Read Simte JOHN 8 Bible Online

JOHN 8 - Simte bible

JOHN 8

²Huleh jingkal matahin Pathian biahinn ah ahung kiit a, mi zousiah a kawmah a hung a; huleh amah chu a tou a, amahuh thu a hilh hi.

³Huleh lehkhagialtute leh Pharisaite’n numei khat, a aangkawm lai a, a mat uh, a kawmah ahung pui va, a lai va a dinsah zoh un,

⁴A kawmah, Houtupa, hi numei a aangkawm laitaha kiman ahi a.

⁵Daan lehkhabu ah Mosi’n hitobang mi chu suang a sehlup diing thu ahung pia hi; hizongleh nang bangchi diing na chi ei? a chi va.

⁶Hichu amah heehna diing a muh theihna diing va a ze-etna a, a soi uh ahi a. Hizongleh Jesu chu a kuun a, amahuh soi jalou hileh kilawm in, a khutzung in lei a gial a.

⁷Huchi'n a dot mun jiahun a thoudoh a, a kawmvah, Na lahva sualna nei hetlou penin amahnu chu sep masa heh, a chi a.

⁸Huin a kuun kiit a, lei a gial jel a.

⁹Huleh amahun hi thu a jah un a sialepha heetna un siamlouh tangsah in, a upapen a kipan a tawptanin khat khat in a chiahmangta va; Jesu chauh leh numeinu a lai a diing toh a um hi.

¹⁰Huin Jesu a thou a, numeinu chih louh midang a muh louh tahin a kawmah, Numei, nang hung heehte khoi a um ahita viai? koima’n siamlouh ahung tangsah sih maw? a chi a.

¹¹Amahnu’n, Koima’n hung tangsah lou, Lalpa, a chi a. Jesu’n a kawmah, Ke’n zong siamlouh ka hung tangsah sih hi, chiah inla, sual kiit nawn sin, a chi hi.

¹²Huin Jesu’n a kawmvah, Kei khovel vaah ka hi; koipouh kei hung jui chu mial ah a khohei sih diing a, hizongleh hinna vaah a nei zaw diing hi, a chi a.

¹³Hujiahin Pharisaite’n a kawmah, Nangmah leh nangmah thu na kiheetsah ahi, na thu heetsah a dih sih hi, a chi va.

¹⁴Jesu’n a dawng a, a kawmvah, Keimah leh keimah thu kiheetsah hizongleh ka thu heetsah a dih hi; ajiahchu khoi a kuan a hung ka hih leh, khoi a chiah diing ka hih ka he hi; hizongleng nangun khoi a kuan a hung ka hih leh, khoi a chiah diing ka hih na he sih uh.

¹⁵Nangun tahsa daan in vai na hawm uh; ke’n koimah vai ka hawmsah sih.

¹⁶Huleh vai hawmsah hitazongleng ka vaihawm chu a dih hi; ajiahchu kei ngen ka hi sih a, kei leh ka Pa ahung sawlpa ka hi zaw uhi.

¹⁷Na daan lehkhabu va’ zong, Mi nih thuheetpih chu a dih ahi, chih gelh ahi.

¹⁸Kei chu keimah thuheetpih khat ka hi a, huleh Pa ahung sawlpa’n ka thu ahung heetpih hi, a chia.

¹⁹Huin amahun, a kawmah, Na Pa khoiah a um ei? a chi va Jesu’n a dawng a, Nangun kei lah na hung he sih va, ka Pa lah na he sih uh; kei hung he hile uchin ka Pa zong na he diing uh, a chi a.

²⁰Hi thute Jesu’n Pathian biahinn a thu a hilh laiin sumkoihna munah a soi a; huleh koima’n a tungah khut a nga sih, ahun a tun nai louh jiahin.

²¹Huin Jesu’n a kawmvah, Ka chiahmang diing a, nangun na hung hawl diing uh; ka chiahna ah na hung thei sih diing uh, a chi kiit a.

²²Huin Judate’n, Amah leh amah a kithat diing a diai? a chi va; ama’n, Ka chiahna diing ah na hung thei sih diing uh, a chih jiahin.

²³Huleh ama’n a kawmvah, Nanguh chu nuai lama kipan na hi va; kei chu tunglama kipan ka hi; nanguh hi khovel a na hi va, kei chu hi khovel a ka hi sih.

²⁴Hujiahin na kawmvah, Na sualna vah na si diing uh; ajiahchu kei amah ka hi chih na gintaat louh uleh na sualna vah na si diing uh, ka chi ahi, a chi a.

²⁵Huin amahun a kawmah, Nang koi na hiai? a chi va Jesu’n a kawmvah, Achiila kipana na kawmva ka soi khu mah ka hi,

²⁶Na tung thu vah soi diing leh vaihawmsah diing tampi ka nei hi; hizongleh ahung sawlpa chu a dih hi; huleh amah apata ka jahte chu khovel kawmah ka soi veu hi, a chi a.

²⁷Ama’n Pa thu a kawmvah a soi ahi chih amahun a he sih uhi.

²⁸Huin Jesu’n a kawmvah, Mihing Tapa na khaikaang zoh chiangun amah ka hi chih leh, keimah thu in bangmah ka bawl sih a, hizongleh ka Pa’n ahung hilh bangin hi thute ka soi zaw ahi, chih na he diing uh.

²⁹Amah ahung sawlpa ka kawmah a um hi; Pa'in ka ngen in ahung nuse sih; ajiahchu a kipaah zawng silte ka bawl zing hi, a chi a.

³⁰Hi thute a soi laiin mi tampi’n amah a gingta uhi.

³¹Huin Jesu’n amah gingta Judate kawmah, Ka thu a na um zing uleh ka nungjuite na hitahzet diing uh.

³²Huleh thutah na he diing va, thutahin nanguh ahung suaahtasah diing hi, a chi a.

³³Amahun, Abraham haahte ka hi va, bangchih mahin koimah salin ka taang ngei sih uh; bangchidan a na suaahta diing uh, na chih ahiai? chi'n a dawng va.

³⁴Jesu’n amahuh a dawng a, Chihtahzetin, chihtahzetin ka hung hilh ahi, Koipouh sual bawl chu sual suaah ahi.

³⁵Suaah chu kumtuang in innah a um zing sih; hizongleh Tapa chu kumtuang in a um zing hi.

³⁶Hujiahin Tapa in ahung suaahtaatsah inchu na suaahta tahzet diing uhi.

³⁷Abraham haahte na hi uh chih ka hung he hi; hizongleh nangun kei thah na hung tum uh, ka thu nanguh a, a um louh jiahin.

³⁸Ke’n ka Pa kawma ka muhte ka soi a; nangun na pa kawmva na muhte uh na bawl uhi, a chi a.

³⁹Amahun a dawng va, a kawmah, Abraham ka pa uh ahi, a chi va Jesu’n a kawmvah, Abraham tate hile u’chin Abraham natohte na tong diing uh.

⁴⁰Hizongleh tuin kei, Pathian kawma ka jah thutah na kawmva hung hilhpa thah na hung tum uh; Abraham in hichibangin a bawl sih hi.

⁴¹Nangun chu na pa uh silbawlte na bawl uhi, a chi a. Huin amahun a kawmah, aang kikawm a piang ka hi sih uh; Pa khat ka nei uh, huchu Pathian ahi, a chi va.

⁴²Jesu’n a kawmvah, Pathian na Pa uh hile chu keimah na hung lungsiat diing uh; ajiahchu Pathian a kipana hung pawt ka hi a; keimah thu in ka hung sih a, ama’n ahung sawl zaw ahi.

⁴³Bangchidan a ka haam dan hesiam lou na hiviai? ka thu na pom theih louh jiahun ahi.

⁴⁴Nang u’chu na pa uh diabol a hung kuan na hi uh, huleh na pa uh deihzawng na bawl ut uhi. Amah chu a chiila kipana tualthat ahi a, huleh thutah ah a um sih, amaha thutah a um louh jiahin. Juau a soi inzong amah a ngei a soi ahi; bang jiahin ahiai i chih leh amah mi zuau ahi a, huleh zuau pa zong ahi.

⁴⁵Thutah ka soi jiahin nangun na hung gingta sih uhi.

⁴⁶Na lahvah kua na hi viai sual thu a siamlouh hung tangsah? Thutah ka soi leh bang diing a hung gingta lou na hi viai?

⁴⁷Pathian a hung kuanin Pathian thu a ngaikhe veu; hujiahin na ngaikhe lou uh ahi, Pathian a hung kuan na hih louh jiahun; a chi a.

⁴⁸Huin Judate’n a dawng va, a kawmah, Samarimi na hi a, huleh dawipaai na hi ka hung chih uh ka chi dih mahmah sih viaimah? a chi va.

⁴⁹Jesu’n a dawng a, Dawipaai ka hi sih a, ka Pa ka paahtawi ahi zaw; nangun kei na hung paahtawi sih uh.

⁵⁰Keimah loupina diing chauh ka hawl sih; a hawl leh vaihawmtu khat a um hi.

⁵¹Chihtahzetin, chihtahzetin ka hung hilh ahi, Mi koipouh in ka thu a zop leh sih na a mu ngei himhim sih diing, a chi a.

⁵²Huin Judate’n a kawmah, Tuinchu dawipaai na hi chih ka hung heta uh. Abraham a sita a, huleh zawlneite zong a sita uh; hizongleh nangin, Mi koipouh in ka thu a zop leh sih na a mu ngei himhim sih diing, na chi hi.

⁵³Ka pu uh Abraham sisa sanga loupizaw na hiai mah? huleh zawlneite zong a sita uh; nang leh nang koia kibawl na hiai? a chi va.

⁵⁴Jesu’n, Kei le kei kipaahtawi hitaleng ka kipaahtawina bangmah ahi sih diing; ahung paahtawi chu ka Pa, nangun ka Pathian uh ahi na chih uh ahi.

⁵⁵Hizongleh nangun amah na he sih uh; ke’n chu amah ka he hi; amah ka he sih chitaleng nanguh banga mi zuau ka hita diing hi; hizongleh amah ka he a, huleh a thu zong ka zop zing hi.

⁵⁶Na pu uh Abraham in ka ni muh diing a nuam mahmah a, huleh a mu ngei a, a kipaah mahmah hi, a chi a.

⁵⁷Huin Judate’n a kawmah, Nang kum sawmngaa zong ching nailou chin a, Abraham na mukha maw? a chi va.

⁵⁸Jesu’n a kawmvah, Chihtahzetin, chihtahzetin ka hung hilh ahi, Abraham um ma in ka um hi, a chi a.

⁵⁹Huin amahun a sehna diingin suang a la va, hizongleh Jesu chu a kiphual a, Pathian biahinn apat a pawta, a lahva paisuaahin a chiahta hi.