Read Simte SILBAWLTE 13 Bible Online

SILBAWLTE 13 - Simte bible

SILBAWLTE 13

¹Huleh Antiok khua a kouhtuam umte laha zawlneite leh thuhilhtute a um va; hute chu Barnaba, Simeon, Nigar a chih uh te, Cyrene khua a um Lusia, kumpipa Herod toh khang khawm Manaen, leh Saul te ahi uh.

²Huchia Lalpa nna tong a an a ngawl laiun, Hagau Siangthou in, Barnaba leh Saul keimah nna tong diingin hung khenkhiahsah un, a chi a.

³Huleh an a ngawl va a haamtei zohun, a tungvah a khut uh a nga va, a chiahsahta uhi.

⁴Huchi'n Hagau Siangthou sawldoh in a chiah va, Seliusia khua ah a chiahsuh va, hu akipatin Cyprus lamah kuang in a chiahta uhi.

⁵Huleh Salamis khua a a um laiun, Judate kikhopna innte ah Pathian thu a soi va; huleh John zong a nna uh tohsah diingin a pui uhi.

⁶Huleh Cyprus tuikulh gam chu tawnsuah in Paphos khua ah a tungva, huah dawisiam zawlnei heem Judami khat a mu va, a min chu Bar-Jesu ahi a.

⁷Hu mi chu gamoptu Serjia Paulus mipiltah kawma um ahi; hu gamoptu’n Saul leh Barnaba chu a kou a, Pathian thu jah a ut a.

⁸Hizongleh Elima (Bar-Jesu min dang umzia ahi), dawisiampa’n gamoptu chu gin louhsah tum in, amahuh chu ana doudaal hi.

⁹Huin Saul, (Paul a chih mah uh) chu Hagau Siangthou in a dim a, amah chu a ensaal a,

¹⁰Huin, Aw Nang mi heem leh hoih louhna chintenga dimpa, nang diabol tapa, nang dihtatna zousiah meelmapa, Lalpa lam dihtahte suhsiat tawplou diing na hi maw?

¹¹Huleh tuin, ngai in, Lalpa khut na tungah a tu ahi, na mit ahung taw diing a, bangtan aha khovaah mu louin na um diing, a chi a. Huin, thakhat in mei leh mial a tungah ahung kia a; khuta kaitu diing hawl in a vaah lehlehta hi.

¹²Huin gamoptu in hu sil kibawl chu a mu a, Lalpa thuhilh chu limdang a sa mahmah a, a gingtata hi.

¹³Huin Paul chu a lawite toh Paphos khua apatin a chiah va, Pamphilia gam a Perga khua a tungva; huleh John in amahuh chiahsanin Jerusalem khua ah a kiih kiitta hi.

¹⁴Hizongleh amahuh chu Perga khua akipat a chiah jel va, Pisidia gam a Antiok khua a tungva, huleh, khawlni in kikhopna inn ah a luut va, a tou uh.

¹⁵Huleh Daan lehkhabu leh zawlneite lehkhabu a sim zohun kikhopna inn upate in a kawmvah mi a sawl va, Nanguh mite leh unaute, mite hasotna thu soi diing na neih uleh soi un, a chi va.

¹⁶Huin Paul a ding a, a khut a jap in, a soi a, Israelmite leh nanguh Pathian laudan siamte, ngai un.

¹⁷Hi Israel namte Pathian in i pulepate uh a teel a, Aigupta gam a, a um laiun a suloupi a, huleh, tungnung khut in hu a kipatin a puidohta hi.

¹⁸Huleh kum sawmli hun sung vel chu gamdai ah a silbawlte uh a ngai thei a.

¹⁹Huleh Kanan gam a nam sagihte a suhmang zohin, a gam uh a kawmvah aaisaan in a hawmsah hi.

²⁰Hu nungin kum zali leh kum sawmngaa sung vaihawmtute a pia a, zawlnei Samuel chiang tanin.

²¹Huleh hu nungin kumpi a ngen va; huchi'n, Pathian in Saul, Kis tapa, Benjamin phung a mi, amahuh a pia a, kum sawmli sung diingin.

²²Huleh amah a suanmang nungin a kumpipa va pang diingin David a tungdohta a; Pathian in hu pa thu chu hesah in, David, Jesse tapa, ka lungtang bang pua mi ka mudohta, ama’n chu ka deihlam phot a bawl diing, a chi a.

²³Hi mipa haahte lahah Pathian in a thuchiam dungjuiin Israelte kawmah Hundampa Jesu ahung tutta hi.

²⁴Ahung ma in John in kisiihna baptisma thu Israelmi zousiah kawmah ana hilh masa hi.

²⁵Huleh John in a lam a juih zoh kuan laiin, Nangun kua hi diingin na hung gingta viai? Amah chu hilou ka hi. Hizongleh, ngai un, ka nungah mi khat hung diing ahi, kei chu a keengtophah phel taah zong ka hi sih hi, a chi hi.

²⁶Mite leh unaute, Abraham suan tate haw, huleh na lahva Pathian laudan siam zousiah haw, na kawmvah hi hutdamna thu hung kihaah ahi.

²⁷Jerusalem khua a umte leh a lamkaiteun, a heet louh jiahun, Amah chu siamlouh tangsah in, hu thute ana sutaangtungta uh ahi.

²⁸A sihna diing khop a tunga bangmah a muh louhun zong, Pilat kawmah suhlup diingin a ngen va.

²⁹Huleh a tungtaang thu na kigelhsa zousiah a suhtaangtung zohun, sing akipanin a lakhia va, haanah a sialta uhi.

³⁰Hizongleh Amah chu Pathian in misi laha kipat a kaithou kiitta hi;

³¹Huleh, amah toh Galili gam a kipat a Jerusalem khua a chiah pute kawmah ni tampi sung a kilaah veu a, hu mite chu tuin mite kawmah a thu heetpihtute ahi uhi.

³²Huleh kei un zong i pulepate uh kawma chiamsa, hu thuchiam tanchin kipaahhuai ka hung hilh uhi.

³³Pathian in Jesu a kaihthoh kiitna ah, Huchu, ei a tate uh kawmah a sutaangtung ahi; Psalm nihna a, Nang chu ka Tapa na hi a, tuni’n ka hung hing ahi, chih gelh bangin.

³⁴Huleh muatna muna pai kiitta lou diing a Pathian in Amah misi laha kipat a kaihthoh diingdan thu chu hichi'n a soi hi, David kawma khotuahna thawnloute nangmah ka hung pe diing, chi'n.

³⁵Hujiahin ama’n Psalm dangah, Na misiangthou chu muatna na musah sih diing hi, a chi kiit jel hi.

³⁶Ajiahchu David in chu Pathian vaihawmsah banga amah khang a mite na a toh zohin, a ihmu a, huleh a pulepate kawmah a sial va, a muat mangta hi.

³⁷Hizongleh Pathian in a kaihthoh in chu muatna a mu sih hi.

³⁸Hujiahin hi chu he un, mite leh unaute; Amah vanga sual ngaihdamna thu na kawmva kisoi ahi;

³⁹Huleh kuapouh a gingta phot chu Mosi daan a siam na tan zoh louhna uh sil zousiah ah, siamtansah in a um hi.

⁴⁰Hujiahin pilvaang un, huchilouin zaw zawlneite lehkhabu a hu thu kisoi na tungvah ahung tungkha diing hi.

⁴¹Nanguh musittute en un, huleh limdang sa unla, mangthai un; ajiahchu na damsungun nna khat ka tong hi, hu nna chu mi’n nanguh hung hilh mahleh uh na gingta top sih diing uhi, chih, a chi a.

⁴²Huleh Judate kikhopna inn apat a pawt un, Jentelte’n khawlni kiit chianga hu thu chu a kawmva soi diingin a ngen uh.

⁴³Huleh kikhawmte chu a kikhenjah tahun, Judate tamtah leh Juda biahdan jui Pathian ngaihsah laha mi tamtah in Paul leh Barnaba a jui va,amahun amahuh chu ana houpih va, Pathian khotuahna a um zing diingin ana hasot uhi.

⁴⁴Huleh khawlni kiit in, a khojang phial un, Pathian thu ngaikhe diingin ahung kikhawm va.

⁴⁵Hizongleh Judate’n mipite a muh tahun a thangse mahmah va, Paul thusoi chu a kalh va, a soisia uhi.

⁴⁶Huin Paul leh Barnaba in haangsantahin a soi va, Pathian thu hi nanguh kawma soi masat diing mawng ahi a; hizongleh, na nial va, kumtuanga hing taahlou a na kiguat nungun he un, Jentelte lam ka ngatta uh ahi.

⁴⁷Ajiahchu Lalpa’n hichi bangin kei uh thu ahung pia hi, Jentelte vaah hi diingin ka hung guat a, kawlmong tanpha a hutdamna hi diingin, chih gelh bangin, a chi a.

⁴⁸Huleh Jentelte’n hu thu a jahun a kipaah va, Lalpa thu a paahtawi va; huleh, kumtuanga hing diing a guat taphot in a gingta uhi.

⁴⁹Huleh Lalpa thu chu hu gam pumpi ah a dalhta hi.

⁵⁰Hizongleh Judate’n Pathian ngaihsah numei zahtaathuaite leh khosung upate a chiilsia va, Paul leh Barnaba chu a sawisah va, a gam vapat a delhmangta uhi.

⁵¹Huin amahun a tungvah a keengpeeh va leivui a thingkhia va, Ikonium khua ah a chiahta uhi.

⁵²Huleh nungjuite chu kipaahna leh Hagau Siangthou in a dimta uhi.