Read Simte JOHN 9 Bible Online

JOHN 9 - Simte bible

JOHN 9

¹Huleh Jesu’n a paikawmin a pian apat mittaw khat a mu a.

²A nungjuite’n a kawmah, Houtupa, hipa mittaw a, a pian, kua’n ahiai sil sual bawl, hipa’n ahiai, ahihlouhleh a nulepa’n? chi'n a dong va.

³Jesu’n a dawng a, Hipa lah a sual sih a, a nulepa lah a sual sih uh; hizongleh Pathian natohte amah a, a kilattheih na diingin ahi zaw hi.

⁴Suun ahihlaiin ahung sawlpa nna ka toh ngeingei diing ahi; jan hung tung diing ahita, hu hun chiangin koima’n nna a tong thei sih diing uh.

⁵Khovel a ka um sung teng khovel vaah ka hi, a chi a.

⁶Huchia a soi zohin leiah chil a siat a, hu chilin tungman a bawl a, huleh hu tungman chu mittawpa mit ah a nuh a.

⁷Huleh a kawmah, Chiah inla, Siloam diilah va sil in, a chi a. (Siloam chu, Sawl chihna ahi). Hujiahin a chiah a, a sil a, huleh muthei in a hungta hi.

⁸Hujiahin a innveengte leh ma a, a mittawt lai musate’n, Hipa hi khutdoh a tou veupa hilou ahiai mah? a chi va.

⁹Khenkhatte’n, Amah ahi, a chi va a dangte’n, A kibatpih ahi, a chi uh; hizongleh ama’n, Amah chu ka hi, a chi a.

¹⁰Hujiahin amahun a kawmah, Bangchi'n ahiai na mit ahung vaah? a chi va.

¹¹Ama’n a dawng a, Jesu kichi mi khat in tungman a bawl a, ka mit ahung nuhsah a, huleh ka kawmah, Siloam diilah chiah inla, va sil in, ahung chi a. Huchi'n ka chiah a, ka sil a, huleh ka mutheita hi, a chi a.

¹²Huin amahun, a kawmah, Amah khoiah a um ei? a chi va. Ama’n, Ka he sih, a chi a.

¹³Huleh a ma a mittawpa chu Pharisaite kawmah ahung pui va.

¹⁴Jesu’n tungman bawl a, a mit a suhvaah ni chu khawlni ahi a.

¹⁵Pharisaite’n zong a mit hung vaah daan a kawmah a dong kiit va. Ama’n a kawmvah, Ka mit ah tungman a nuh a, ka va sil a, huleh ka muta hi, a chi a.

¹⁶Hujiahin Pharisaite khenkhat in, Hipa Pathian a hung kuan ahi sih; ajiahchu khawlni a tang sih hi, a chi va a dangte’n, Bangchi'n misualin hitobang silmah a bawl thei diai? a chi va. Huin a lahvah kikhen na a umta hi.

¹⁷Huin amahun mittawpa kawmah, Na mit hung suhvaahsahpa, amah tungtaang nang bang na chi ngaihtuah ei? a chi kiit va. Ama’n, zawlnei ahi, a chi a.

¹⁸Hizongleh Judate’n chu a mit hung vaahpa nulepa a kouh masiah uh, mittaw ana hia, ahung vaahta ahi chih a tungtaang thu a gingta sih uhi.

¹⁹Huleh amahun a nulepa kawmah, Hipa, na tapa uh mittaw a piang na chih uh ahi maw? bangchi'n ahiai tua ahung muhtheih taah? a chi va.

²⁰A nulepate’n amahuh a dawng va, Hi ka tapa uh ahi a, huleh mittawin a piang chih ka he uh,

²¹Hizongleh bangchidan a tu a ahung muhtheih taah ka he sih uh; huleh kua’n a mit a suhvaahsah zong ka he sih uh; Mi piching ahi na, amah dong un; amah tungtaang ama’n a kisoi mai diing, a chi va.

²²Hi thute a nulepate’n Judate a lau jiahun a soi uhi; ajiahchu Judate’n ma apat in, Amah chu Khrist ahi, chia phuang a umleh kikhopna inn apat nohdoh diing chi'n thu ana lemsahta uhi.

²³Hujiahin ahi a nulepate’n, Mi piching ahi na, amah dong un, a chi uh.

²⁴Huin amahun mittawpa chu a kou kiit va, a kawmah, Pathian paahtawi in, hipa zaw misual ahi chih ka he uh, a chi va.

²⁵Ama’n a dawng a, Misual ahihleh hih louh ka he sih; sil khat ka he hi, mittaw kana hi a, tuin chu ka mutheita hi, a chi a.

²⁶Huin amahun a kawmah, Ama’n na tungah bang ahiai a bawl? na mit bang ahung chi suhvaahsah ei? a chi kiit va.

²⁷Ama’n, Ka hung hilhta a, hizongleh na ja nuam sih uh; bang diinga ja nuam kiit na hi viai? nanguh zong a nungjui hih na ut u'maw? chi'n a dawng a.

²⁸Huin amah a tai va, Nang amah nungjui na hi a; kei u’chu Mosi nungjuite ka hi uh.

²⁹Pathian in Mosi kawmah thu a soi chih ka he uh; hipa ahihleh khoi a kipana hung ahih ka he sih uh, a chi va.

³⁰Amahpa’n a dawng a a kawmvah, Hikhutah ahi a thumah na, Khoi a kipana hung ahih na heet louh uh, ama’n lah ka mit a hungsuh vaahsah ngal hi.

³¹Pathian in misualte thu a ngaikhe ngei sih chih i he uh; hizongleh mi koipouh Pathian ngaihsah a, a deihzawng bawl chu Pathian in a ngaikhe veu hi.

³²Khovel um tuung a kipan koima’n mittaw a piang mit a suhvaahsah chih a kija ngei sih.

³³Hipa Pathian a hung kuan ahih louh inchu bangmah a bawl, thei sih diing, a chi a.

³⁴Amahun a dawng va, a kawmah, Nang sual lumleta piangin keiuh na hung hilh vial maw? a chi va. Huin amah chu a nohdohta uhi.

³⁵Jesu’n amah a nohdoh uh chih a jah in, huleh amah a muh in a kawmah, Pathian Tapa na gingta ei? a chi a.

³⁶Ama’n a dawng a, a kawmah, Lalpa, amah’ koi ahiai? ka gintaat theihna diing in, a chi a.

³⁷Jesu’n a kawmah, Amah na muta a, huleh nang hung houpihpa ahi, a chi a.

³⁸Huin ama’n, Lalpa, ka gingta hi, a chi a. Huleh amah a beta hi.

³⁹Huin Jesu’n, Muthei loute’n ahung muhtheihna diing uleh, mit vaahte mit ahung tawt theihna diing in vaihawm diing in khovel ah ka hung ahi, a chi a.

⁴⁰A kawm a um Pharisai khenkhatte’n hi thute a jah un, a kawmah, Kei u’zong mittaw ka hi viai mah? a chi va.

⁴¹Jesu’n a kawmvah, Mittaw hile u’chin sualna nei lou diing hi u’chin a; hizongleh tuin, Ka muthei uh, na chi va; hujiahin na sualna uh a um zing hi, a chi hi.