Read Simte SILBAWLTE 20 Bible Online

SILBAWLTE 20 - Simte bible

SILBAWLTE 20

¹Huleh buaina a daih nungin, Paul in nungjuite a kawmah a kou a, amahuh a aangkawi a, kampha in a ha a, Makedonia gam a diingin a chiahta hi.

²Huleh hu gam vel a totsuaah a, a kawmva hasotna thu tampi a soi zohin, Greece gam a tungta hi.

³Huleh huah ha thum a taam a. Huleh, Judate’n amah a guuhtaan jiahin Syria gam lama kuang a a pai diing laiin, Makedonia gam lehtot kiit a tumta hi.

⁴Huleh Beria khua a Sopater, Thessalonika khuate: Aristarkha leh Sakundate, Derbe khua a Gaia leh Timothi; huleh, Asia gam a Tikika leh Trophima in Asia gam dongin a tonpih uhi.

⁵Hite chu ka ma vah ana chiah va, Troas khua ah ahung na ngaah uhi.

⁶Huleh keiuh chu tanghou tolsohlouh nite zohin Philippi khua apat kuang in ka pai va, ni ngaa nungin a kawmvah Troas khua ah ka tungva; hu ah ni sagih ka taam uhi.

⁷Huleh, hapta ni masapenin, nungjuite tanghou balkeeh diing a ahung kikhop laiun, Paul in a jing a chiah a tup jiahin a kawmvah thu a soi a; huleh, jan khang dongin a soizop hi.

⁸Huleh pindan tungnunga a kikhopna vah khawnval tampi a um a.

⁹Huleh a min Eutika kichi tangval khat kotta ah a tou a, tuitahin ana ihmu hi: Paul in thu a soi sawt taatluat jiahin, ana ihmukha a, innsawng thumna apatin a kesuh a, a sisa in a tawm uhi.

¹⁰Huleh Paul a kumsuh a, a tungah a bohkhum a, a poma, Lauthawng sih un, ajiahchu a hing nalai hi, a chi a.

¹¹Huin pindan tungnunga a kaltouh kiit phetin, tanghou a balkeeh a, a ne a, sawttah khovaah dongin a kawmvah thu soi in a houlim a, huchi'n a chiahta hi.

¹²Huleh amahun tangvalpa chu a hing in ahung pui va, lungmuan tahzetin a lungmuangta uhi.

¹³Huleh keiuh chu kuang lamah kana chiah masa va, Assos zuanin kuang in ka chiah va; Paul tuansah diing ka sawm uh; ama'n a keeng a chiah a tup jiahin huchi bangin a chi mawng ahi.

¹⁴Huleh Assos khua a ahung kituahpih tahin, ka tuangsahta va, Mitilene khua ka tungta uhi.

¹⁵Huleh hu apatin kuang in ka chiah kiit va, a jingni in Kios zawn ka tungva; huleh a jingni in Samos ka tungva, Trogiliam ah ka taam uh; a jingni in Mileta khua ka tung uhi.

¹⁶Ajiahchu Paul in Asia gam a um sawt a ut louh jiahin, Ephesa khua kuang a chiah kheel a tupsa him ahi a; ahihtheih leh Jerusalem khua ah Pentikost nia um a tum a, a kin chiah ahi.

¹⁷Huleh Mileta khua a kipanin Ephesa khua ah mi a sawl a, kouhtuam upate a va kousah a.

¹⁸Huleh amahuh a kawma ahung tunun, ama’n a kawmvah, Asia gam a ka hung chiil ni masani apat na kawmva ka um sungsiah a ka umdan na he uhi,

¹⁹Thunuaigolhtah leh Judate’n ahung jebawl jiah va mittui tampi leh, sil hahsa ka tunga hung tungte thuaah kawmin Lalpa nna ka tong hi.

²⁰Huleh nanguh phattuamna diing sil bangmah ka iim sih a, ka hung hesah veha, vaantaang lah leh inn chinah ka hung thuhilh veu hi.

²¹Judate leh Grikte kawmah zong, Pathian lama lungsim kisiih thu leh, i Lalpa Jesu Khrist lama ginna thu ka hesah jel hi.

²²Huleh tuin ngai un, lungsima chiah louthei loua ka kiheet jiahin Jerusalem khua ah chiah diing a kisa ka hi, hu muna ka tunga sil hung tung diingte ka he sih hi;

²³Hagau Siangthou in, kaanna leh hahsatna in ahung ngaah hi chia, khochina ahung heetsah veute chauh ka he hi.

²⁴Hizongleh ka kitaidemna kipaahtaha ka taitung theihna diing leh Lalpa Jesu apat a ka muh Pathian lungsiatna tanchinpha heetsah diing natohna ka toh zoh theihna diingin hi silte khat mahin ahung hihliing sih a, ka hinna zong ittahin ka ngai sih hi.

²⁵Huleh tuin ngai un, nanguh zousiah Pathian gam thu soi a ka vaahlehnate’n ka meel na mu nawn sih diing uh, chih ka he hi.

²⁶Hujiahin mi zousiah sisanah ka siang ahi chih tuni in ka hung hesah ahi.

²⁷Ajiahchu Pathian thuguat zousiah na kawmvah phuandoh louha iim ka nei sih hi.

²⁸Hujiahin Pathian kouhtuam, Amah sisana a leite vaah diingin Hagau Siangthou in houtu a ahung siamna pawlte zousiah leh nanguh tungah pilvaang un.

²⁹Ajiahchu ka chiah nung chiangin ngei giloute na lahvah ahung luut diing a, pawlte a hawi sih diing uh chih ka he hi;

³⁰Nanguh lah ngei ah zong nungjui pawlte amahuh lama kaimang diingin thu tuam soi na hung um diing uhi.

³¹Hujiahin kiveeng un, huleh, kum thum sung zet mittui luang pum a suun leh jana mi chin taihilh ka tawp louhdan he zing un.

³²Huleh tuin unaute, hung siama hung khang sah thei a, huleh, mi lungsim siangthousate laha goutan pethei Pathian leh, a khotuahna thu kawmah nanguh ka hung kemsah hi.

³³Kuamah dangka, sana, silh leh teen ka eeng ngei sih hi.

³⁴Hi khutte’n keimah leh ka lawite taahsap luang a tongkhe jel chih nanguh ngei in na he uhi.

³⁵Bangkim ka bawl taphot na juih diingun ka hung ensah vehta hi, huchibanga tonggim leh Lalpa Jesu thu he zing kawmin mi haatloute na panpih diing uh ahi; Amah ngei in, 'Laah sangin, piah hi vangpiahna sangzaw ahi,' a chih khuh, a chi a.

³⁶Huleh huchibang thu a soi zohin a khupdina, a bawnun a haamteikhawm uhi.

³⁷Huleh a bawnun hah kahin a kap va, Paul a ngawngkawi va, a tawp va,

³⁸A meel a muh nawn louh diing uh thu a soi chu a lungkhampih diah uhi. Huleh kuang mun tanphain ava hata uhi.