Read Simte SILBAWLTE 11 Bible Online

SILBAWLTE 11 - Simte bible

SILBAWLTE 11

¹Huleh Judia gam a sawllehte leh unau umte’n Jentelte in zong Pathian thu a pomta uh chih, a jata va.

²Huleh Peter chu Jerusalem khua a tuntouh tahin, zehtante’n a kawmah,

³Zehtanloute inn ah na luut a, a kawmvah na ne vial a, chi'n a kalh va.

⁴Hizongleh Peter in sil umdan a bul akipatin kijom jelin a kawmvah a hilhchian a, hichia chi'n,

⁵Joppa khua ah haamteiin ka um a; huleh, jelin ka um a, manglam bangin, bangaha bawm, puan liantah bang, a ning li a khih a, vaan akipat a kikhaikhia ka mu a; ka kawm ngeiah ahung tung hi;

⁶Huchu ka en tinten a, ka ngaihtuah a, huleh lei a gamsa keeng li neite, gamsate, ganhingte boh vaahte leh tunga leeng vate ka mu a.

⁷Huleh, aw in, Peter, thou inla; that inla ne in, hung chi'n ka ja a.

⁸Hizongleh ke'n, Lalpa, hilou e, ajiahchu sianglou leh niin mawngmawng bangmah ka kam ah a luut ngei sih, ka chi a.

⁹Hizongleh vaan akipanin aw in, Pathian in a suhsiangsa nang siang lou chi sin, ahung chi kiit a.

¹⁰Huleh huchibang ngenin thumvei ahung um a, huin a bawnin vaan ah khaitouh in a um kiitta hi.

¹¹Huleh ngai un, mi thum Caesarea apat a ka kawma ahung sawl uh ka umna inn ah ana tung uh a.

¹²Huleh Hagau in ginglel lou leh kuamah khentuam nei loua, amahuh jui diingin ahung sawl a. Hi unau guupte’n zong ahung jui va, hu mi inn ah ka luut uhi;

¹³Huleh ama’n ka kawmvah, a inn a angel ding a muhdan leh, angel in a kawma, Joppa khua ah mi sawl inla, Simon Peter a chih uh chu va kousah in;

¹⁴Ama’n thu ahung hilh diing a, hu thuin nang leh na innkuanpihte huhing in na um diing uh, a chihdan zong ahung hilh hi.

¹⁵Huleh thu ka soi pat leh, Hagau Siangthou i tunga ahung tun chiil lai mahbangin, a tungvah ahung tungta hi.

¹⁶Huin Lalpa thu, John in tui in mi a baptis veu a; hizongleh, nangun chu Hagau Siangthou in baptisma na hung tang diing uh, a chih chu ka hung hedoh kiitta hi.

¹⁷Huchi'n eiuh Lalpa Jesu Khrist gingtate kawma, Pathian in silpiah ahung piah bang a kawmva a piah ve nungin, kei bang giap hi Pathian nial gual ka hiaimah? a chi a.

¹⁸Hu thu chu a jah tahun a sipta va, Huchi ahihleh, Pathian in Jentelte zong hing diingin a kisiih uh phal ahita ve, chi'n Pathian a phatta uhi.

¹⁹Huleh Stephen jiaha a bawlsiat uh, a taithaangte chu Phoenicia gamte, Cyprus gamte, Antiok khuate tanphain a zin va, Judate kawm chauh ah lou chu kuamah kawmah thu a soi sih uh.

²⁰Hizongleh a lahva khenkhat chu Cyprus gam leh Cyrene khua a mite ahi va, hu mite’n Antiok khua a tunun Grikte zong a houpih va, Lalpa Jesu Tanchinpha a hilhta uhi.

²¹Huleh Lalpa khut in amahuh a panpih a, huleh, mi tamtah in a gingta va, Lalpa lam ahung ngatta uhi.

²²Huin a tanchin thu uh Jerusalem khua a kouhtuam umte bil ah a luutta a; huleh, Antiok khua tung diingin Barnaba a sawlkhia va.

²³Huleh amah a va tuna Pathian khotuah zia a va muh in a kipaah mahmah a, phatuam ngaitaha Lalpa chu tu zing diingin a bawnun a hasotta hi.

²⁴Ajiahchu amah chu mi hoihtah ahi a, Hagau Siangthou leh ginna a dim ahi a, huleh, mi tamtah Lalpa kawmah a telbehta uhi.

²⁵Huin Barnaba chu Saul hawl diingin Tarsa khua ah a chiah a,

²⁶Huleh amah a muh in Antiok khua ah ahung pui a. Huleh, hichi ahung hi a, kumkhat kouhtuamte kikhopna ah a tel uh a, mi tampi thu a hilh uhi. Huleh, Antiok khua ah, nungjuite chu Khristian a kichi masapen uhi.

²⁷Huleh hulaiin zawlnei kuate aha Jerusalem khua apatin Antiok khua ah ahung va.

²⁸Huleh a lahva mi khat, a min Agaba chu a ding a, khovel zousiah ah kial loupitah tung ding ahi chih, Hagau hilhin a hesah a, hu kial chu Klaudia Kaisar lal laiin ahung tung hi.

²⁹Huin nungjuite’n a ngaapdan chiat un, Judia gam a unau umte kawmah panpihna thot a tum uh;

³⁰Huchu a bawlta ngei va, Barnaba leh Saul khut ah, upate kawmah a thotta uhi.