Read Simte SILBAWLTE 23 Bible Online

SILBAWLTE 23 - Simte bible

SILBAWLTE 23

¹Huleh Paul in vaihawmtute a en piinpen a, Mite leh unaute, tuni tanin Pathian mitmuha hoiha ka heet photmah bawl in ka um zing hi, a chi a.

²Huleh siampu lal Anania in, Paul kawma dingte a kam behsah diingin a sawl a.

³Huin Paul in a kawmah, Nang, baang kinuhvaampa, Pathian in nang ahung beeng zaw diing hi; nang daan banga ka thu ngaihtuah diingin na toua, daanlou banga kei beh diingin na hung chi maw? a chi a.

⁴Huleh a kawma dingte’n, Nang Pathian siampulal huchi bawl siat maw? a chi va.

⁵Huin Paul in, Unaute, siampulal ahih ka he sih a ahi; Na chipihte houtu tungah thu hoihlou soi sin, chih gelh ahi, a chi a.

⁶Hizongleh Paul in a keehkhat Sadukaite ahih va, a dang Pharisaite ahih uh a heet tahin, vaihawmtute lahah a kikoua, Mite leh unaute, kei chu Pharisai tapa, Pharisai ka hi; kinepna leh misi thohkiitna thu ah vaihawmsaha um ka hi, a chi a.

⁷Huleh ama’n hichi a, a soi zohin, Pharisaite leh Sadukaite kal ah kinialna ahung um a; huleh, mipi chu a kilangkhenta uhi.

⁸Ajiahchu Sadukaite’n misi thohkiitna mawngmawng a um sih, angelte zong a um sih, hagau zong a um sih, a chi va; hizongleh, Pharisaite’n hutegel a um tuaah hi chih a gum uhi.

⁹Huleh nasatahin a buaita va, Pharisai mi, lehkhagialtute khenkhat a ding va, a nial uh, Hi mi ah giitlouhna bangmah i mu sih uh; hagau in aha, angel in aha a kawmah thu soi ahih taah leh, Pathian i dou sih diing uh, a chi va.

¹⁰Huleh ahung kinial naah deuhdeuh phetun, sepaih houtu lianpenin Paul chu a loihtel uh a lau a, sepaihte chu va chiahsuh a, a lahva kipata Paul va pummat a, kulha hung puitou ngei diingin thu a pia hi.

¹¹Huleh a janin Lalpa chu Paul kawmah a ding a, Paul, hamuangtahin um in; Jerusalem khua a ka thu na heetsah bangin Rome khua ah zong na hesah diing hi, a chi hi.

¹²Huleh khua ahung vaah tahin Judate hunkhop a kithukum va, Paul a thah masiah va bangmah ne leh dawn lou diingin a kichiamta uhi.

¹³Huleh, mi thah sawma kithukumte chu sawmli sanga tamzaw ahi uhi.

¹⁴Huleh amahuh chu siampulalte leh upate kawmah a chiah va, Paul ka thah masiah va bangmah nelou diingin nasatahin ka kichiam uhi.

¹⁵Hujiahin nangun vaihawmtute toh a thu kichian sema ngaihtuah diing kipangin na kawmva puikhe diingin, sepaih houtu lianpen kawmah va soi un; huleh, ama’n na kawm uh ahung phaah ma a ana that diing a mansa ka hi uhi, a chi uhi.

¹⁶Huleh Paul sanggamnu tapa in, a guuhtaan thu uh ana ja a, kulh ah ava luut a, Paul ava hilhta hi.

¹⁷Huin Paul in, sepaih zahoutu khat a kawmah a kou a, Hi tangval sepaih houtu lianpen kawmah puiin; a kawmah soi ut a nei hi, a chi a.

¹⁸Huchi'n ama’n sepaih houtu lianpen kawmah a pui a, Paul mitaangpa’n a kawmah ahung kou a, Hi tangval in na kawma soi ut bang aha a neih jiahin na kawma hung pui diingin ahung sawl hi, a chi a.

¹⁹Huin sepaih houtu lianpenin a khut in a tu a, a tuam in a puidoh a, Ka kawma na soi ut bang ahiai? chi'n a guuh in a dong a.

²⁰Huleh ama’n, Paul thu kichian sema ngaihtuah tum bangin, jing chianga vaihawmtute kawma puisuh diingin Judate’n na kawma hung nget lem a sata uhi.

²¹Hizongleh a thu uh na zop sin; ajiahchu a lahva mi sawmli sanga tamzaw in a guuhtaan va, hu mite in amah a thah masiah va bangmah ne lou diing leh dawn lou diingin a kichiam uhi; huleh, tuin na thu ngaah in mansa in a um uhi, a chi a.

²²Huchi'n sepaih houtu lianpenin tangval chu a chiahsah a, Hi thu na hung hesahta chih kuamah hilh sin, chi'n thu a pia hi.

²³Huleh sepaih zahoutu nih a kou a, Jan khang hun chiang a Caesarea tana chiah diingin sepaih za nih toh, sakol tungtuang mi sawmsagih toh, teitawi mi za nih toh kimansa in koih un, a chi a.

²⁴Huleh gamoptu Felix kawma bittaha a luut theihna diingin Paul tuanna diing sakol zong guatsah un, a chi a.

²⁵Huleh ama’n hichibangin lehkhathot a gial hi;

²⁶Klaudia Lisia in gamoptu hoihpen, Felix chibai a buuh hi.

²⁷Hi mi Judate in a mat va a thah diing kuanun; Kei sepaihte toh ka va chiah a, amah hi Romemi ahih ka he a ka hundohta hi.

²⁸Huleh a heehna pen uh heet ka ut a, a vaihawmtute uh kawmah ka pui a;

²⁹Amah chu, a daan thu uh bang aha a kiheeh ahi chih ka he a, hizongleh, a heehna thu vah sihna leh kaanna diing khop bangmah a um sih hi.

³⁰Huleh Judate’n amah a taang uh chih mi'n ahung hilh tahin, na kawmah amah ka hung sawl phot ahi, huleh, amah heehte’n a tunga thubuai a neih phot uh na ma a soi diingin thu ka pia hi. Mangpha, chi'n.

³¹Huchi'n sepaihte’n a thupiah bangin Paul chu janin a pui va Antipatris a tunpih va.

³²A jingni in sakol tungtuang mite amah toh a kitonsah va, amahuh kulh ah ahung kiihta uhi.

³³Amahuh Caesarea a tungva, gamoptu kawmah lehkhathot chu a pia va, Paul zong a ma ah a dingsah uhi.

³⁴Huleh gamoptu in lehkhathot a sim zohin, Paul umna gam a dong a. Huleh, Silisia gam ahi chih a heet tahin;

³⁵Nang hung heehte ahung tun chiangun, na thu ka ngaikhe diing, a chi a. Huleh, Herod vaihawmna inn sunga koih diingin thu a pia hi.