Read Simte SILBAWLTE 28 Bible Online

SILBAWLTE 28 - Simte bible

SILBAWLTE 28

¹Huleh a suahtaat phetun, hu tuikual gam chu Malta ahi chih a heta uhi.

²Huleh a gam mimawlte’n lungsiattah zetin ahung na lungsiat va; guah a zut jiah leh a dap jiahin mei a chih va, ka bawnun ahung na kipaahpih uhi.

³Huleh Paul in sing lomkhat a tom a, meia a vah leh, meisa hulin guul khat ahung pawtdoh a, a khut a tu a, a kikhaidenta hi.

⁴Huleh a gam mimawlte’n guul a khuta kikhaiden a muhun, Hipa hi tualthat ahi ngei diing, tui khang lian apat suahta mahleh phubalatu in a hin phal nawnlou ahita, a chi va.

⁵Huleh ama’n ganhing chu meiah a thingkhia a, bangmah a chi sih hi.

⁶Ahihvangin amahun chu, ahung pawm aha, ahihlouhleh thakhata puuh a sipah diing a gingta in a ngaah va; hizongleh, sawtpi a ngaah va, bangmah a chih louhtahin, a lungsim uh a heng va, amah chu pathian ahi, a chizawta uhi.

⁷Hu mun chu hu tuikuala hausapa a min Publia a chih uh gam ahi a; hupa in ahung na kipaahpih a, ngainatahin ni thum ahung zintungsah hi.

⁸Huleh hichi ahung hi a, Publia pa chu nattun leh eehsi in ana lum a; Paul a kawmah ava luut a, a haamteia, a tungah a khut a nga a, a sudamta hi.

⁹Huchibanga a bawl zohin, hu tuikual gam a midang natna nei zousiah zong a hung va, a dam chiatta uhi.

¹⁰Amahun nasatahin ahung paahtawi va; huleh ka chiah diingun ka poimoh zousiah uh kuang ah a koih uhi.

¹¹Huleh ha thum nungin Alexandria kuang, phalbi sungteng tuikuala taam, a chiamchihna Kastor leh Pollax a chihun ka chiahta uhi.

¹²Huleh Siraka ah ka kinga va, hutah ah ni thum ka taam uhi.

¹³Huleh hu apatin ka paikual va, Rhegium ka tungva; huleh, nikhat nungin sim huih ahung nunga, a jing kiit in Puteoli ka tung uhi.

¹⁴Hua unaute ka mu va, a kawmva ni sagih taam diingin ahung hou va; huchi’n Rome lam zuanin ka chiah jelta uhi.

¹⁵Huleh unaute’n ka tanchin uh a jah tahun, hu a kipanin Appii dawlmun leh Zinbuuh thumte chianga hung dawn diingin a hung va; Paul in amahuh a muh in, Pathian kawmah kipaahthu a soi a, a hamuangta hi.

¹⁶Huleh Rome ka tunun, sepaih zahoutu in mitaangte chu veengtu sepaih houtupa kawmah a pekhia a; hizongleh Paul chu a veengtu sepaih khat toh amah chauh a, a um a phalsah hi.

¹⁷Huleh hichi ahung hi a, ni thum nungin Paul in Juda houtu haw a kou khawma; amahuh ahung kikhop tahun, a kawmvah, Mite leh unaute, Juda nam leh i pulepate uh daan tungah bangmah ka bawlsiat a um louh vangin, Jerusalem a kipanin Romemite kawmah mitaanga piahkhiah ka hita hi.

¹⁸Ahung etdih zohun, sihna khop hial ka tunga bangmah a um louh jiahin hah ahung gua va.

¹⁹Hizongleh, Judate’n huchu a nial jiahun Kaisar kawmah ka thu tut lou thei ka hita sih ahi; ka chipihte heehna a bawl chu hi louin.

²⁰Hi thu jiaha nanguh toh kimuhtuaha kihoulim diingin ka hung kou ahi; Israelte kinepna jiaha hi khainianga kaan ka hi ngal a, a chi a.

²¹Huleh, amahun a kawmah, Na tanchin Judia gam a kipanin lehkhathot in ka mu sih uh, unaute kuama’n zong hi a hungin na tung thubuai bangmah ahung ensah sih va, soi zong ahung soi ngei sih uhi.

²²Hizongleh na ngaihdan chu nangmah apat ka ja nuam uhi; ajiahchu hi pawl hi gam chin a soisiat a, a um uh ka he uhi, a chi va.

²³Huleh ni a guat va, hu a tunni in a kawmah mi tampi ahung va; jingkala kipat nitaahlam dongin a kawmvah Pathian gam thu hilhchianin a hesah a, Mosi daan lehkhabu thu leh zawlneite lehkhabu thuin, Jesu lamah amahuh a zawlzawl hi.

²⁴Huleh khenkhat in thu kisoi chu a gingta va, khenkhat in a gingta sih uhi.

²⁵Huleh amahuh a kithugual theih louh phetun, Paul in thu khat a soi zohin a paikheta uhi. A thusoi chu hih ahi, Hagau Siangthou in zawlnei Isaiah kama i pulepate uh kawma a soi chu a dih ngei mai,

²⁶Hi mite kawmah chiah inla va soi in, Ja chu na ja na diing va, a ngaihna na he sih diing uh; muh chu na mu na diing va, na hedoh sih diing uh;

²⁷Ajiahchu Hi chite lungtang a taahta a, a bil uh a ngongta a, a mit uh a siingta uhi; huchilou inchu a mit un a mukha diing va, a bil un a jakha diing va, a lungtang un a hesiamkha diing uh, huchi'n ahung kiheikiitkha diing uh a, ke’n ka na sudamkha diing hi, a chih chu.

²⁸Hujiahin Pathian hutdamna thu chu Jentelte kawma sawl ahita chih he un, amahun zaw ngai zong a ngaikhe diing uhi, a chia.

²⁹Huleh hi thute a soi zohin, Judate chu a pawtkheta va, amahuh lahah nasataha kinialna a nei uhi.

³⁰Huleh Paul chu kum nih pumlum luahman a kipiah inn ah a um a, a kawma chiah photmah ana kipaahpih a,

³¹Pathian gam thu a soi a, Lalpa Jesu Khrist thu haangsantahin a hilh jela, kuama’n amah a khaam sih uhi.