Read Simte SILBAWLTE 2 Bible Online

SILBAWLTE 2 - Simte bible

SILBAWLTE 2

¹Huleh, Pentikost ni ahung tunin, a bawnun lungsim mun khat pua in mun khat ah a umkhawm va.

²Huleh, thakhat in vaan a kipanin ging, huihpi nasatah nung bangin ahung um phut a, huleh, huhin chu a touna inn uh a sudim veh a.

³Huleh, leite amah leh amah kihawm in mei bangin a kawmvah ahung kilang a, huleh, a tung chiat vah ahung umta hi.

⁴Huleh, a bawnun Hagau Siangthou in a dimta va, Hagau in a haamsah bangjelin haam dang in ahung haamta uhi.

⁵Huleh, vaan nuaia jat zousiah laha kipan Pathian ngaihsah Juda haw Jerusalem khua ah a um va.

⁶Huleh, hu ging a jah tahun mipi ahung kikhawm va, huleh a haam uh mi zousiah in amahuh haam chiata a jah jiahun a lungsim un ahung buaita va.

⁷Huleh, a bawnun a mangbang va, thum ah a sa mahmah uh, Endih vua, hi-a haam haw zousiah Galili gam a mi ngen hilou ahi uh maw?

⁸Bangchidan ahiai i bawnva i pianpih haama i jah chiat uh?

⁹Khenkhat Parthiate, Medaite, Ela mite huleh khenkhat Mesopotamia gam a um, Kappadosia gam a um, Judia gam a um, Ponta gam a um, Asia gam a um,

¹⁰Phrigia gam a um, Pamphilia gam a um, Aigupta gam a um, huleh Cyrene khawkawm vela Libya gam a um i hi va; huleh, khenkhat Rome kho-mikhual, Judahaw leh a biahdan uh juite i hi va,

¹¹Khenkhat Krit gam leh Arab gammi bang i hi ngal va, hizongleh Pathian silbawlloupite a soi uh eimah haam chiat in i ja uh, a chi va.

¹²Huleh, a bawnun thum ah a sa va, a ngaihna a he sih va, bangchidan ahitai? a chi va.

¹³Khenkhat in, a nuihsan va, Uain thah kham hi uh e, a chi uhi.

¹⁴Hizongleh, Peter chu sawm leh khatte toh a dingkhawm a, aw ngaihtahin a kawmvah a soi a, Nanguh Judia gam a um mite leh Jerusalem khua a um zousiah haw, Hi thu he unla, ka thu zong ngai un;

¹⁵Hihaw na gintaat bangun a kham sih uhi, vaihaamsaang ahi pan hi.

¹⁶Hizongleh, hite zawlnei Joel in ana soi chu ahi;

¹⁷Pathian in, Ni nunungte ah hichi ahung hi diing, Mi zousiah tungah ka Hagau ka leih diing a; huchi'n, na tapate un kilaahnate a mu diing va, na teehsete un mang a man diing uh;

¹⁸Huleh, ka suaahpate leh ka suaahnute tungah zong ka Hagau ka leih diing a ka thu a soi diing uh;

¹⁹Huleh, tunglam vaan ah silmahte, nuailam lei ah chiamtehnate ka musah diing a; sisan leh, mei leh meikhuhu toh;

²⁰Lalpa ni loupi leh minthangtah ahung tun ma in, ni mial a suah diing a, ha sisan a suaah diing;

²¹Huleh, hichi ahung hi diing a, kuapouh Lalpa min lou taphot chu hutdam in a um diing uh, a chi hi, a chih.

²²Nanguh Israel mite, hi thute ngai un, Nazareth Jesu chu Pathian in Amah zang a na lahva, silmahte, silloupite leh chiamtehnate a bawlte apatin Pathian mi deih ahi chih a hesah a, huchu nangun zong na he uhi.

²³Amah chu Pathian lemguat mawng leh heetlawh bangin piahkhiaha um in na pui va, misualte khut in kros ah na kilhbeh va, na sulumta uh;

²⁴Amah chu Pathian in sihna gaahnate phelsah in, a kaithouta hi; sihna tuuhden gual ahih louh jiahin.

²⁵Ajiahchu, David in a tungthu a soi a, Ka ma ah bangchihlaipouhin Lalpa ka mu zing a, suhliing a ka um louhna diingin ka jiatlam ah a um hi;

²⁶Hujiahin ka lungtang a nuam a, ka lei zong a kipaah a; ka tahsa zong kinemtahin a um nalai diing hi;

²⁷Ka hagau misi khua ah na nuse sih diing a, Na misiangthou zong muatna na musah phal sih diing.

²⁸Nangmah in hinna lampi na hung hesah a; na meel in kipaahin na hung sudim zing diing, chi'n.

²⁹Mite leh unaute, chihaahtu David thu hi lau louin na kawmvah ka soi thei hi, amah zaw a si a, vui zong a vuita va, a haan zong tuin i kawmvah a um nalai hi.

³⁰Hujiahin amah chu zawlnei ahi a, sa dana, a khaalbe a kipanin a laltouphah a tou diing, Khrist, ka hung tungdoh diing chih, Pathian in kichiam in a soi hi chih a he a;

³¹Ama’n hichu ana heetlawhsa ahih jiahin, Khrist thoh kiit diing thu a soi ahi, amah misi khua ah nuutsiat in a um sih a, a luang zong a muat sih hi, chih.

³²Hi Jesu chu Pathian in a kaithou kiitta ngeia, huchu ka bawnun heetpihtute ka hi uhi.

³³Hujiahin Pathian khut jiatlam a paahtawi in a um a, huleh, Hagau Siangthou chiam chu Pa kawm apatin a mu a, na muh uleh na jah uh chu ahung leih ahi.

³⁴David chu vaan ah a kaltou sih hi; amah ngei in, Lalpa’n ka Lalpa kawmah, Ka jiatlam ah tou zing in,

³⁵Na gaalte na keengpeeh ngahsan a ka bawl masiah, a chi hi, a chi zaw hi.

³⁶Hujiahin, Jesu na kilhbeh ngei uh chu Pathian in Lalpa leh Khrist hikhawm in a bawlta chih, Israel nam zousiah in chiantahin he uheh, a chi hi.

³⁷Huleh, Hi thu a jah tahun a lungtang va sut bang ahung hita va, Peter leh sawlleh danghaw kawmah, Mite leh unaute, bangchibangin ka bawlta diing viai? a chi va.

³⁸Huin, Peter in a kawmvah, Kisiih in lunghei unla, na sual uh ngaihdam a hihna diingin Jesu Khrist min in baptisma tang chiat un, huchi'n Hagau Siangthou silpiah na tang diing uhi.

³⁹A chiam chu nanguh diing zong, na tate uh diing zong, gamlataha um zousiahte a diingin zong Lalpa i Pathian in a kawma a kouh photmahte a diing zong ahi, a chi a.

⁴⁰Huleh, thudang tamtah in a hilhchian a, Tulai khang thah giloute lahah kihumbit un, chi’n a hasot hi.

⁴¹Huin, a thu pom pouhmah in baptisma a tang va; hu ni in mi saang thum vela behlap in a um uhi.

⁴²Huleh, sawllehte thuhilh leh kipawlna ah, tanghou balkeeh in haamtei in phatuamngaitahin a um zingzing uhi.

⁴³Huleh, mi zousiah in a lauta va; sawllehte’n silmahte leh chiamchihnate tamtah, a bawl uh.

⁴⁴Huleh, a gingta zousiah a kipumkhat va, sil bangkim a kikop uhi;

⁴⁵Huleh, a silneih zousiah uh a zuah va, a kisapna bangun a bawnva lahah a hawm jel uhi.

⁴⁶Huleh, ni chinin lungsim munkhat in Pathian biahinn ah phatuamngaitahin a um jel va, a inn lam haw vah zong tanghou balkeeh in kipaahtah leh lungkimtahin a an uh a ne jel uh,

⁴⁷Pathian a paahtawi va, mi zousiah deihsah zawng in a um veu uh. Huleh hutdamna hung mu photmahte Lalpa’n ni chinin a kawmvah a behlapsah jel hi.