Read Simte SILBAWLTE 17 Bible Online

SILBAWLTE 17 - Simte bible

SILBAWLTE 17

¹Huleh Amphipoli khua leh Apollonia khua a paipeel va, Thessalonika khua a tungta va, huah chu Judate kikhopna inn a um a;

²Huleh Paul chu amah ngeina in, a kawmvah a luutta, khawlni thumvei Pathian lehkhathute apat suituahpihin,

³Khrist chu gimthuaah diing mawng a hihdan bang, huleh misi lah apat thou kiit ngei diing a hihdan leh, hi na kawmva ka soi Jesu chu Khrist ahi chih a hilhchian a, a sulang hi.

⁴Huchi'n a lahva mi khenkhat in a gingta va, Paul leh Silas chu a pawlta uh; Pathian ngaihsah Grik mipi nasatah leh numei lamkai tamtahte toh.

⁵Hizongleh ginglou Judate’n a huphulh va, dawlmun a migilou thasia kuate aha a kawmvah a pui va, mipi a koukhawm va, khopi sung teng a hihbuaita uhi, huleh Jason inn a luh va, amahuh chu vantaang laha puikhiah a tum uhi.

⁶Huleh amahuh a muh louh phetun, Jason leh unau dang kuate aha khopi sung houtute kawmah a kailuut va, a kikou va, Hi khovel hihbuaitute hi ah zong a hung va;

⁷Jason in ana zintungsah a; hite zousiah in A min Jesu, kumpi dang a um hi, chi'n Kaisar thu kalhin a um uhi, a chi va.

⁸Huleh mipite leh khopi sung hoututein hu thu a jah un, a buaita va.

⁹Huleh amahun Jason leh midangte kawm apatin a luang va heen diing bang aha a la va, amahuh a hahta uhi.

¹⁰Huleh unaute’n ajan ajan in Paul leh Silas chu Beria khua ah a sawlkhepah va; hutah a va tun un Judate kikhopna inn ah a luut uhi.

¹¹Hu mite chu Thessalonika khua a mite sangin ana hoihzaw va, lungsim kipaahtahin thu chu a pom va, a thusoi uh chu a dih leh dihlouh heetna diingin, nichinin Pathian lehkhathu ah a hawl veu uhi.

¹²Hujiahin amahuh laha tamtahin a gingta va; Grik numei zahumte leh pasalte zong tawmtham louin a gingtata uhi.

¹³Hizongleh Thessalonika khua a Judate’n, Paul in Beria khua ah Pathian thu a soita chih a heet tahun, hu ah zong a hung va, mipite ahung subuaita uhi.

¹⁴Huin kintahin unaute’n Paul chu tui khang lian tana chiah diingin a sawlkhepah va, hizongleh, Silas leh Timothi chu huah a umdenta uhi.

¹⁵Huleh Paul puitute’n chu Athen khua tanin a pui va; huleh, Silas leh Timothi chu a kintheitawpa a kawma hung diing a thuhaah chu puain a chiahta uhi.

¹⁶Huleh Paul in Athen khua a amahuh ana ngaah laiin, hu khua chu pathian lima dimin a mu a, a lung a thahta hi.

¹⁷Hujiahin kikhopna inn ah Judate leh Pathian ngaihsahte a nial veu a, dawl munah zong ana um photmahte chu ni chinin a nial jel hi.

¹⁸Huin Epikuria mite leh Stoikmite laha mipil kuate aha in zong amah ahung nial va. Huleh, khenkhat in, Hi mi kamta min bang ahiai a soi tup? a chi va. A khen dangte’n, (Jesu thu leh thohkiitna thu a soi jiahin) gam dang pathiante thu soitu ahih tuaah hi, a chi uhi.

¹⁹Huleh amah chu a pui va, Areopaga ah a tut va, a kawmah, Hi thuhilhna thah na soi hi na hung hesah thei diai?

²⁰Silmah bang aha ka bil vah na hung tut ahi; hujiahin, Hi sil umzia ka he ut uhi, a chi uh.

²¹Ajiahchu Athenmi haw zousiah leh a khua va zin umte zong, a kiman kal phot un thuthah taphot soi in aha, a ngaikhe beehin aha a um veu uhi.

²²Huin Paul chu Mars taang laitah ah a ding a, a soi a, Nanguh Athen khua a mite haw, bangkimah sahkho ngaihsahtah mi na hi uh chih ka he hi.

²³Ajiahchu ka vaah kawma, na biahte uh ka et leh, maitaam khat, a tunga, heetlouh Pathian a diing, chi a kigial ka mu hi. Hujiahin, he loupi a na biah uh, hu, Amah chu ka hung hilh ahi.

²⁴Pathian khovel leh a sunga sil zousiah siamtu chu, vaan leh lei Lalpa ahihjiahin, khut a bawl inn bangah a um ngei sih hi;

²⁵Sil tasam bangin mihing khuta natohsah in zong a um ngei sih hi, Amah ngei chu bangkim kawma hinnate, haihna leh sil zousiah petu ahi zaw hi.

²⁶Huleh leitung zousiah luahsuaah a um diingin sisan bul munkhat vehin namchin mi a siam a, amahuh diingin hunbite a guat a, a umna gii uh zong a khamsah hi;

²⁷Amahun Lalpa a hawl va, amai amai va, a muh teiteina diingun, hizongleh, Ama’n chu eite ahung gamlat chiat sih ngal a;

²⁸Ajiahchu Amah ah i hing va, i taang va, i um uh ahi ngal a; nanguh, laphuahsiam kuate aha in zong, Ei zong a haahte i hi ngal va, chi a a soi bangun.

²⁹Huchi'n Pathian haahte i hih jiahun, Pathian chu sana pouh, dangka pouh, suang pouh, mihing khutsiam leh suhtuah a kheen milim tobang ahi, chih, i gingta diing uh ahi sih hi.

³⁰Huleh Pathian in i heet louh laite uh a kitheihmohbawl a, hizongleh, tuin chu gamchin a mi zousiah kisiih diingin thu a peta hi.

³¹Ni a chiam jiahin, hu ni chiangin a mi guat chu, lei a mite dihtattahin a ngaihtuahsah diing; huchu Pathian in Amah misi lah akipata kaithouin, mi zousiah kawmah a hesahta hi, chi in,

³²Huleh, amahun misi lah akipata thohkiitna thu a jah tahun, kimkhat in a nuihsan va; huleh a dangin, Hi thu na kawmah ka ngaikhe kiit diing uhi, a chi va.

³³Huchi'n Paul chu a lahva kipat a pawtta hi.

³⁴Hizongleh mi kuate aha a kawmah a belh tinten va, a gingta va; huleh a khenkhat chu Areopagami Dionisia leh numei khat a min Damari leh a kawmva midangte toh ahi uhi.