Read Simte SILBAWLTE 22 Bible Online

SILBAWLTE 22 - Simte bible

SILBAWLTE 22

¹Mite, unaute leh pate haw, tuin na kawmvah ka siamna thu ka soi diing hi, ngai un, a chi a.

²(Huleh a kawmva Hebrai haam a thu a soi a jah tahun, a sipta sem va; huin ama’n,)

³Kei chu Judami ka hi a, Silisia gam a Tarsa khua a piang ka hi, hizongleh, hi khua ah Gamaliel keengbula khang liana i pulepate uh daan khauhtah dungjuia zildoh a, tunia nanguh haw banga Pathian lama phatuamngai ka na hi hi.

⁴Huleh hi lampi a mite hi sihna khopin ka sawi jel a, huleh numei pasal in ka kaan a suangkul ah ka khum jel hi.

⁵Siampu lal leh upate zousiah inzong hu thu chu ahung heetpih uhi; amahuh kawm apat unaute piah diingin lehkha ka mu a, Damaska khua a um photmahte sawi diingin, Jerusalem a kaansa a pui diingin ka chiah hi.

⁶Huleh hichi ahung hita a, ka chiah a, Damaska khogei ka tunin, suunkim vel tahin, thakhat in vaan akipat vaah nasatah ka kiimah ahung vaahpum a.

⁷Huleh kei chu tualah ka puuh a, huleh, aw khat in, Saul, Saul, nang bang diinga hung sawi? chi in ka ja hi.

⁸Huleh Ken, Lalpa, kua na hiai? chi'n ka dawng a. Huleh, Ama’n ka kawmah, Nazareth Jesu, na suhduhdah chu ka hi, a chi a.

⁹Huleh ka kawma umte’n vaah chu a mu va, a lau uh; hizongleh, ka kawma thusoitu aw chu a ja sih uhi.

¹⁰Huleh ke'n, Bang ka bawl diai Lalpa? ka chi a. Huleh, Lalpa’n ka kawmah, Thou inla Damaska khosung ah luut in, hutah ah sil zousiah na bawl diingte ahung kihilh diing hi, a chi a.

¹¹Huleh hu vaah loupi jiahin khua ka mu thei nawnta sih a, ka lawite’n khut in ahung kai va, Damaska khua ah ka luutta hi.

¹²Huleh mi khat Anania, daan thu banga Pathian ngaihsah leh hua um Juda zousiah laha a soiphat uh.

¹³Ka kawmah ahung a, ka bula dingin, Unau Saul, khua muta in, ahung chi a. Huleh, huchih laitahin amah chu ka muta hi.

¹⁴Huleh ama’n, I pulepate uh Pathian in a deihlam he diing leh, Midihtat chu mu a, a kama suaah aw ja diing a hung guat ahita hi.

¹⁵Ajiahchu na muh leh na jah thu ah mi zousiah kawmah Amah thu heetpihtu na hi diing hi.

¹⁶Huleh bang diinga khongai nalai na hiai? thou inla, baptisma tangin, Lalpa minin haamtei inla, na sualna kisusiang in, ahung chi hi.

¹⁷Huleh hichi ahung hi a, Jerusalem khua a ka chiah kiit nungin, Pathian biahinn a ka haamtei laiin, jelhin ka um a;

¹⁸Kin inla Jerusalem khua apat pawt in; ajiahchu ka tanchin na soi diing pom lou diing ahi uh, hung chi'n Amah chu ka mu a.

¹⁹Huleh keima'n, Lalpa, amahun Nang hung gingtate suangkul a ka khum a, kikhopna inn china ka vuaah veu a he uhi.

²⁰Huleh Na thu hetu Stephen sisan a suah laiun, kei zong a kawmah ka ding a, lem ka na sa a, a hihlumte puante zong ka na kem ahi, ka chi a.

²¹Huleh Ama'n ka kawmah, Chiah in, hi apatin gamlataha Jentelte kawmah ka hung sawl diing ahi, ahung chita a, a chi a.

²²Huleh amahun hi tan chiang a ngaikhia va, huin aw ngaihtahin, Hitobang phet mi hi khovela kipatin suchimit un; hing taah ahi sih hi, a chita uh.

²³Huleh a kikou va, a puante uh a sepkhia va, vaan lamah, leivui a theh uhi,

²⁴Sepaih houtu lianpenin Paul chu kulh sunga puiluut diing thu a pia a, a tunga hutobang lawma a kikouna san uh a heetna diingin jep a dohchian diing, a chi hi.

²⁵Hizongleh savun khau a, a kaan zohun, Paul in a kawma ding sepaih zahoutu kawmah, Romemi mawngmawng siamlouh tansahna bei a vuaahna diing thu na nei viai mah? a chi a.

²⁶Sepaih zahoutu in hu a jah tahin, sepaih houtu lianpen kawmah a chiah a, Na silbawl diing pilvaang in; hi pa Romemi ahi, chi'n a hilh a.

²⁷Huin sepaih houtu lianpen a hung a, a kawmah, Romemi na hi maw? hung hilh in, a chi a. Ama’n, Hi e, a chi a.

²⁸Huleh sepaih houtu lianpenin, Hi khomi hihna ke'n sum tampi a ka lei ahi, chi'n a dawng a. Huleh, Paul in, Kei chu Romemi a piang mawng ka hi, a chi hi.

²⁹Huin dotchian tumte’n amah a chiahsanpah va; huleh sepaih houtu lianpenin zong Romemi ahi chih a heet tahin, amah mah in a kaansah ahih jiahin a lauta hi.

³⁰A jingni’n, Judate in bang jiahin aha Paul a heeh uh chih heetchian a tup jiahin, sepaih houtu lianpenin amah a phel a, siampu lalte leh vaihawmtute zousiah kikhawm diingin thu a pia a, Paul ahung pui va, a ma vah a dingsahta hi.