Read Simte SILBAWLTE 24 Bible Online

SILBAWLTE 24 - Simte bible

SILBAWLTE 24

¹Huleh ni ngaa nungin siampulal Anania toh, upate leh a min Tertulla thusoi siam toh a hungsuh va, Paul tunga thubuai chu gamoptu kawmah a soi uh.

²Huleh Paul a kouhdoh tahun, Tertulla in amah a heehpanta a, Felix zahumpen, Nangmah vangin lungmuangtahin ka um va, huleh, na kepna jiaha hi namte a diinga giitlouhna khap hoih a, a um jiahin,

³Bang chihtanin khoimun pouhah lungkimtahin ka kipaah zing uhi.

⁴Ahihvangin, nang diing a chimtahhuai talua hih ka ut sih, na migiitna a ka thu uh themkhat hung ngaihkhiahsah diingin ka hung ngen ahi.

⁵Ajiahchu, kei un hi mi huathuaitah, khovel a Judate zousiah tohbuaitu leh Nazareth mite pawla a makaipen uh khat ahih ka he uhi;

⁶Pathian biahinn suhbuah zong a tum a; amah chu man ung a, ka daan bang va vaihawmsah ka tup uh ahi;

⁷Hizongleh, sepaih houtu lianpen Lisia ka kawmvah ahung kuana, huleh, ka khut va kipatin ngongtattahin a lamangta hi,

⁸A tunga thubuai neite na kawma hung diing thu pia in; nang ngei in amah dongchian in, ka heehna thute uh na he thei diing hi, a chi a.

⁹Huleh Judate’n zong hu thu chu huchibang ahi chi'n a panpih uhi.

¹⁰Huin gam-optu’n thusoi diing a khut a, a jap tahin, Paul in, Nang chu kum tamtah hi namte vaihawmsahtu na hih ka heet jiahin kipaahtahin ka dihna thu ka soi diing hi.

¹¹Jerusalem a Pathian be diing a ka chiahtouh nung ni sawmlehnih val ahi nai sih diing chih na he thei diing.

¹²Huleh, Pathian biahinn a mi toh ka kinial aha, ahihlouhleh kikhopna inn leh khosunga mipi ka chiilsiatna bangmah a mu sih uhi;

¹³Huin zong ahung heehnate uh kichiantahin a bul a suikhe thei sih uhi.

¹⁴Hizongleh, hi thu chu na kawmah ka soidoh hi, amahun biahdan tuam a chih uh lam juiin ka pulepate uh Pathian ka bia a, daan leh zawlneite lehkhabu a kigial zousiah gingta in;

¹⁵Huleh, mi dihtatte leh dihtatloute thohkiitna a um diing chi a amahun zong a gintaat uh, huchu ke’n Pathian lamah ka kineppih ahi.

¹⁶Hujiahin, Pathian lam leh mihing lama a sia a pha heetkhenna nei a, suhkhial beia um diingin bangchihtanin ka kihahbawl hi.

¹⁷Tuin, kum tampi nungin ka namte uh kawma silpiah diing leh ganthah diing hung kengin ka hung a.

¹⁸Hu sil ka piah laiin, Asia gam a hung kipan Judami kuate aha in, mipi tellou leh buai louin Pathian biahinn a ka kihihsiang thou chu ahung mu uhi.

¹⁹Hutein ka tunga thubuai nei hileh uh hi ah na ma ah um in ahung heeh diing uhi.

²⁰Ahihlouhleh, hi mite ngei in vaihawmtute ma a ka din laiin, ka suhkhelh muh a neih uleh, soi u’heh.

²¹Hi thu kam khat jiah houh ahih ngal louhleh a lahva ding a, Misi thohkiitna thu ah tuni’n na ma vah salh in ka um ahi, ka chih khuh, chi'n a dawng hi.

²²Huleh Felix in hi thute a jahin hu lam thu chu a hechian deuh a, amahah kawmah, Sepaih houtu lianpen Lisia ahung tunsuh chiangin na thu uh ka ngaihtuah veh diing chi'n a khongaisah phot hi.

²³Huleh ama’n Paul chu veenga, thuthawl deuh a umsah a, huleh a lawite’n a nna a tohsah uh khap lou diingin sepaih zahoutu khat kawmah thu a pia hi.

²⁴Huleh ni bangzah aha nungin, Felix chu a ji Juda numei Drusilla toh a hung va, Paul a kousah a, Khrist a ginna thu a ngaikhia hi.

²⁵Huleh Paul in dihtatna thute, kideehna thute leh, vaihawmna hung tung diingte a soi leh, Felix chu lauin a kithing a, Tuin chiah kiit photin; hun lem ka neih tahchiangin ka hung kou diing, a chi a.

²⁶Huleh a hahkhiahna diing a Paul in sum a piah bang a kinem a; a kousah mun sim a, a houpih thimthem hi.

²⁷Hizongleh kum nih nungin Porsia Festa in Felix ahung hengta a; huleh, Felix in Judate kipaahsah a ut a, Paul chu kaansa in a nuseta hi.