁷Ka Pa’n ahung piah zousiah ka kawmah ahung diing; huleh ka kawma hung photmah chu bangchi lezong ka nohdoh het sih diing.

³⁸Ajiahchu keimah deihzawng bawl diing a vaan apata hungsuh ka hi sih a, ahung sawlpa deihzawng bawl diing a hungsuh ka hi zaw hi.

³⁹Huleh Pa ahung sawlpa deihzawng chu hi ahi, Ama’n ahung piah zousiah khatbeeh mangsah lou a, hizongleh ni tawpni chianga ka kaihthoh chu,

⁴⁰Huleh hichu ahung sawlpa deihzawng ahi, Koipouh Tapa mu a, gingta in kumtuang hinna a neih a, huleh ke’n ni tawpni chianga amah ka kaihthoh chu, a chi a.

⁴¹Huin Judate a tungah a phun va, Kei vaan apata tanghou hung kumsuh ka hi, a chih jiahin.

⁴²Huleh amahun, Hipa hi Jesu, Joseph tapa, a pa leh a nu zong i heet uh hilou ahiai mah? Vaan apata hung kumsuh ka hi, bangchidana a chih ahiai? a chi va.

⁴³Hujiahin Jesu’n a dawng a, a kawmvah, Phun phun sih un.

⁴⁴Pa ahung sawlpa’n a hiip louhleh koimah ka kawmah ahung thei sih; huleh ke’n amah nitawp ni chiangin ka kaithou diing.

⁴⁵Zawlneite lehkhabu ah, Pathian hilhin a um veh diing uh, chih gelh ahi. Hujiahin michin Pa thu ja a, he photmah ka kawmah ahung veu hi.

⁴⁶Mi koimah in Pa a mu ngei sih, Pathian a kipana hungpa loungal; ama’n chu Pa a muta hi.

⁴⁷Chihtahzetin, chihtahzetin ka hung hilh hi, Koipouh kei hung gingta in kumtuang hinna a neita.

⁴⁸Kei hinna tanghou chu ka hi.

⁴⁹Na pulepate un gamdaiah manna a ne va, a si uh.

⁵⁰Hichu vaan apata hung kumsuh tanghou, mi’n a neeh a, a sih louh nadiing uh chu ahi.

⁵¹Kei vaan apata tanghou hing hung kumsuh chu ka hi, mi koipouh in hi tanghou a neeh inchu kumtuang in a hing diing uh; huleh ka tanghou piah diing chu khovel hinna diing a ka piah diing ka tahsa ahi, a chi a.

⁵²Hujiahin Judate a kinial va, Bangchidana hipa’n a tahsa neeh diing a pe thei diing ahiai? a chi va.

⁵³Huin Jesu’n a kawmvah, Chihtahzetin, chihtahzetin ka hung hilh ahi, Mihing Tapa tahsa na neeh va, huleh a sisan na dawn louh uleh nanguhah hinna na nei sih uh.

⁵⁴Koipouh ka tahsa ne a, huleh ka sisan dawnin kumtuang hinna a neita; huleh ke’n amah chu ni tawpni chian ka kaithou diing hi.

⁵⁵Ajiahchu ka tahsa hi an ahitahzet a, huleh ka sisan zong dawn diing tahzet ahi.

⁵⁶Koipouh ka tahsa ne a, ka sisan dawn chu keiah a um zinga, huleh kei amah ah ka um zing hi.

⁵⁷Pa hingin ahung sawl a, huleh Pa jiaha ka hin bangmahin koipouh kei hung ne chu kei jiahin amah zong a hing diing.

⁵⁸Hichu vaan a kipana tanghou hing hung kumsuh chu ahi; na pulepate un manna a neeh va a sih banguh chu ahi sih; koipouh hi tanghou ne chu kumtuang in a hing diing hi, a chi a.

⁵⁹Hi thute ama’n Kapernaum khua a, a um laiin kikhopna inn ah a soi hi.

⁶⁰Hujiahin a nungjuite tampiin hi thu a jah un, Hichu thu hahsa ahi, kua’n ahiai ngai thei diing? a chi va.

⁶¹Huin Jesu’n hi thu ah a nungjuite a phun uh chih a lungsima a heet in, a kawmvah, Hi thuin nanguh ahung lunghilousah maw?

⁶²Mihing Tapa tuma a, a umna ngeiah kaltou mu le u’chin bang na loh diviai?

⁶³Suhingtu chu hagau ahi a, tahsa chu bangmah a phatuam sih; na kawmva ka thusoite chu hagau ahi a, huleh hinna zong ahi.

⁶⁴Hizongleh na lahvah gingta lou khenkhat na um uh, a chi a. Ajiahchu Jesu’n a tuung apata a gingta loute leh amah mansah diingpa a heetsa ahi.

⁶⁵Huleh ama’n, Hujiahin ahi, Ka Pa’n ahung piah louhleh koimah ka kawmah ahung thei sih, chia na kawmva ka soi, a chi a.

⁶⁶Hu huna kipanin a nungjuite tampi a nungpaita va, amah a jui nawnta sih uhi.

⁶⁷Huin Jesu’n sawmlenihte kawmah, Nanguh zong na paimang diing uh maw? a chi a.

⁶⁸Simon Peter in a dawng a, a kawmah, Lalpa, koi kawmah ahiai ka chiah diing uh? Nang in kumtuang hinna thute na nei hi.

⁶⁹Huleh nang chu hu Pathian hing Tapa, Khrist chu na hi chih ka gingta va, he zong ka he uhi, a chi a.

⁷⁰Jesu’n amahuh a dawng a, Nanguh sawmlenihte ka hung teel na hi sih viai mah? huleh na lahva khat diabol ahi, a chi a.

⁷¹Ama’n Simon tapa, Juda Iskariot thu a soi ahi; ajiahchu amah hi sawmlenihte laha telve, amah mansah diingpa chu ahi.