Read Simte JOHN 7 Bible Online

JOHN 7 - Simte bible

JOHN 7

¹Hi silte nungin Jesu chu Galili gam ah a vaah a, Judate’n thah a tup jiahun Judia gam a pha nuamta sih a.

³Hujiahin a unaute’n a kawmah, Hi apat in Judia gam ah chiahmang in, na nungjuite’n na natohte a muh theihna diingun;

⁴A minthanna diing bawl ngalin koima’n sil bang aha a guuhin a bawl ngei sih hi. Hi silte bawl na hihleh khovel kawmah kimusah in, a chi va.

⁵Ajiahchu a unaute ngei in zong amah a gingta sih uhi.

⁶Huin Jesu’n a kawmvah, Ka hun a tung nai sih; hizongleh nanguh hun chu bangchih laipouh in a tung zing hi.

⁷Khovel in nanguh ahung ho thei sih a, kei chu ahung hua uhi: a natohte uh a gilou chih ka heetsah jiahin.

⁸Nanguh gual vaahna ah chiahtou un; kei chu hi gual vaahna ah ka hungtou nai sih diing hi. Ajiahchu ka hun a tung bukim nai sih hi, a chi a.

⁹Hi thute a kawmva a soi zohin amah chu Galili gam ah a um zing nalai a.

¹⁰Hizongleh a unaute ankuang luina a, a chiahtouh nungun amah zong vaantaang heet hilou in, a guuhin a chiahtou a.

¹¹Huin Judate’n gual vaahna ah amah a hawl va, Khoi a um ahiai? a chi va.

¹²Huchi'n amah tungtaang ah mipite lahah phunna nasatah a umta a; ajiahchu khenkhat in, Mi hoih ahi, a chi va; a dangin, Mite a heem a hizaw, a chi va.

¹³Ahihvangin Judate lau jiahin koima’n a tung thu a langtangin a soi ngam sih uhi.

¹⁴Huleh ankuang lui saan lai tahin Jesu chu Pathian biahinn ah a chiahtou a, thu a hilh a.

¹⁵Huleh Judate’n thumah a sa va, Hipa’n jil ngeiloupi a bangchidan a lehkha he ahiai? a chi va.

¹⁶Huin Jesu’n amahuh a dawng a, Ka thuhilh chu keimaha hung kuan ahi sih a, ahung sawlpa a hung kuan a hizaw hi.

¹⁷Mi koipouh in a deihzawng a bawl inchu thuhilhna chu Pathian a kuan ahiai, ahihlouhleh keimah phuaah thuh ka soi ahiai chih a he diing uh.

¹⁸Koipouh amah phuaahthuh thusoi chu amah kipaahtawina diing hawl ahi; hizongleh koipouh a sawlpa paahtawina diing hawl chu, amah ngei chu mi dih ahi a, amah ah dihtat louhna himhim a um sih hi.

¹⁹Mosi’n nanguh daan ahung pe sih eimah? hizongleh na lahva koima’n daan na jui sih uh. Bang diinga thah hung tum na hi viai? a chi a.

²⁰Mipite’n a dawng va, Dawi paai na hive, kua’n ahiai nang thah hung tum? a chi va.

²¹Jesu’n a dawng a, a kawmvah, Nna khat ka tong a, na bawnun thumah na sa uhi.

²²Huchi'n Mosi’n zehtan thu nanguh ahung pia a, (Mosi piah ahi sih a, pulepate a hung kipan ahi zaw), huleh khawlni’n mi zeh na tan veu uh.

²³Mosi daan bohsiat louh na diing a mi’n khawlni a zeh a tan inchu, ke’n khawlni a mi khat ka damsiangsah jiahin ka tungah na lungthah uh ahiai mah?

²⁴A latdan bangin thu khen sih unla, dihtattahin khen zaw un, a chi a.

²⁵Huin Jerusalem mi khenkhat in, Hipa, thah a tup pa uh hilou ahiai mah?

²⁶Hizongleh endih vua, haangtahin thu a soi a, amahun laha kawmah bangmah a soi sih uh. Amah hi Khrist chu ahi chih vaihawmtute’n a he tahtah uh adiai?

²⁷Enlah hipa khoia hung kipan chih i he ngal a, hizongleh Khrist ahung chiangin chu koima’n a he sih diing hi, a chi va.

²⁸Huin, Jesu chu Pathian biahinn ah thuhilhin a kikou a, Nangun kei na hung he va, huleh khoi a hung kuan chih zong na hung he uh; keimah thua hung ka hi sih a, hizongleh amah ahung sawlpa chu a dih ahi, nangun amah na he sih uh.

²⁹Hizongleh ke’n amah ka he hi; ajiahchu amah a kuana hung ka hi a, huleh amah hung sawl ka hi, a chi a.

³⁰Huin amah mat a tum va, hizongleh a hun a tun nai louh jiahin koima’n a tungah khut a nga sih uh.

³¹Huleh mipi tam tahin amah a gingta va, Khrist ahung chiangin hipa bawl sanga tamzaw silmah a bawl diai? a chi uh.

³²Pharisaite’n a tung thu ah mipite hutobanga a phun uh a ja va, huleh Pharisaite leh siampu lalte’n amah man diingin houtute a sawl va.

³³Jesu’n a kawmvah, Tomchakhat na kawmvah ka um diing a, huzohchian ahung sawlpa kawmah ka chiah diing hi.

³⁴Nangun na hung hawl diing va, na hung mu sih diing uh; huleh ka umna ah na hung thei sih diing uh, a chi a.

³⁵Huin Judate amahuh kihouin, i muh louh diing a khoi a chiah diing a de aw? Jentelte laha kithedalhte kawma chiah a Jentelte thu va hilh diing a diai?

³⁶Na hung hawl diing va, na hung mu sih diing uh; huleh ka umna ah na hung thei sih diing uh, a chih bang a chihna a diai? a chi uhi.

³⁷Huleh gual vaahna ni loupi, ni nunungpenah Jesu chu a ding a, a kikou a, Koipouh a dang a taahleh ka kawmah hung henla, dawn heh.

³⁸Koipouh kei hung gingta chu Pathian lehkhathuin a soi bangin a sunga kipanin tuihing luite a luang doh diing, a chi a.

³⁹(Hizongleh hichu ama’n amah gingtate’n a muh diing uh Hagau Siangthou a soi na ahi; ajiahchu Hagau Siangthou piah ahi nai sih a, Jesu paahtawia a um nai louh jiahin).

⁴⁰Hujiahin mipi tamtahte’n hi thu a jah tahun, Tahzetin hipa zawlnei khu ahi, a chi va;

⁴¹Adangte’n, Khrist ahi, a chi uh. Hizongleh khenkhatte’n, Khrist Galili gam ah ahung piang diai mah?

⁴²Pathian lehkhathu in, Khrist chu David haahte lahah leh David teenna khua Bethlehem ah ahung piangdoh diing, a chi sih eimah? a chi uh.

⁴³Huchi'n amah jiahin mite lahah kikhenna a umta hi.

⁴⁴Huleh a lahva khenkhat in amah mat a tum va, hizongleh koima’n a tungah khut a nga sih uh.

⁴⁵Huin houtute chu siampu lalte leh Pharisaite kawmah a hung va, huleh amahun a kawmvah, Bang diinga amah hung puilou? ana chi va.

⁴⁶Houtute’n, Hipa thusoi bangin koima’n thu soi ngei himhim sih, a chi va, a dawng va.

⁴⁷Huin Pharisaite’n, Nang u’zong heema um na hita uh maw?

⁴⁸Vaihawmtute leh Pharisaite lahah amah gingta mi a umkha ta’imah?

⁴⁹Hizongleh daan he lou hi mipite chu haamsethuaah ahi uh, a chi va, a dawng va.

⁵⁰Nikodem, jan a Jesu kawma hungpa, a lahva telve in a kawmvah,

⁵¹I daanun mi amah kama thu jah ma leh, a silbawlte heet ma in siamlouh a tangsah ngei ei mah? a chi a.

⁵²Amahun a dawng va, a kawmah, Nang zong Galili mi na hia maw? Hawl inla, en in, ajiahchu Galili gam ah zawlnei himhim a piang ngei sih hi, a chi va.

⁵³Huin mi chin a inn chiat vah a chiahta uhi.