Read Simte SILBAWLTE 4 Bible Online

SILBAWLTE 4 - Simte bible

SILBAWLTE 4

¹Huleh, Peter leh John in mite kawma thu a soi laiun, siampute, biahinn houtute, huleh Sadukaite a hung va.

²Mi a hilh uleh Jesu jala misi laha kipana thohkiitna thu a hilh jiahun a lungkimta sih va.

³Huleh, a man va, nitaahlam ahih jiahin a jingni tanphain suangkul ah a khumta uhi.

⁴Hizongleh, thu ngaikhete laha tamtahin a tahsang va; a tamdan uh chu pasal ngen zong saang nga vel a pha uhi.

⁵Huleh, hichi ahung hi a, a jingni in, a houtute uleh, upate leh lehkhagialtute,

⁶Huleh siampu lal Ana leh Kaiapha leh John leh Alexander leh siampu lal chipih zousiah chu Jerusalem khua ah a kikhawm va.

⁷Huleh, Peter leh John chu a lai vah a dingsah va, Bang thuneihna in ahiai, ahihlouhleh, kua min in ahiai hibang na bawl uh? chi in a dong uh.

⁸Huin, Peter chu Hagau Siangthou in a dim a, a kawmvah, Nanguh mipi houtute leh Israel upate haw,

⁹Keiuh, tunia mi haatlou khat suhhatna thu ah, amah bang chi-a hung dam ahitai, chi a na hung phuul uleh;

¹⁰Na bawnun he un, huleh, Israelmi zousiah in zong he un, Nazareth Jesu Khrist, na kilhlup uh, Pathian in misi lah apat a kaithou kiit a, Amah min ngei in hi pa chu na bawnva ma ah dam in a dingta ahi.

¹¹Amah ahi nanguh inn bawlte’n na suang deih louh uh a ninga suang phatuampen hung hita chu.

¹²Midang kuamah kawmah hutdamna a um sih; vaan nuaia mihingte kawma kipia min lahah hung hundam diing min dang mawngmawng a um sih, a chi a.

¹³Huleh, Peter leh John haansandan a muh va, huleh, lehkha siamlou leh mi mawltah ahi uh chih a heet un, thumah a sa mahmah va; Jesu kawmah ana umta uh chih a heta uhi.

¹⁴Huleh, a mi suhdam uh a kawmva ding a muhun, bangmah a soisel thei tuan sih uhi.

¹⁵Hizongleh, a vaihawmna apat va, chiahtuam diing a thu a piah nungun, a kihou va,

¹⁶Hi mite bang i lohta diai? Silmah kithang a bawl uh Jerusalem khua a um zousiah in kichiantahin a he va; ei un zong i nial thei tuam sih uhi.

¹⁷Hizongleh, mi kawma a kithan sem louhna diingin, tukalsiah hi mina kuamah kawma thu a soi nawn louhna diingun i vau diing uh, a chi va.

¹⁸Huchi in, amahuh a kou va, Jesu min a thu soi kiit hetlou diing leh hilh hetlou diingin thu a pia uhi,

¹⁹Hizongleh, Peter leh John in chu a kawmvah, Pathian mitmuh in, Pathian thu man sangin nanguh thu man a hoihzaw eimah? ngaihtuah un.

²⁰Keiun zaw ka sil muh uleh, ka jahte uh soi louin ka um thei sih uh, a chi uhi.

²¹Huin, amahuh chu a vau naah sem va, a hahta uh, mipi jiahin gawtna lemtaang a mu sih uhi; a silbawl uh jiahin mi zousiah in Pathian a paahtawi ngal va.

²²Silmah a, a suhdampa uh kum sawmli sanga tam zaw ahi ngal a.

²³Huleh Peter leh John a pawt un a lawite uh kawmah a chiah va, siampu lalte leh upate’n a soi zousiah uh a hilh uhi.

²⁴Huleh, amahun a jah tahun, kituaahtah leh aw ngaihtahin; Pathian kawmah, Lalpa, nang chu vaan leh lei huleh, tuipite leh a sunga um zousiahte siamtu Pathian na hi.

²⁵Nang, na suahpa David ka min hi thu na soi hi. Bangchidana Jentelte lungthah ahi viai? huleh mite’n bangchidanin ahiai sil phatuamlou a ngaihtuah uh?

²⁶Khovel kumpite a ding va, vaaihawmte zong a kikhawm uh, Lalpa leh Khrist kalh in, chi'n.

²⁷Na Tapa siangthou, na thaunuh Jesu tungah, Herod leh Pontia Pilat toh, Jentelte leh Israelmite toh a kikhawm tahzet uhi.

²⁸Na khut leh na lungsim a hung tung diing a na guatlawh taphot bawl diingin.

²⁹Huleh, tuin, Lalpa, ahung vaudan uh en dih; huleh, na suahte’n haangsantah a na thu a soi theihna diing uh pia in,

³⁰Mite sudam diing a na khut jah in; Na Ta siangthou Jesu min jala chiamchihna leh silmahte bawl in, a chi va.

³¹Huleh, a haamtei zohun a umkhawmna uh ahung kiliing a; huleh, a bawnun Hagau Siangthou in ahung dim vehta va, huchi'n, Pathian thu chu haangsantahin a soita uhi.

³²Huleh, a gingta mipite chu, lungsim munkhat leh ngaihtuah munkhat in awm va; a lahva khat in zong a sil neih chu kei a tuam ahi, a chi sih a; sil zousiah a kikop jel zaw uhi.

³³Huleh, sawllehte’n silbawltheitahin Lalpa Jesu thohkiitna thu chu a hilh zing va; a bawnva tung ah khotuahna nasatah a um hi.

³⁴A lahva zong tasam kuamah a um sih uh; gamte, ahihlouhleh, innte neite’n a zuah va, a sil zuahte uh man ahung tawi va,

³⁵Sawllehte keeng bul ah a koih jel uhi; huleh, michin kawmah deihdong ching hun chiat in a hawm jel uhi.

³⁶Huleh, Jose, sawllehte’n Barnaba a chih uh (hu min umdan chu, Hamuanta, chihna ahi) Levi chi, Cyprus gam mi ahi a.

³⁷A gam neih chu a zuah a, a man ahung tawi a, sawllehte keeng bul ah a koihta hi.