Read Simte SILBAWLTE 16 Bible Online

SILBAWLTE 16 - Simte bible

SILBAWLTE 16

¹Huin amah chu Derbe leh Listra khua ah a hung a; huleh ngai in, huah Timothi kichi, nungjui khat a um a, amah chu gingtu, Juda numei koi aha tapa ahi a; hizongleh a pa chu Grik mi ahi.

²Amah chu Listra leh Ikonium khua a um unaute in a soiphat mahmah uh ahi.

³Paul in amah chu tonpih diingin a deih a; huleh a pui a, hu vela Judami umte jiahin a zeh a tansah a; amahun a pa Grik mi ahi chih a heet jiahun.

⁴Huleh khopite tawna a pai kawmun, amahun Jerusalem khua a um sawllehte leh upate’n juih diing a, a namdet uh thupuuhnate chu a kawmvah a pekhia uhi.

⁵Huchi'n, kouhtuamte chu ginna ah a kipta va, nichinin a pung deuhdeuhta uhi. Paul Hagau in a pui:

⁶Huleh amahun Phrigia gam leh Galatia gam a totsuaah zohun Hagau Siangthou in Asia gam a thusoi a khap a,

⁷Misia gam kawm a tun un, Bithinia gam a luut a tum va; hizongleh, Hagau in a phal sih hi.

⁸Huchi'n Misia gam a khen va Troas khua ah a chiahsuhta uhi.

⁹Huleh jan laiin, Paul in manglam bangin Makedonia gam a mi khat ding in, Makedonia gam ah hung gaalkai inla, hung panpih in, chi a ngen in a mu a.

¹⁰Huleh hu manglam banga sil a muh zohin Makedonia gam ah chiah ka tumpah va, a kawmva tanchinpha soi diingin Pathian in ahung kou ahi chih dihtahin ka he uhi.

¹¹Huchi'n Troas khua apat kuang in ka pawt va, zangtahin Samothrakia ah ka chiah va, a jingin Niapoli khua ah ka chiah jel uhi.

¹²Huleh hu apatin Philippi khua ah ka chiah va, huchu Makedonia gam a khaw poimoh khat ahi a, Rome khua a mipeemte khua ahi; hu khua ah ni tamdeuh ka taam uhi.

¹³Huleh khawlni in kulhpi polam ah luipang ah haamteina mun hi a ka gintaat vah ka chiah va; huleh, ka tou va, numei hung paikhawmte kawmah thu ka soi uh.

¹⁴Huleh, numei khat a min Lidia, puan sandup zuah, Thyatira khua a um Pathian bemi in ka thu uh a ja a; Paul thusoi jui diingin Lalpa in a lungtang a suhvaahsah hi.

¹⁵Huleh, amah leh a innkuante in baptisma a tan zohun, Lalpa a ginum a na hung seh uleh, ka inn ah hung unla hung tung un, chi'n ahung kou a. Huleh, ahung houtaang teiteita hi.

¹⁶Huleh, hichi ahung hi a, haamteina mun a ka chiah laiun, nungaah kua aha dawi aaisaansiam zawl in ahung kituahpih a, ama’n chu a aaisaan jiahin a pute sumtamtah a muhsah veu hi.

¹⁷Hu mi in chu Paul leh keiuh ahung jui a, kikou in, Hi mite, hutdamna lampi hung hilhte hi tungnungpen Pathian suaahte ahi uh, a chi a.

¹⁸Huleh, huchi'n ni sawttah ahih a. Huin Paul chu a lunghita sih a, a kihei a, dawi kawmah, Jesu Khrist min in a sunga kipat pawt thu ka hung pia ahi, a chi a. Huleh, amah chu hu laitahin a pawtpah hi.

¹⁹Huleh a pute in a summuhna uh a bei chih a heettah un Paul leh Silas a man va, dawl munah houtute ma ah a kailuut uh a.

²⁰Huleh thukhentute kawmah a pui va, Hite hi Judami ahi va, ka khua uh a subuai mahmah uh.

²¹Huleh ei Romemi in i laah leh i zop sianglou daante juisah ahung tum uhi, a chi va.

²²Huchi'n mipite chu amahuh sual diingin ahung kipan va; huleh, thukhentute in a puan uh a bohkeehsah va, chianga jep diing in thu a pia uhi.

²³Huleh tampi vei a jep zohun, suangkul ah a khum va, a veengtu kawmah bittah a veeng diingin thu a pia uh a;

²⁴Huchitah a thu a piah jiahun, amahuh chu taanna sungnung zaw ah a khum va, a keengte vah singkol a butsah uhi.

²⁵Huleh jan khang laiin Paul leh Silas chu a haamtei va, Pathian kawmah phatna la a sa va; huleh, mitaangte in a ngaikhia uhi.

²⁶Huleh thakhat in ziil nasatahin ahung kiliing a, huchi'n, suangkul innbulte chu a kiliing gawpa; huleh kotkhaah zousiah kihongpah in, michin kolbuhte ahung kiphel vehta hi.

²⁷Huin suangkul veengtu chu ihmu ahung halh a, huleh, suangkul kotkhaahte kihong a muh in, mitaangte chu taimangta uh a sa a, a namsaau a doh a, kithah a tum hi.

²⁸Hizongleh Paul chu aw ngaihtah a kikou in, Bangmah kiloh sin, ka bawnun hi ah ka um uhi, a chi a.

²⁹Huin a veengtu in chu khawn val a kan a, a tawmluut a, kithing kawma hungin, Paul leh Silas ma ah a khupbohta a.

³⁰Huleh amahuh chu ahung puidoh a, Pute, hutdama umna diingin bang ahiai ka bawl diing? a chi a.

³¹Huin amahun, Lalpa Jesu Khrist gingtain, huchi'n hutdam in na um diing, nangleh na innkuante toh, a chi uh.

³²Huin amahun a kawma leh, a inn a um zousiahte kawmah Lalpa thu a soita uhi.

³³Huleh ama’n amahuh chu hu janin hu laitah mahin a pui a, a jepna golhte uh a silsiang a; huleh, amah leh a innkuante zousiah in baptisma a tangpah ngal uhi.

³⁴Huleh amahuh chu a inn sungah a pui a, a ma vah an a lui a, Pathian a gintaat jiahun a innkuante zousiah toh a kipaah uhi.

³⁵Huleh ni a suaah in, thukhentute in, Hu mite hah in, chi'n mi mantute a sawl va;

³⁶Huleh suangkul veengtu in Paul kawmah hu thu a hilh a, Thukhentute in nanguh hah diingin mi ahung sawl uhi; hujiahin tuin pawt unla hamuangtahin chiah un, a chi a.

³⁷Hizongleh Paul in a kawmvah, Romemite ka hi ngal va, ka siamna uh leh siamlouhna he louin vantaang mitmuh in ahung jep va, suangkul ah ahung khum va; huleh tuin; a guuha hung delhkhiah sawm ahi uh maw? hithei ngei lou diing; amahuh mahmah hung u’henla hung puidoh uheh, a chi a.

³⁸Huleh mimantute in hu thute chu thukhentute kawmah a hilh va; huleh, Romemite ahi uh chih a jah un a lauta va.

³⁹Huin amahuh a hung va, a zawl va, a puidoh va, khopi polama chiah mang diingin a ngen uhi.

⁴⁰Huleh amahuh chu suangkul apat a pawt va, Lidia inn ah a luut va; unaute a muh tahun, a hamuan va, a pawtta uhi.