Read Simte SILBAWLTE 21 Bible Online

SILBAWLTE 21 - Simte bible

SILBAWLTE 21

¹Huleh hichi ahung hi a, amahuh toh ka kikhen zohun, kuang in ka chiah va, zangjelin Koos ka tungva, huleh, a jing in Rode ka tungva, hu apatin Patara khua ka tung uhi;

²Huleh, Phoenicia gam a kai diing kuang khat ka mu va, ka tuang va, ka chiah jel uhi.

³Huleh Cyprus gam ka muhun veilampang ah ka peel va, Syria gam lamah ka chiah jel va, huleh Tura khua ah ka kinga uh; hu mun a kuang van suahkhiah diing ahihjiahin.

⁴Huleh nungjuite ka hawldoh va, huah ni sagih ka taam uhi; amahun Hagau hilh in Paul kawmah Jerusalem khua a, a chiah louh diing ahi, chih a soi uh.

⁵Huleh hu ni zaat ka um zohun, ka kipandoh va, ka chiahna diing uh ka zuanta va; huleh, amahun a bawnun, a jite a tate utoh khogei dongin ahung ha va; huin tui khang lian geiah ka khupdin va, ka haamtei uhi.

⁶Huleh mangpha ka kihaah zohun, keiuh kuang ah ka tuang va, amahuh inn lamah a kiih kiitta uhi.

⁷Huleh Tura khua apat kuang a chiah in Ptolemai khua ka tung va, unaute chibai ka buuh va, a kawmvah nikhat ka um uhi.

⁸Huleh a jingni in keiuh Paul lawite teng ka kipandoh va, Caesarea ka tungva; sagihte laha khat, sawlleh Philip innah ka luut va; amah toh ka um uhi (Sil. 6:5).

⁹Huleh hu mipa’n tanu li a nei a, nungaah siangthou ahi va, Pathian thu a soi jel uhi.

¹⁰Huleh huah ni tampi ka taam laiun, Judia gam a kipan a min Agaba kichi zawlnei khat a hungsuh a.

¹¹Huleh amah ka kawmvah ahung a, Paul kawnggaah a la a, a khutte leh a keengte a kikaan a, huleh, Hi kawnggaah neitu hi Jerusalem khua a Judate’n hichi bangin a kaan diing va, Jentelte khutah a pekhe sawn diing uhi, Hagau Siangthou in a chi hi, a chi a.

¹²Huleh hi thu ka jah tahun, keiuh leh hu muna umte’n Paul chu Jerusalem khua a chiah lou diingin ka hou uh.

¹³Huin Paul in, Bang diinga na kah va, ka lung na siatsah uh ahiai? ajiahchu Jerusalem khua a kaan chauh hi louin, Lalpa Jesu min diingin sih zong ka ngaap ahi, chi'n a dawng hi.

¹⁴Huleh houh zoh gual ahih louh tahin ka tawp va, Lalpa thuthu hiheh, ka chita uhi.

¹⁵Huleh hu nite nungin ka van uh ka siam va, Jerusalem ah ka chiahtouta uhi.

¹⁶Caesarea apatin nungjui kuate aha in ahung jui va, amahun a min Mnason, Cyprus a nungjui masa khat tunna a ka neih diingpa uh ahung pui uhi.

¹⁷Huleh Jerusalem ka hung tun tahun, unaute in kipaahtahin ahung na saang uhi.

¹⁸Huleh a jingni in, Paul chu kei u’toh Jakob kawmah a luut a; huah kouhtuam upate zousiah a um uhi.

¹⁹Huleh Paul in amahuh chibai a buuh zohin, a natohna zanga Pathian in Jentelte laha sil a bawlsah zousiah chu a baan in a soi hi.

²⁰Huleh amahun hu thu a jah un, Lalpa a paahtawi va; huin Paul kawmah, Unaupa, Judate lahah gingtute saang tamtah na mu a; huleh a bawnun daan tungah phatuam a ngai uhi.

²¹Huleh nang, Jentelte laha Juda umhaw zousiah kawma a tate uh zehtan louh diing leh, daan banga um louh diing, chi'n, Mosi paihkhiahna diing na thu hilh jel chih mi kama kipanin na thu a he uhi.

²²Bangchi hita diing ahiai le? mipi ahung paikhawm ngei diing uhi; Na hung tung chih lah ja ngei diing ahi va.

²³Hujiahin na kawma ka soi bangun bawl in; Kichiamna nei pasal li ka nei va;

²⁴Hu mite pui inla, amahuh toh kisusiang inla, a sam uh a meetna diing uh sum tuaah in; huchi'n mi zousiah in, mi kama na thu a jah teng uh bangmahlou ahi chih a he diing va, nang chu daan juiin kijentahin na um zaw chih a he diing uhi.

²⁵Jentelte laha gingtute tungtaang thu zaw, milim biahna sil neeh lamah, sa sisan neeh lamah, sa heehlup neeh lamah, kingaih lam banga kipanin, a kihepkhiah uh chih louhngal sildang a tang sih uhi, chih ka soi va, ka gialta uhi, a chi va.

²⁶Huin Paul in a jingni in mite chu a puia, a kawmvah a kisiangsah a, Pathian biahinn ah a luut a, kisiansahna ni bei hun diing leh, amahuh chiat a diinga a sillat hun diing uh siampu kawmah ava hilh hi.

²⁷Huleh ni sagih a chin diing kuan tahin, Asia gam a Judate in Pathian biahinn a Paul a muh tahun, mipi zousiah a chiilsia va, amah a man va,

²⁸A kikou va, Israel mite, hung panpih un: hi mipa ahi, gam china mi zousiah kawma, Juda mite, daante, huleh, hi mun soisia chu; hu lou zong Pathian biahinn ah Grikte a luutpih a, hi inn siangthou a hihbuah zouta hi, a chi va.

²⁹(Ajiahchu hu ma in khopi ah Ephesa khawmi Trophima, a kawmah a mu va, Paul in amah chu Pathian biahinn ah ahung pui tahin a gingta uhi)

³⁰Huin, khopi zousiah a phuta souhsouh va, mihaw chu a taikhawm va; Paul chu a man va, Pathian biahinn a kipan a kaidoh va; kotkhaahte a khaahpah ngal uhi.

³¹Huleh amah thah a tup laitahun, Jerusalem khua a mi zousiah a buai uh chih thu, sepaih houtu lianpen kawm a tung a.

³²Ama’n sepaihte leh sepaih zahoutute a puipah ngal a, a kawmvah a taisuh a; huin, amahun houtu lianpen leh sepaihte a muh tahun, Paul a vuaah uh chu a tawpta uhi.

³³Huin houtu lianpenin ahung naih a, Paul a tu a, khainiang nih a khih diing thu a pia a; huleh, kua hi aha, bang hihsia aha, chih a dong hi.

³⁴Huleh mipi lahah a khen thukhat in a kikou va, a khen thudang in a kikou uhi; huleh, buai jiahin a dan a he sih a, kulh a puiluut thu a pia hi.

³⁵Huleh Paul kalbi a tun laiin, mipi'n a hoh nasat jiahun sepaihte’n amah a domkaang uhi.

³⁶Mipi zousiah in, Sumangthai un, chi a kikou in a jui lutlut ngal va.

³⁷Huleh, Paul chu kulh a, a puiluut diing kuan un, ama’n sepaih houtu lianpen kawmah, Na kawmah thu themkhat ka soi thei diai? a chi a; huleh, ama’n, Grik haam na he maw?

³⁸Tuma a mite buaina bawla mithatte saangli gamdai a puikhetu, Aiguptami hilou na hi maw? a chi a.

³⁹Hizongleh Paul in, Judami, Silisia gam a Tarsa khua a mi ka hi, kho namei a um hilou ka hi; hung lungsiat inla, mi zousiah kawmah thu hung soisah in, a chi a.

⁴⁰Huleh, lem a sah tahin, Paul chu kalbi ah a ding a, mipi lam a khut in a jap a. Huleh, a sipduam tahun, a kawmvah Hebrai haam in thu a soi hi.