Read Simte SILBAWLTE 15 Bible Online

SILBAWLTE 15 - Simte bible

SILBAWLTE 15

¹Huleh mi kuate aha Judia gam apatin a hungsuh va, Mosi daan banga zeh na tan louh uleh hutdam na hi thei sih diing uh, chi'n unaute a hilh va.

²Huleh Paul leh Barnaba chu amahuh toh hahnial a, a kinial va, a kikhin jiahun, Paul leh Barnaba chu a lahva kuate aha toh hu thubuai tungah, Jerusalem khua a sawllehte leh upate kawma chiah tou diingin a guat va.

³Huin kouhtuamte’n amahuh chu a va thah va, amahun Jentelte lunghei kiitdan thu soi jel in, Phoenicia gam leh Samaria gam a tawn suaahuh; huchi'n, unaute zousiah nasatahin a kipaahsah uhi.

⁴Huleh Jerusalem khua a tunun kouhtuamte leh sawllehte leh upate in ana kipaahpih va, huleh, Pathian in amahuh zang a a silbawlte zousiah a soi uhi.

⁵Hizongleh Pharisai pawl a gingtu kuate aha a kipan va, Jentelte chu a zeh uh tan a, huleh Mosi daan jui diing a zong hilh ngei diing ahi, a chi uhi.

⁶Huin sawllehte leh upate chu hu thu ngaihtuah diingin a kikhawm va.

⁷Huleh naahtaha a kinial nungun, Peter a kipan a; a kawmvah, Mite leh unaute, Jentelte’n keimah kama tanchinpha ja a, a gintaatna diing va, Pathian in nidang laia, i lah vapat ahung guatdan na he uhi.

⁸Huleh lungsim hetu Pathian in eihaw ahung piah bangmahin Hagau Siangthou a kawmvah a pia a, a heetpihta hi.

⁹Huleh eihaw leh amahuh khentuam nei louin, ginna in a lungsim uh ahih siangthou hi.

¹⁰Huchi'n i pulepate leh eihawn zong i zoh louhsa uh namkol chu tuin nungjuite ngawng a baat tum a bang diinga Pathian ze-et na hi viai?

¹¹Hizongleh amahuh tobangin, eihaw zong Lalpa Jesu Khrist khotuahna jiaha hutdam diing hi in i kigingta uhi, a chi a.

¹²Huin mipi zousiah a sipta va, Barnaba leh Paul in Pathian in amahuh zanga. Jentelte laha chiamchihna leh sillimdang a bawlthu a soi uh a ngaikhia uhi.

¹³Huleh a soi zohun, Jakob in a soi a, Mite leh unaute, ka thu ngai un;

¹⁴Pathian in amah min paw diing a, a lah vapat mi honkhat ladoh diingin a masa in Jentelte a veh hi chih thu Simeon in a soita hi.

¹⁵Huleh, hi thu leh zawlneite thu a kituaah hi;

¹⁶Hizohchiangin, ka hung kiit diing a, David biahbuuh puuhsa ka bawl kiit diing; a siatnate ka bawl kiit diing a, huchi'n ka tungding diing hi.

¹⁷Midangte leh Jentel ka min a kikou zousiahte’n Pathian a hawl na diingun, Hi silte zousiah bawlpa Lalpa’n a chi hi, chih gelh bangin.

¹⁸A silbawlte zousiah chu khovel siam chiil apatin Pathian heet ahi.

¹⁹Hujiahin, Jentelte laha Pathian lama kiheite chu suhbuai dah lei chih ka ngaihdan ahi.

²⁰Milim biahna, sil niin neehte, kingaihte, sa heehlup leh sisan neehte tawpsan diingin a kawmvah gelh lehang ka chi zaw hi.

²¹Ajiahchu nidanglai apatin Mosi in khaw chinah a thu hilhtu a nei jela, kikhopna inn chinah khawlni tengin a thu chu sim ahi veu hi, a chi a.

²²Huin sawllehte leh upate chu kouhtuam zousiah toh, a lahva mi teel a, Paul leh Barnaba toh Antiok khua a chiahsah hoih a sa va; a teelte uh min chu Juda, a min dang Barsaba, a chih uh leh Silas ahi va, amahuh chu unaute laha houtu ahi uhi.

²³Huleh hichibangin lehkhathot chu a gial va a khut vah a thot uh; Sawllehte leh upate leh unaute’n Antiok khua leh Syria leh Silisia gam a um Jentel unaute chibai a buuh uhi.

²⁴Ka lahva kipatin mi kuate aha in, zeh na tan va, huleh daan zong na juih diing uh ahi, chia thu soi in, nanguh ahung subuai va, na lungsim uh a mangbangsah uh chih ka he va; a kawmvah lah thu bangmah ka pe ngal sih va;

²⁵Hujiahin lungsim munkhat pua a ka kikhop un, mi teeldoh a, ka deihtah uh Barnaba leh Paul,

²⁶Lalpa Jesu Khrist min jiaha sih khawhsa loua umte geel toh na kawmva hung sawl diingin hoih ka sa uhi.

²⁷Huchi'n Juda leh Silas ka hung sawl uhi, amahun zong hi thu ka min ahung hilh diing uh.

²⁸Ajiahchu, Hagau Siangthou leh kei un, hi thu poimohte chih louh puaahgih dang bangmah na tungva ngah louh hoih ka sa uhi.

²⁹Milim biahna sa neeh bang, sa heehlup neeh bang leh kingaih bang tawp leh uchin ka chi uhi; hi haw na tawp uleh nanguh diingin a hoih diing hi. Damtahin um un, chi in.

³⁰Huchi'n a sawlkheta va, Antiok khua a tungva; huleh, mipi a koukhawm va, lehkhathot chu a peta uhi.

³¹Huchu a sim zohun, hamuanna thu jiahin a kipaah mahmahta uhi.

³²Huleh Juda leh Silas zong zawlnei ahi va, thu tamtahin unaute chu aha muan va, a sukip uhi.

³³Huleh hu a sawttah a um nungun amahuh chu hamuangtahin unaute lah apat sawllehte kawmah a chiahsahta uhi.

³⁴Silas in chu hu muna um tadih hoih a sa hi.

³⁵Paul leh Barnaba ahihleh Antiok khua ah Lalpa thu hilh leh soi in a um zing va, midang tamtahte toh zong.

³⁶Huleh ni bangzat aha nungin Paul in Barnaba kawmah, i chiah kiit diing a, khochina Lalpa thu i soina zousiah a unaute va vehni, bang chi'n a um viai chih i va en diing, a chi a.

³⁷Huleh Barnaba in John, a min dang Mark chu a kawmvah pui a tum a.

³⁸Hizongleh amah, Pamphilia gam a amah uh kiihsan a, natohna a amahuh toh chiah loupi a kawmva pui diing chu Paul in hoih a sa sih hi.

³⁹Huchi'n nasatahin a kinialta va, huleh a kikhen va; Barnaba in Mark a pui a, Cyprus gam ah kuang in a chiahta hi.

⁴⁰Huleh Paul in Silas a teel a, unaute’n Pathian hehpihna a, a kolsah nungun a chiahkheta hi.

⁴¹Huleh kouhtuamte sukip jelin Syria leh Silisia gam a tawnsuah uhi.