Read Simte SILBAWLTE 12 Bible Online

SILBAWLTE 12 - Simte bible

SILBAWLTE 12

¹Huleh hulai velin kumpipa Herod in kouhtuamte laha kuate aha suhduhdah tum in a khut a lehta a.

²Huleh John sanggampa Jakob chu namsaau in a saatlum a.

³Huleh hihin Judate a kipaahsah chih a muh jiahin, Peter zong mat a tum sawn a (Hulai chu tanghou tol sohlouh nite a hi).

⁴Huleh, amah a mat tahin suangkul ah a khum a, sepaih honli li chiat jelin a veen kheelsah a; chiahkaan kuut zohin mipite kawmah puidoh a tum hi.

⁵Hujiahin Peter chu suangkul ah a koih tadih a; hizongleh, kouhtuamte’n amah diingin phatuamngaitahin Pathian kawmah a haamteisah zing uhi.

⁶Huleh Herod in a puidoh diing ni, hu jan ngei in Peter chu sepaih nih kikal ah khainiang nih bulh in a ihmu a; huleh, a veengtute’n zong kotkhaah bul a um in suangkul chu a veeng uhi.

⁷Huleh ngai in, Lalpa angel khat a kawmah a hung a, suangkul sungah vaah ahung taangta a, huleh Peter chu a pang beeng in a phawng a, Thou kin in, a chi a, Huleh khainiangte a khut apat a keta hi.

⁸Huin angel in a kawmah, Na kawng gaah inla, na keengtophah but in, a chi a. Huleh ama’n huchibangin ahih a. Huin angel in a kawmah, Na puan silh inla, hung jui in, a chi a.

⁹Huin Peter chu a pawt a, a juita a; angel silbawl chu a tah ahih a he sih a; manglama a muh a sa zaw hi.

¹⁰Veengtu masa leh a nihna a pelh nungun, khopi luutna siihkot chu a tungta va; Huchu amahuh diingin amahin ahung kihongta hi; huleh a pawt va, kotzing khat a paipeel va; huin angel in a paisanpahta hi.

¹¹Huleh Peter a halh tahin, Lalpa’n angel ahung sawl a, Herod khut leh Juda mite kinepna zousiah akipanin ahung hundohta chih tuin chiantahin ka heta, a chi a.

¹²Huleh hu sil a ngaihtuah zohin, John, Mark a chih uh nu Mari inn ah a va chiah a; hu ah chu haamteina nei in mi tamtah ana umkhawm uhi.

¹³Huleh Peter in kotkhaah a kiuh tahin, a min Rhoda kichi nungaah khat a dawng diingin a hung a.

¹⁴Huleh Peter aw ahih a heet tahin a kipaah jiahin kot chu hong louin a tai luut kiit zawta a, Peter kotkhaah bul ah a ding chih a va soi hi.

¹⁵Amahun a kawmah, Angol hi teh, a chi va. Hizongleh ama’n chu thudih ahi chi'n a pang teitei a. Huin, amahun a angel ahi, a chi va.

¹⁶Hizongleh Peter in chu kot a kiukiu a; huleh kot chu a hon tahun, amah a mu va, limdang a sa mahmah uhi.

¹⁷Hizongleh ama’n a sipna diingun a khut in a jap a, Pathian in suangkul apat amah a puidohdan chu a hilhta a. Hi thute Jakob leh unaute kawmah va hilh un, a chi a. Huin a pawt a, mun dang ah a chiahta hi.

¹⁸Huin ni a suah tahin, sepaih haw chu Peter khoia um ahiai? chi'n buai chihtahin a buaita uhi.

¹⁹Huleh, Herod in a hawl a, a muh louh tahin, a veengtute chu a endih a, thah diingin thu a peta hi. Huin Herod chu Juda gam a kipan Caesarea khua ah a chiahsuh a, hu ah a um zingta hi.

²⁰Huleh Herod chu Tura leh Sidon khua a mite tungah a lungkim sih mahmah a; hizongleh, amahun Blasta kumpipa innsung vaipotu chu a kizolhpih va, thukhat a luang in a kawmah a hung va, a khaw lamte uh chu kumpipa khawlama buh po jel ahih jiahun kilemna a ngen uh.

²¹Huleh a ni chiam niin Herod in a lalpuan a silh a, a laltouphah tungah a tou a, a kawmvah thu a soi hi.

²²Huleh mipi chu kikou in, Hi chu Pathian aw ahi, mihinga ahi sih, a chi va.

²³Huleh Pathian kawma paahtawina a piah louh jiahin, Lalpa angel in amah a manpah ngal a; huut in a ne a, a sita hi.

²⁴Hizongleh Pathian thu chu a dalh a, a pung jel hi.

²⁵Huleh Barnaba leh Saul chu a natoh uh a zohun, Jerusalem khua akipat a kiih kiitta va, John, a mintah Mark chu a kawmvah a pui uhi.