Read Simte SILBAWLTE 10 Bible Online

SILBAWLTE 10 - Simte bible

SILBAWLTE 10

¹Huleh, Caesarea khua ah a min Kornelia kichi mi khat a um a, Italy pawl a chih va sepaih zahoutu ahi a;

²Pathian ngaihsahmi ahi a, a innkuante zousiah toh Pathian laudan a siam va, mite kawmah sil tampi a pia a, huleh, Pathian kawmah zong a haamtei zing hi.

³Ama’n suun daah kuaahna vel diingin, manglam bangin, chiantahin Pathian angel khat a kawma luut a, Kornelia, chi'n a mu a.

⁴Huin, Kornelia in amah a et leh, a lau a, Lalpa, bang ahitai? a chi a. Huin, angel in a kawmah, Na haamteinate leh na silpiahte heet zing diingin Pathian ma ah ahung tung touta hi.

⁵Huchi'n, tuin Joppa khua ah mi sawl inla, mi khat Simon Peter a chih uh chu va kousah in;

⁶Amah chu tui khang lian gei a um, savun bawlpa Simon inn a tung ahi; ama’n na bawl diing ahung hilh diing hi, a chi a.

⁷Huleh, angel Kornelia houpih khuh a pai tahin, Kornelia in a suaahte laha mi nih leh amah natohsah diingte laha Pathian ngaihsah sepaih khat a kou a;

⁸Huleh, thu zousiah a kawmva a hilh zohin, Joppa khua ah a sawlta hi.

⁹A jinga a chiah laiun, huleh khua a tun kuanun, Peter chu haamtei diingin, inn tungah a kaltou a, suun daah guupna hun vel ahi a;

¹⁰Huleh, a gil ahung kial mahmah a, an neeh a ut a; hizongleh, neeh diing a bawl laiun jelh in ahung umta hi,

¹¹Huleh vaan kihongin, bangaha bawm, puan liantah bang, a ning li a khih a, lei a hung kikhaikhesuh in a mu a;

¹²Hu sungah chu leitung a keenglinei ganhing chi chinteng leh, gamsate leh ganhing boh vaahte leh, tungleeng vate a um a.

¹³Huleh a kawmah aw in, Peter, thou in; huleh that inla, ne in, a chi a.

¹⁴Hizongleh, Peter in, Hilou e, Lalpa; ajiahchu sianglou leh a niin mawngmawng bangmah ka ne ngei sih hi, a chi a.

¹⁵Huleh aw in a nihveina in, Pathian in ahih siangthousa nang siangthou lou chi sin, a chi a.

¹⁶Huchibangin thumvei ahung um a, huin bawm chu vaan a khaitouh in a um kiitta hi.

¹⁷Huleh Peter in manglam banga a silmuh chu a ngaihna thei loua a buai laiin, ngai in, Kornelia mi sawlte’n Simon inn a kandohta va, kotkhah bulah ana diing va;

¹⁸Huleh a kou va, Simon Peter a chih uh a tun leh tun louh ana dong uh.

¹⁹Peter in manglam banga a sil muh chu a ngaihtuah laiin, Hagau in a kawmah, ngai in, mi thum in ahung hawl uhi.

²⁰Huchi'n thou in, huleh kumkhia inla, bangmah ginglel louin amahuh juiin; amahuh chu ka sawl ahi uh, a chi a.

²¹Huin Peter chu Kornelia mi sawlte kawmah a chiahsuh a, a kawmvah, Ngai un, na hawl uchu ka hi; bang ahiai na hung nasan uh? a chi a.

²²Huleh amahun, Pathian apata angel siangthou khat in, Kornelia, sepaih zahoutu mi dihtah, Pathian laudan siam, Judami zousiah in a soiphat, kawmah na thusoi a jahna diinga, a inn a nang kousah diingin a hilh hi, a chi va.

²³Huin amahuh a kou luut a, a giahsahta a. Huleh a jingin Peter amahuh toh a chiah a, huleh Joppa khua a unau kuate aha in amah a kitonpih uhi.

²⁴Huleh a jing kiitin Caesarea khua ah a luutta va. Huleh, Kornelia in a tanaute leh a lawm deihtahte koukhawm in, amahuh ana ngaah zing a.

²⁵Huleh Peter ahung luut kuanin Kornelia in ana lamtuah a, huleh a keengbulah bohkhup in Pathian biah bangin ana bia a.

²⁶Hizongleh Peter in amah chu a kaithou a, Ding in; kei zong mihing ka hi, a chi a.

²⁷Huleh amah toh kihoulim kawmin, inn sungah a luut a, mi tamtah umkhawm chu a muta hi.

²⁸Huleh a kawmvah, Judami namdang toh kipawl a, a kawmva chiah a si an louhdan na he uh; hizongleh, kuamah sianglou leh niin ka chih diing ahi sih, chih, Pathian in ahung hesah hi.

²⁹Hujiahin na hung kouh tahun, nial louin ka hungpah ahi; hujiahin na hung kouhna san uh bang ahiai? chih, ka hung dong ahi, a chi a.

³⁰Huin Kornelia in, Ka an ngawlna ni li ahita hi; huleh, ka inn ah, pung kuaahna hunin ka haamteia; huleh, ngai in, mi khat puan vaamtah silh in ka ma ah ahung ding a.

³¹Huleh Kornelia, na haamteina jahin a umta, mi kawma na silpiah zong Pathian in a he zing hi.

³²Hujiahin Joppa khua ah mi sawl inla, Simon, Peter a chih uh chu na kawmah kouin; amah chu tui khang lian, panga savun bawlpa Simon inn a tung ahi; amah ahung chiangin thu ahung hilh diing hi, a chi a.

³³Hujiahin, na kawmah mi ka hung sawlpah ahi; na hung hi a hoih hi huchi'n, Pathian in na kawma ahung thupiah zousiah ja diingin, tuin Pathian mitmuh in ka bawnun hi ah ka um uhi, a chi a.

³⁴Huin Peter in a soi a, Pathian in mi deihsahtuam a nei sih hi, chih dihtahin ka he hi;

³⁵Ahihvangin namchin laha kuapouh Amah laudan siam a, dihtaha gamta photmah chu a paahtaat mi ahi veu uhi.

³⁶Pathian in hamuanna thu Jesu Khrist mina soi a, Israel haahte kawma a thu thot chu, (Jesu chu mi zousiah Lalpa ahi).

³⁷John in a taangkoupih baptisma nungin, thu Galili gam a kipan ahung thang pan a, Judia gam zousiah ah a thang suaah a, nangun na he uhi.

³⁸Nazareth Jesu tungtaang thu, Pathian in Amah chu Hagau Siangthou leh silbawltheihna a, a thopdan; Amah chu mi tunga silhoih bawl leh diabol suhduhdah zousiah sudam in a vaah leh a; Pathian a kawma a um jiahin.

³⁹Huleh Judate gam leh, Jerusalem khua a a silbawl zousiah heetpihtu ka hi uhi; amah chu singdawn a khai in a sulumta uhi;

⁴⁰Amah chu Pathian in, ni thum niin a kaithou kiit a, chiantahin a musah hi.

⁴¹Mi zousiah kawmah ahi sih a, hizongleh, Pathian in heetpihtu a guatlawhte kawmah chauh ahi, keiuh misi lah apat a thohkiit nunga a kawma ne a dawnte kawmah.

⁴²Huleh Amah chu mihing leh misite tunga vaihawmtu diing a Pathian guat ahi chih, mi kawma taangkoupih diing leh hesah diingin Pathian in thu ahung pia hi.

⁴³Kuapouh Amah gingta in a min jalin sualnate ngaihdamna a mu diing uh chih a tanchin chu zawlnei zousiah in ana heetsah sa uh ahi, a chi a.

⁴⁴Peter in hi thute a soi laitahin, a thu ja zousiah tung ah, Hagau Siangthou ahung tungta hi.

⁴⁵Huleh zehtante laha gingtute, Peter toh hung zousiahte’n, Hagau Siangthou piah chu Jentelte tunga zong leih ahih jiahin thumah a sa mahmah uhi.

⁴⁶Amahuh chu haam heet louha thu soi in, Pathian phat in a ja ngal va. Huin Peter in a dawng a,

⁴⁷Hi mite eimah banga Hagau Siangthou tang ve chu baptisma a tan louhna diingun mi’n tui zat a khaam thei diviai mah? a chi a.

⁴⁸Huchi'n Lalpa min a baptisma tang diingin thu a pia a. Huin, ni bangzah aha taam diingin a houta uhi.