Read Simte SILBAWLTE 25 Bible Online

SILBAWLTE 25 - Simte bible

SILBAWLTE 25

¹Huchi'n Festa in gam chu a opta a, Caesarea apatin Jerusalem ah a chiahtou a.

²Huin, siampulal leh Juda lamkaite’n a kawmah, Paul tungthu ahiloulam in a hesah va,

³Huleh, lampi a ana guuhtaan va, ana thah theihna diingun a kawmah Paul chu Jerusalem a va puitousah diingin a ngen uhi.

⁴Hizongleh, Festa in, Paul chu Caesarea ah kep diing ahi, kei zong hu lamah ka chiahpah diing.

⁵Huchi'n, hu mi in giitlouhna nei ahihleh, na lahva thu neithei photmah in hung juisuh u’henla heeh u’heh, chi'n a dawng hi.

⁶Huleh a lahva ni sawm val a taam nungin Caesarea ah a chiahsuh a; huleh, a jingin vaihawmna touphah ah a tou a, Paul chu hung pui diingin thu a pia hi.

⁷Huleh amah ahung tunin, Jerusalem akipan hungsuh Judate chu a kiimah a ding va, a tungah thubuai tampi soi in, setahin a heeh va a thu dihtah chu a ensah thei tuan sih uhi.

⁸Paul in a dihna thu a soi a, Judate daan thu ah hiin, Pathian biahinn thu hitaleh, huleh Kaisar tungah hitaleh sil mawngmawng ka hihkhial sih hi, a chi a.

⁹Hizongleh Festa in Judate deihzawng bawl a ut a, Paul kawmah, Jerusalem a chiahtouh a hutaha ka ma a hi thute ngaihtuah hileh na ut ei? a chi a, a dong hi.

¹⁰Huin Paul in Kaisar vaihawmna touphah ma ah vaihawmsaha um diingin ka ding hi; Judate tungah bangmah ka hihkhial sih hi, nang chiantaha na heet ahi.

¹¹Migilou ka hih a, sihna khopa sil hihkhial ka hih leh, sih zong ka nial sih; hizongleh, hite'n ahung heehna teng uh a dihtah a um louh leh, kuama’n a kawmvah ahung pekhe thei sih diing uh Kaisar kawmah ka tut diing, a chi a.

¹²Huin Festa in vaihawmtute a houpih kiimvel zohin, Kaisar kawmah tut na tum maw? Kaisar kawmah na tung ngei diing hi, chi'n a dawng hi.

¹³Huleh, ni bangzah aha nungin, kumpipa Agrippa leh Bernisi chu Caesarea ah Festa chibai buuh diingin a hung va.

¹⁴Huleh amahuh hua ni tampi a taam nungun, Festa in Paul tungthu kumpipa kawmah a soi a, Felix in mitaang khat a nusia a;

¹⁵Jerusalem a ka um laiin siampu lalte leh Juda upate’n a thu ahung hesah va, siamlouh tangsah diingin ahung ngen uh.

¹⁶Ke’n a kawmvah, A heehpa uleh a heehte a kimaituah va, a heehna thu va ama’n a dihna thu soina lemtaang a neih ma in, mi kuamah gawt diing a piahkhiah Romemite daan ahi sih hi, chi'n ka dawng hi.

¹⁷Hujiahin amahuh hitah ahung tunun, sawt hal louin a jingni in vaihawmna touphah ah ka tou a, Hi mi chu hung pui diingin thu ka pia hi.

¹⁸Huleh a heehtute a din laiun, ka gintaat bangtahin a tungah giitlouhna thubuai bangmah laha soi sih va;

¹⁹Hizongleh amahuh biahdante leh, mi khat, Jesu, a sisa, Paul in a hing kiit chia a soi, thu ah kinialna nei ahi zaw uhi.

²⁰Huleh ke'n hutobang kinialnate khendan ka heet louh jiahin Jerusalem a chiah a, hutaha hu thu khen a ut leh ut louh ka dong hi.

²¹Hizongleh Paul in Augustus khen diing a siit a nget zawh jiahin Kaisar kawma ka sawl theih masiah veeng diingin thu ka pia hi, a chi a.

²²Huin Agrippa in Festa kawmah, Ke’n zong hu pa thusoi ka ngaikhe diing, a chi a. Ama’n, Jing chiangin a thusoi na ngaikhe diing, a chi hi.

²³Huleh a jingni in, Agrippa leh Bernisi chu loupitahin a hung va, sepaih houtu liante leh khua a miliante toh thu soina inn ah ahung luut va, Festa thuin Paul chu ahung pui uh.

²⁴Huin Festa in, kumpipa Agrippa leh hi muna ka kawmva um zousiahte’n hi pa na mu uhi, amah chu Judate mipi zousiah in Jerusalem ah leh hitah munah ka kawmah a heeh va, hing taah ahi sih chi'n a kikou uhi.

²⁵Hizongleh sihna diing khophial bangmah a bawl sih chih ka he a, huleh, ama’n Augustus kawma a thu tut a tup jiahin sawl ka guat ahita.

²⁶Hizongleh a thugin a bangmah ka lalpa kawma gelh diing lah ka thei sih a. Hujiahin na ma vah ka hung puikhia ahi, kumpipa Agrippa Aw, nang ma a hung pui ka hi deuh hi, ajiahchu, a thu dotvel nunga gelh diing nengkhat beeh ka muh theihna diingin.

²⁷Mitaang khat lalpen kawm a sawl a, a tunga a heehna thu uh heetkhawmsah louh ngolhuai hiin ka he ngal a, a chi hi.