Read Simte SILBAWLTE 26 Bible Online

SILBAWLTE 26 - Simte bible

SILBAWLTE 26

¹Huin Agrippa in Paul kawmah, Na dihna thu na soi thei hi, a chi a. Huin Paul in a khut a jah a, a dihna thu a soi a;

²Kumpipa Agrippa, Judate’n ahung heehna zousiah ah ka dihna thu tuni a na ma a ka soi diing jiahin kipaahin ka kihe hi.

³Ajiahpen chu Judate laha daan thubuai zousiah thua na pil mahmah ka heet jiahin ahi; hujiahin hoihtaha na hung ngaihkhiahsah ka hung ngen hi.

⁴Ka naupan laia kipan, a masapena ka chipihte lahah leh Jerusalem khua a ka umdan Judate zousiah in a he uhi;

⁵A chiil apatin ka tanchin a he uhi, ka sahkho daan va a khauhpen dungjuia Pharisai ana hi ka hi, chih a ut uleh ahung soipih thei uhi.

⁶Huleh, tuin ka pulepate uh kawma Pathian thuchiam chu kineppihna jiahin hitah ah vaihawmsah in ka ding ahi.

⁷Hu thuchiam chu, ka nam uh sawmlenih in suun leh jana Pathian na phatuamngaitaha tongin, muh a kinem uhi. Kumpipa Agrippa, hu kinepna jiahin Judate in ahung heeh uh ahi.

⁸Pathian in misite a kaithou chih bang diinga gintaathuai loua ngai na hi viai?

⁹Ke’n zong Nazareth Jesu min kalh zawngin sil tampi bawl leng hoih diingin kana gingta veu a.

¹⁰Hu bang chu Jerusalem khua ah zong ka bawl veu hi; huleh siampulalte kawm apat thu ka mu a, misiangthoute laha mi tampi suangkul ah ka khum a; huleh, amahuh a thah laiun lemsa lamah kana pang jel hi.

¹¹Huleh kikhopna inn chinah amahuh ka gawt zing a, Jesu min soisiatsah ka tum hi; huleh, a tungvah ka gilou mahmah a, khodangte tanphain ka gawt veu hi.

¹²Hutobang bawl diingin, siampulalte thu muin leh a sawlna lehkha uh tawiin, Damaska khua ah ka chiah a,

¹³Aw kumpipa, suun laitahin, vaan akipan vaah, ni sanga vaahzaw kei leh ka tonpihte kiimah vaah in ka mu a.

¹⁴Huleh ka bawnun tualah ka puuh va, Hebrai ha min, Saul, Saul, nang bang diinga hung suduhdah? vuaahna siihzum peeh nang diingin a hahsa hi, chi'n aw khat ka ja hi.

¹⁵Huleh ke’n, Lalpa, kua na hiai? ka chi a. Huin, Ama’n, Na suhduhdah Jesu ka hi,

¹⁶Hizongleh thou inla na keeng in ding in; hi na sil muhte leh na kawma ka hung kilaahna diingte toh, hu nna tong diing leh, theihpih diing a nang hung bawl diingin na kawmah ka hung kilaah ahi ngal a.

¹⁷Judate leh tua ka hung sawlna Jentelte khut a kipan ka hung hundoh diing.

¹⁸A mit uh suvaah diing leh mial apat vaahlam ngatsah diingin, huleh, Setan thuneihna apat Pathian lama a kihei theihna diing uleh sual ngaihdamna a muhna diingun, huleh kei ahung gintaat jiah va kisusiangte laha gou a luah theihna diingun.

¹⁹Hujiahin, Aw kumpipa Agrippa, vaanlam kilaahna thu chu ka nial sih hi;

²⁰Hizongleh a masa in Damaska khua a mite kawmah, huin Jerusalem khua a mite kawmah, huin Juda gam pumpi a mite kawmah leh Jentelte kawmah zong, a kisiih va Pathian kawm a zot va, kisiihna toh kiphu, nna a tohna diingun, ka hesahta ahi.

²¹Hite jiahin Judate’n Pathian biahinn ah ahung man va, thah ahung tum uh ahi.

²²Pathian akipan panpihna ka muh jiahin, tuni tanin mi neute leh mi liante kawmah thu hesah in ka um nalai hi, zawlneite leh Mosi in hung tung diing a chih uh thu chauh loungal thu dang soi louin.

²³Khrist in gim a thuaah diing a, huleh misite laha thou kiit masapen ahi diing a, huleh Judate leh Jentelte kawmah vaah a musah diing, a chih thu uh, a chi a.

²⁴Huleh huchia a dihna thu a soi laiin. Festa in aw ngaihtahin, Paul, a ngol hite, na lehkha siam sangin hung sungol ahi, a chi a.

²⁵Hizongleh, ama’n, Milianpen Festa, angol ka hi sih hi; thu dihtah leh pilna thu ka soi ahi zaw hi.

²⁶Hi thute kumpipa in a he hi, hujiahin a kawmah zong lau loua ka soi ahi; hi silte bangmah a kawmah iim ahi sih chih ka he hi; hi silte ningkawm khata kibawl ahih louh jiahin.

²⁷Kumpipa Agrippa, zawlneite thu na gingta ei? Na gingta chih ka he hi, a chi a.

²⁸Huin Agrippa in Paul kawmah, Thu themkhat a heema Khristian a hung bawl tum na hi, a chi a.

²⁹Huleh Paul in, Thu themkhat hiin thu tampiin hitaleh, nang chauh hilouin tuni a ka thu ja zousiah keimah banga um diingin Pathian kawmah ka ngen hi, hi kolte ahihleh but louin, a chi a.

³⁰Huleh Paul in huchia a soi zohin, kumpipa toh, gamoptu leh Bernisi toh, huleh a kawmva pute toh a ding chiat va;

³¹Huin a chiahkhe tuam va, a kihou va, Hi mi in sihna leh kolbuhna khophial sil bangmah a bawl sih hi, a chi va.

³²Huin Agrippa in Festa kawmah, Hipa in Kaisar kawmah a thu tut sawmlou hi leh hahkhiah theih mai diing hive’n, a chi hi.