Read Simte SILBAWLTE 1 Bible Online

SILBAWLTE 1 - Simte bible

SILBAWLTE 1

¹Aw Theophil, tuma a lehkhathot masazaw ah, Jesu silbawl leh a thuhilh pat thu zousiah ka gial ahi,

²Hagau Siangthou panpih a, A sawlleh teelte kawma thupiahte A piah zoh a, vaan a puitouh a A um ni tan a thu;

³Hu sawllehte kawmah gentheihna A thuaah nungin heetchi ana zuaulou tamtah in hing in A kiensah a, ni sawmli zet a kawmvah A kilaah a, Pathian lalgam thu A soi zing hi.

⁴Amah uh toh kipawl jel in, “Jerusalem khua nuse sih unla, hizongleh Pa silchiam Ka soi na jah uh chu na ngaah un,” chi’n thu A pia hi.

⁵Ajiahchu John in tui in a baptis ngeia; hizongleh nangun chu ni sawtlou sungin Hagau Siangthou in baptisma na tang diing uh, a chi a.

⁶Huleh, amahun ahung kikhop un, a kawm ah, Lalpa tuin ahiai Israelte kawma lalgam na piah kiit diing? chi’n a dong va.

⁷Huleh, Ama’n’ a kawmvah, Pa in a hun leh a ni Amah thuthu a um diing a, a guat, nangun na heet diing uh ahi sih hi.

⁸Hizongleh, na tungva Hagau Siangthou ahung tun chiangin silbawltheihna na nei diing uh; huchi'n Jerusalem khua ah zong, Judia gam leh Samaria gam zousiah ah zong, huleh, kawlmong tanphain zong ka thu heetpihtute na hi diing uh, a chi a.

⁹Huleh, hi thute a soi zohin, a muh tangpi vah vaan a puitouh in a um a; meiin a muh phah louh vah a puimang touta hi.

¹⁰Huleh a paitouh laia, amahun vaan lam a et zing laiun, ngai in, mi nih puanvaam silh in a kawmvah ahung ding va;

¹¹Hute’n chu, Nanguh Galili gam a mite, bang diinga vaan lam en zing a diing na hi viai? Hi Jesu, na kawm vapata vaan a puitouh a um hi, vaan a, a chiah na muh mahbangun, Amah ngei a hung kiit diing hi, a chi uhi.

¹²Huin, Olive taang a chih vapatin Jerusalem khua ah a kiih kiitta va; huchu Jerusalem kho kawm ahi a, khawlni a chiah theihna tan ahi.

¹³Huleh, a luut un, Peter leh John, Jakob leh Andru, Philip leh Thoma, Bartholomai leh Matthai, Alphai tapa Jakob leh Simon Zelot leh Jakob sanggampa Juda umna pindan tungnung ah a chiahtou uh.

¹⁴Hihaw zousiah chu numeite leh, Jesu nu Mari toh, Jesu unaute toh lungsim munkhat in phatuam ngaitaha haamtei in a um zing uhi.

¹⁵Huleh, hu hun laiin Peter chu nungjuite lai ah a ding a, (a bawnun za leh sawmnih vel ahi uh).

¹⁶Mite leh unaute, Hagau Siangthou in David kam a, Jesu mantute lamkaipa Juda thu ana soilawh, hu Pathian lehkhathu khuh ahung tung diing mawng ahi.

¹⁷Ajiahchu, amah hi i lahva simtel ahi a, hi natohna ah tan a nei ahi.

¹⁸Huleh, hipa’n a sualna man in mun khat a lei a; huleh, a bohkhupin a kia a, a lai ah a pawhkeeh a, a gil zousiah a pawt vehta hi.

¹⁹Huleh, hu thu chu Jerusalem khua a um haw zousiah in ana he va; huchi'n, hu mun chu amahuh haam in, Akeldama, a chi va, Huchu sisan mun chihna ahi.

²⁰Psalm bu ah hi thu gelh ahi, A umna suhgam in um henla, a sungah kuamah um sih heh; huleh a houtu hihna midang in tang heh, chih hi.

²¹Huchi’n Lalpa Jesu i lahva luut jel pawt jela awm sung siaha,

²²John baptisma a kipana, i lahva apata vaan a puitouh a a um ni tanpha a hung na kithuahpihte laha mi khat, a thohkiitna hung theihpihtu diingin a um ngei diing ahi, a chi a.

²³Huin mi nih a guat va, khat chu Joseph Barsaba, (a min dang Justa a chih uh) huleh khat chu Matthia ahi.

²⁴Huleh, a haamtei va, Nang, Lalpa, mihing zousiah lungtang hetu, hi nihte laha kua zaw ahiai na teel, hung hesah in,

²⁵Juda in amah umna mun ngeia chiah diingin hi natohna leh sawlleh hihna a puuhsan, mun luah diingin, a chih va.

²⁶Huleh, aai a saansah va, a aai saan uh chu Matthia tung ah a tu a; huchi’n amah chu sawlleh sawm leh khatte toh simtel ahita hi.